22°C , Mostly cloudy with thunderstorms | Kigali-Rwanda
Munyaneza Didier ubwo yegukanaga intera ya mbere ya Rwanda Cycling Cup 2018 (Foto FERWACY)

Amagare: Hagiye kuba intera ya kabiri ya “Rwanda Cycling Cup 2018”

Yanditswe na BUGINGO FIDELE

Ku ya 17-05-2018 saa 07:28:20

Mu mpera z’iki cyumweru tariki 19 Gicurasi 2018 hazaba intera ya kabiri ya Rwanda Cycling Cup 2018. Iyi ntera “Farmer’s Circuit” izava mu Karere ka Kayonza mu Ntara y’Iburasirazuba isorezwe i Muhanga  mu Ntara y’Amajyepfo.

Munyaneza Didier ubwo yegukanaga intera ya mbere ya Rwanda Cycling Cup 2018 (Foto FERWACY)

Nk’uko bisanzwe, iri siganwa rizitabirwa n’abakinnyi bo mu makipe 8 abarizwa muri FERWACY aho bazasiganwa mu byiciro bitatu bitandukanye birimo ikiciro cy’abakobwa (Women Elite), ingimbi (Junior men) hamwe n’abakuru n’abatarengeje imyaka 23 (Elite men & U-23).

Amakipe azasiganwa ni Fly Cycling Club, Cycling Club For All, Muhazi Cycling Generation, Cine Elmay, Les Amis Sportifs y’i Rwamagana, Benediction Club y’i Rubavu, Karongi Vision Sport Center, Nyabihu Cycling Team  na  Kigali Cycling Club.

Mu kiciro  cy’abakuru n’abatarengeje imyaka 23  (Elite & U23) bazahagurukira  i Kayonza saa tatu za mu gitondo (9h00) na ho abakobwa n’ingimbi bahagurukire i Ntunga  (09h00).

Rwanda Cycling Cup 2018 yatangiye tariki 24 Werurwe 2018 hakinwa intera ya mbere yitiriwe kwibuka  Byemayire Lambert umwe mu bashinze ikipe ya CCA y’i Huye akaba yari  Visi Perezida  wa FERWACY  akaza gupfa muri 2016.

Iyi ntera yegukanywe na Munyaneza Didier   ukinira ikipe ya Benediction Club y’i Rubavu mu kiciro cy’abakuru n’abatarengeje imyaka 23. Mu kiciro cy’abakobwa, Irakoze Neza Violette ukinira Muhazi Cycling  ni we wegukanye umwanya wa mbere na ho mu ngimbi, irushanwa ryegukanwa na Nzafashwanayo Jean  Claude.

Aganira n’Imvaho Nshya, Munyaneza Didier atangaza ko yiteguye kongera kwigaragaza. Ati “Ubu mvuye mu myitozo y’amasaha 7, meze neza ndumva nzakora uko nshoboye nkongera  nkitwara neza byanakunda iyi ntera nayo nkayegukana”.

Iri siganwa ritegurwa n’ishyirahamwe ry’umukino wo gusiganwa ku magare mu Rwanda “FERWACY” ku nkunga ya COGEBANQUE na SKOL ari na bo batanga ibihembo ku bakinnyi bitwaye neza.

 

TANGA IGITEKEREZO

Leave a Reply

Be the First to Comment!

avatar