17°C , Mostly cloudy | Kigali-Rwanda
Minisitiri Nyirasafari aha abakinnyi bazaserukira u Rwanda muri Gabon ibendera (foto Ngaboyabahizi P)

Amagare: Minisitiri Nyirasafari yasabye  abakinnyi b’u Rwada guhesha ishema igihugu

Yanditswe na NGABOYABAHIZI PROTAIS

Ku ya 18-01-2019 saa 11:01:43

Ubwo Minisitiri w’Umuco na Siporo “MINISPOC”, Nyirasafari Esperance  yasuraga ikipe y’igihugu  mu mukino wo gusiganwa ku magare  aho ikorera imyitozo  mu karere ka Musanze yasabye abakinnyi bazaserukira igihugu mu  marushanwa atandukanye  kuzegukana insinzi.

Minisitiiri Nyirasafari ukuri mushya muri MINISPOC yari yagiye i Musanze tariki 17 Mutarama 2019  gusura no kureba aho ikipe y’igihugu yitoreza.  Nyuma yo gusura iki kigo yaganiriye n’abakinnyi barimo kwitegura amarushanwa atandukanye arimo   irushanwa mpuzamahanga rizafungura umwaka w’imikino wa 2019 “La Tropicale Amissa Bongo 2019”, shampiyona y’Afurika izabera muri Ethiopia, Tour du Rwanda 2019 n’irushanwa ry’Afurika mu batarangeje imyaka 23 rizabera muri Cameroun.

Nyirasafari akaba yarasabye aba bakinnyi ko  icyambere bakwiye gukora ari  uguhataranira  ishema ry’igihugu.

Ati: “Mukwiye kumva ko mwakomeza guhesha ishema igihugu cy’u Rwanda, mbese ku isi hose mukaba aba mbere, mukora byinshi kandi byiza, Leta nayo izakora ibishoboka byose nk’uko bisanzwe  kugira ngo mukomeze mumererwe neza, mukwiye gutsinda  kuko abatoza nabo ndizera ko baba bakoze umurimo wabo uko bikwiye ”.

Minisitiri Nyirasafari akomeza abwira aba bakinnyi  ko ubuyobozi bubashyigikiye uhereye kuri Perezida w’u Rwanda, Paul Kagame.

Ati: “Iyo mugiye mu marushanwa mujye mwumva ko mufitiye inyungu iguhugu , ariko nano namwe bibafitiye inyungu, kuko mugomba guhora mwiteguye ko mushobora kurambagizwamo abakinnyi bo ku rwego rwo hejuru, aho rero birasaba umuhate wa buri wese no kugira intego, nkaba mwese mbifurije insinzi”.

 Umwaka wa 2018 ni umwe mu myaka, umukino wo gusiganwa ku magare  wabonetsemo  insinzi nyinshi kandi ku rwego mpuzamahanga. Gusa aba bakinnyi ntabwo bishimye kuko  hari bimwe mu byo bahabwaga batabonye birimo nk’ishimwe bagenerwaga mu gihe bitwaye neza.

Minisitiri Nyirasafari  yavuze ko ibyo bagiye kubikosora  ibyo bagenerwa byose bikaboneka nta nkomyi ndetse ko mu minsi ya vuba hagiye gukorwa  inyigo y’uburyo ikigo  k’imyitozo cyakwagurwa.

Aba bakinnyi  bavuga ko   intego  yabo ari imwe ariyo gukomeza guhesha ishema u Rwanda mu mahanga. Umwe muri aba bakinnyi, Uwizeyimana Bonaventure  akaba anamaze igihe kinini mu ikipe y’igihugu  yatangaje ko nta cyatuma badatsinda kuko  bifitiye ikizere.

Ati : “Perezida w’u Rwanda  aradushyigikiye kuko yazamuye umukino w’amagare atwitaho  natwe intego ni ukwegukana insinzi kuko twaratojwe, tumeze neza, ingufu zirahari  ni ukugenda turi ikipe igamije gutsinda”.

Uwizeyimana kimwe na bagenzi be bavuga ko umukino w’amagare ari siporo nziza kandi iteza imbere uyikora bakaba bahamagaririra  urundi rubyiruko kwitabirira uyu mukino.

Abakinnyi  6 bagiye guserukira u Rwanda muri Gabon mu irushanwa rya “La Tropicale Amissa Bongo 2019” ni Areruya Joseph wayegukanye umwaka ushize wa 2018, Mugisha Samuel, Uwizeyimana Bonaventure, Munyaneza Didier, Nkurunziza Yves na Uwizeye Jean Claude.  Iri siganwa rizatangira tariki 21 risozwe 27 Mutarama 2019.

Minisitiri Nyirasafari aha abakinnyi bazaserukira u Rwanda muri Gabon ibendera (foto Ngaboyabahizi P)

TANGA IGITEKEREZO

Leave a Reply

Your email address will not be published. Required fields are marked *