22°C , Mostly sunny | Kigali-Rwanda
Abakinnyi ba Fly CC mbere yo kwerekeza mu Bubiligi

Amagare: Ku nshuro ya kabiri, ikipe ya Fly igiye kwitabira amarushanwa mu Bubiligi

Yanditswe na BUGINGO FIDELE

Ku ya 11-07-2019 saa 07:37:57

Kuri uyu wa Kane  tariki 11 Nyakanga 2019 ni bwo  abakinnyi 7 b’ikipe ya Fly CC   mu mukino wo gusiganwa ku magare ikaba iterwa inkunga na SKOL  bahaguruka mu Rwanda berekeje mu Bubiligi  mu mujyi wa Eeklo aho bagiye kwitabira ku nshuro ya kabiri  amarushanwa atandukanye ndetse n’imyitozo  muri iki gihugu.

Aba bakinnyi bari mu byiciro bitatu  biteganyijwe ko bazakina amarushanwa  25 kuva tariki 13 Nyakanga 2019. Aya marushanwa azasozwa tariki 18 Kanama 2019 hanyuma iyi kipe igaruka mu Rwanda tariki 20 Kanama 2019.

Abakinnyi berekeje mu Bubiligi

Aba bakinnyi 7 bari mu byiciro 3 birimo ingimbi “Juniors” aharimo abakinnyi batatu  ari bo Nsabimana Jean Baptsite, Hakizimana Felicien  basanzwe bakinira Fly CC ndetse na Muhoza Eric ukinira ikipe ya Les Amis Sportifs y’i Rwamagana.

Hari kandi abakinnyi 2 bari mu kiciro cy’abatarengeje imyaka 23 “U-23”  ari bo Niyonshuti Jean Pierre na Mutabazi Cyprien naho mu bakinnyi bakuru “Elites” naho harimo abakinnyi babri ari bo Mugisha Moise na Dukuzumuremyi Fidele.

Uko amarushawa azagenda

Umwaka ushize wa 2018 hari hagiye abakinnyi b’ingimbi  gusa “Juniors” bakina bitabira amarushanwa 11. Kuri ubu ni amarushanwa 25 ariko azajya akinwa mu biciro bitandukanye.

Mu ngimbi bazakina amarushanwa 16 aho irushanwa rya mbere bazarikina tariki 14 Nyakanga 2019 rizabera ahitwa  Borsbeke (86km).

Mu bakuru bari kumwe n’abatengeje imyaka 23 “Elites & U-23”  bazakina amasiganwa 8 aho  isiganwa rya mbere bazarikina tariki 13 Nyakanga 2019  aho bazakinira na bo Borsbeke (117,5km).

Mu bakuru gusa “Elites” bazakina  irushanwa  rimwe rizaba tariki  23 Nyakanga 2019  aho bazakinira Westkspelle (117km).

Nk’uko byagenze umwaka ushize wa  2018  ubufasha bwose bw’iyi kipe bwatanzwe n’uruganda rwa Skol runatera inkunga iyi kipe ya Fly CC. Umuyobozi muri Skol  uzaba ari kumwe n’iyi kipe  mu Bubiligi, Benurugo K. Emilienne yatangaje ko  kuri iyi nshuro ya kabiri  bajyanye abakinnyi bakuru bitandukanye n’umwaka ushize bari bajyanye gusa abakinnyi b’ingimbi.

Yakomeje avuga ko uretse abo bajyanye baherekeje  abakinnyi  hari n’abandi bazasanga mu Bibiligi bazafasha mu myitozo barimo  na Niyonshuti Adrien wakiniye ikipe y’u Rwanda mu mukino wo gusiganwa ku magare ubu akaba aba mu Butaliyani.

Intego y’iki gikorwa akaba  ari ugufasha  abakinnyi b’u Rwanda kumenyera amasiganwa yo ku mugane w’u Burayi  aho bamwe bashobora no kugira amahirwe yo kuba babona amakipe bakinira nk’ababigize umwuga.

Umunyamabanga uhoraho mu ishyirahamwe ry’umukino wo gusiganwa ku magare mu Rwanda “FERWACY”, Murenzi Emmanuel yatangaje ko bishimira ubufatanye bwa Skol mu kuzamura uyu mukino mu Rwanda kandi ko igikorwa nk’iki ari ingenzi kuko bizafasha aba bakinnyi kuzamura urwego.

Umwe mu bakinnyi bagiye kwitabira aya marushanwa, Nsabimana Jean Baptiste yatangaje ko ari ubwa kabiri agiye kwitabira akizeza ko bitazabagora nk’ubushize kuko  basanze hatandukanye no mu Rwanda.

Ati: “Ubushize twagiyeyo  bibanza kutugora gusa  ubu twamenye uko hateye n’abataragiyeyo ubushize tuzabafasha  kandi turizera ko tuzitwara neza.”

Ntibitura Issa usanzwe ari umutoza w’ikipe ya Fly wari wajyanye n’iyi kipe mu Bibiligi yavuze ko icyagoye abakinnyi cyane ari imihanda yaho ndetse n’umuvuduko uri hejuru kuko hariya baba bihuta ndetse no gukata mu makorosi. Yakomeje avuga ko bamaze iminsi bitoza kandi no mu Rwanda ubu basigaye bakina amarushanwa ajya gusa n’ayo bagiye kwitabira yo kuzenguruka.

Abakinnyi ba Fly CC mbere yo kwerekeza mu Bubiligi

TANGA IGITEKEREZO

Leave a Reply

Your email address will not be published. Required fields are marked *