Amagare:  Ikipe ya Benediction igiye kwitabira isiganwa muri Senegal

Yanditswe na Bugingo Fidèle

Ku ya 08-11-2019 saa 09:29:54
Abakinnyi ba Benediction Excel Energy bari kumwe n'umutoza, Sempoma Felix (iburyo) mbere yo guhaguruka mu Rwanda berekeza muri Senegal

Ikipe ya Benediction Excel Energy mu mukino wo gusiganwa ku magare mu ijoro ryo ku wa Kane tariki 07 rishyira uyu munsi tariki 08 Ugushyingo 2019 ni bwo yahagurutse mu Rwanda yerekeza i Dakar muri Senegal aho yagiye  kwitabira isiganwa mpuzamahanga “Tour du Senegal 2019”.

Iri siganwa biteganyijwe ko rizatangira tariki 10 risozwa tariki 17 Ugushyingo 2019 rizaba rigizwe n’intera 8 rikaba riri ku kigero cya 2.2.

Abakinnyi 5 b’ikipe ya Benediction Excel Energy ni bo bazakina iri siganwa ari bo Byukusenge Patrick, Nzafashwanayo Jean Claude, Manizabayo Eric, Munyaneza Didier na Nkurunziza Yves .

Iyi kipe yajyanye n’umutoza Sempoma Felix, umukanishi  Karasira Theoneste na Uwamungu Innocent  nk’ushinzwe kunanura imitsi abakinnyi.

Mbere y’uko iyi kipe ihaguruka mu Rwanda yerekeza muri Senegal, umutoza Sempoma Felix yatangaje ko iri rushanwa bifuje kuryitabira kuko rizatanga amanota azatuma ikipe izamuka ku rundi rwego.

Yagize ati: “Ubu ikipe yacu iri ku mwanya wa 3, turifuza kuzitwara neza kugira ngo tube twakwigira imbere nko ku mwanya wa 2 kuko amakipe 3 ya mbere muri Afurika aba yemerewe gukina amarushanwa yose akomeye mpuzamahanga.”

Sempoma avuga ko iri siganwa ryo muri Senegal ari ahantu hatambitse nta musozi. Akomeza avuga ko baganirije abakinnyi uburyo bazakina kandi bamaze imisi bitabira amasiganwa y’ahantu hatambitse nk’aha. Yagize ati: “Amasiganwa y’ahantu hatambitse abakinnyi bacu bamaze kuyamenyera ni ukuzakora ibishoboka byose tukitwara neza.”

Kapiteni w’ikipe ya Benediction Excel Energy, Byukusenga Patrick, yatangaje ko intego bajyanye muri Senegal ari ugutsinda. Yagize ati: “Si ubwa mbere ngiye kwitabira iri siganwa n’umwaka ushize nagiyeyo urumva ko mpamenyereye, ni ahantu hatambitse hari n’umuyaga mwinshi ariko abakinnyi tujyanye ndabizeye  kandi twari tuvuye no mu masiganwa y’ahantu hatambitse, turiteguye rero nta kibazo kandi turizera kuzegukana insinzi.”

Muri 2005 ni bwo iyi kipe yashinzwe, mu mpera za 2018 yagiye ku rwego rw’ikipe y’ababigize umwuga ku rwego mpuzamahanga.  Iri siganwa rya “Tour du Senegal 2019”  ni irya 4 igiye kwitabira muri uyu mwaka wa 2019 nyuma Tour du Rwanda 2019,  isiganwa  ryabereye muri Afurika y’Epfo “Tour de Limpopo 2019” ndetse na  “Tour cycliste international de la RDC 2019” ryegukanwe na Nzafashwanayo Jean Claude.

Umwanditsi:

Bugingo Fidèle

Tanga Igitekerezo

Email yanyu ntigaragazwa ku rubuga. Amazina na Email ni ngombwa.