27°C , Partly sunny | Kigali-Rwanda

Amagare: Ikipe ya Israel CA yishimiye kongera kugaruka mu Rwanda

Yanditswe na BUGINGO FIDELE

Ku ya 16-01-2019 saa 16:08:35

Mu kipe ya Israel Cycling Academy  baratangaza ko bishimiye kongera kugaruka mu Rwanda kwitabira isiganwa mpuzamahanga ry’umukino wo gusiganwa ku magare  “Tour du Rwanda 2019” nyuma y’aho iyi kipe yaherukaga kwitabira iri siganwa muri 2016.

Tariki 15 Ugushyingo 2018  nibwo hatangajwe ku mugaragaro  inzira  ndetse n’amakipe 16  azitabira Tour du Rwanda 2019 ariko abategura isiganwa bagaragaza ko hari idi kipe imwe iziyongeramo.

Tariki 13 Mutarama 2019  nibwo hatangajwe ko ikipe ya Israel Cycling Academy  yo muri Israel yiyongereye ku makipe azitabira tour du Rwanda 2019 izatangira   tariki 24 Gashyantare isozwe 03 Werurwe 2019.

Amakipe akaba yarahise aba 17 ari yo Astana Pro Team (Kazakhstan), Direct Energie, Delko Marseille (France),Team Novo Nordisk (USA), Dimension Data for Qhubeka, Pro Touch Team (Afurika y’Epfo), Bai Sicasal Petro de Luanda (Angola), Interpro Stradalli (Ubuyapani), Israel Cycling Academy (Israel) na Benediction Cycling Team (Rwanda). Hari kandi amakipe y’ibihugu arimo  u Rwanda, Algeria, Cameroun, Ethiopia, Kenya, Eritrea n’ikipe y’Ubufaransa y’abatarengeje imyaka 23.

Nyuma yo kwemererwa kwitabira Tour du Rwanda 2019, ushinzwe amakuru  mu ikipe ya Israel CA, Tsadok Yecheskel yatangarije Imvaho Nshya  ko byabashimishije cyane kandi ubwo baheruka bakunze uko bakiriwe mu Rwanda ndetse n’uko irushanwa ryagenze muri rusange.

Ati “Twishimiye kugaruka mu Rwanda, Tour du Rwanda ni rimwe mu marushanwa yatumye tuzamura urwego rwacu mu mukino wo gusiganwa ku magare kandi ntabwo twakibagirwa uko twakiriwe  n’abakunzi b’uyu mukino mu Rwanda”.

Tsadok Yecheskel atangaza ko biteguye cyane kandi bafite ikipe nziza. Ati “Tuzazana ikipe ikomeye kandi turizera ko hari icyo tuzerekana mu isiganwa. Ikipe yacu yagiye itera imbere nyuma y’isiganwa yitabiriye mu Rwanda muri 2016 kuko twitabiriye  amarushanwa  akomeye nka Giro d’Italia n’ayandi”.

Abakinnyi Israel CA izakinisha muri  Tour du Rwanda 2019

Iyi kipe izaba igizwe n’abakinnyi 5 barimo  Omer Goldstein  ukomoka muri Israel akaba afite imyaka 22. Hari Edwin Avila  ukomoka muri Colombia akaba afite imyaka  29. Aba bombi bakaba bari kumwe n’iyi kipe muri Tour du Rwanda 2016. Edwin Avila   mu ntera ya 3 (Rubavu-Musanze) yasoje ku mwanya wa 3 naho intera 5 (Nyamata-Rwamagana) aba uwa 2.

Abandi bakinnyi hari Matteo Badilatti  ukomoka mu Busuwisi akaba afite imyaka 26,  Awet Gebremedhin akomoka muri Eritrea ariko afite ubwenegihugu bwa Suwede na  Daniel Turek  ukomoka muri Czech Republic akaba afite imyaka  25.

Iyi kipe izaba itozwa  Kjell Carlstrom ukomoka muri Finland nawe akaba yarabaye umukinnyi w’umukino wo gusiganwa ku magare nk’uwabigize umwuga.  Muri 2016 iyi kipe yari yazanye n’umutoza, Ran Margaliot nawe wakinnye uyu mukino akagira n’uruhare mu kuyishinga.

Iyi kipe yashinzwe muri 2015, muri Tour du Rwanda 2016 yazanye abakinnyi 5 barimo Goldstein Roy, Goldshtein Omer na Hadari Zohar (Israel), Boivin Guillaume  (Canada) na Pavlic Marko (Slovakia). Boivin Guillaume yegukanye intera ya mbere ya Kigali-Ngoma naho muri rusange asoza ku mwanya wa 42 mu gihe uwaje hafi ari Omer Goldstein wasoje ari uwa 38 naho  ikipe muri rusange isoza ku mwanya wa 12.

Awet Gebremedhin

Daniel Turek

Matteo Badilatti

Omer Goldstein

Edwin Avila

TANGA IGITEKEREZO

Leave a Reply

Your email address will not be published. Required fields are marked *