16°C , Partly cloudy | Kigali-Rwanda
Ghebreigzabhier Amanuel (hagati) wegukanye shampiyona y’Afurika, yakurikiwe na Eyob Metkel (ibumoso) na Lagab Azzedine (iburyo)

Amagare: Ghebreigzabhier Amanuel ni we wegukanye shampiyona y’Afurika

Yanditswe na BUGINGO FIDELE

Ku ya 19-02-2018 saa 08:30:23

Abahungu bakuru (156 km)

1.Ghebreigzabhier  Amanuel 03h56’29”

2. Eyob Metkel 03h58’22’

3. Lagab Azzedine 03h58’22”

Abahungu U-23 (156 km)

1.Areruya Joseph 03h58’35”

2.Mulueberhan Henok 03h58’35”

3. Munyaneza Didier 03h58’37”

Umukinnyi  Ghebreigzabhier  Amanuel  ukomoka muri Eritrea akaba  akinira ikipe ya Dimension Data for Qhubeka ni we wegukanye shampiyona y’Afurika mu mukino wo gusiganwa ku magare “African Continental Cycling Championships 2018” yari ibaye ku nshuro ya 13.

Ghebreigzabhier Amanuel (hagati) wegukanye shampiyona y’Afurika, yakurikiwe na Eyob Metkel (ibumoso) na Lagab Azzedine (iburyo)

Iri rushanwa ryatangiye tariki 14 Gashyantare 2018 ryasojwe  ejo hashize tariki 18 Gashyantare 2018 ahakinwaga isiganwa ryo mu muhanda “Road race” mu kiciro cy’abahungu bakuru n’abatarengeje imyaka 23 “Men Elite &U-23”.

Abakinnyi 114 baturutse mu bihugu 20 ni bo batangiye isiganwa aho bakoresheje inzira iva  kuri Sitade Amahoro-Kimironko-Kibagabaga-Nyarutarama-RDB-Airtel bakagaruka kuri Sitade Amahoro ahari intera y’ibilometero 12.

Iyi ntera aba bakinnyi bagomba kuyizengurukamo inshuro 14 bagasoza bakoze ibilometero 156. Mu bakinnyi 114 batangiye isiganwa hasoje 31 bayobowe na  Ghebreigzabhier  Amanuel  wo muri Eritrea wakoresheje amasaha 3, iminota 56 n’amasegonda 29 akaba  yarakurikiwe na Eyob Metkel  nawe ukomoka muri Eritrea wakoresheje  amasaha 3, iminota 58 n’amasegonda 22 akaba yaragereye rimwe  na  Lagab Azzedine   w’imyaka 31 akaba akomoka muri  Algeria.

Areruya  na Munyaneza begukanye imidali mu batarengeje imyaka 23

Areruya Joseph uherutse kwegukana “La Tropicale Amissa Bongo 2018” ndetse n’irushanwa ry’Afurika  ry’abatarengeje imyaka 23  yasoje ku mwanya wa 6 muri rusange ariko aza ari uwa mbere mu batarengeje imyaka 23 bituma yegukana umudali  wa zahabu.Yakurikiwe na Mulueberhan Henok ukomoka muri Eritrea  naho ku mwanya wa 3 haza Munyaneza Didier.

Areruya Joseph (Hagati) wegukanye umudali wazahabu mu batarengeje imyaka 23, akurikirwa na Mulueberhan Henok (ibumoso) naho Munyaneza Didier (iburyo) yegukana umwanya wa 3

Ibi bivuze ko uyu munsi wa nyuma u Rwanda rwegukanye imidali ibiri mu batarengeje imyaka 23, Eritrea yegukana 3  naho Algeria yegukana umudali umwe.

Mu bakinnyi batasoje isiganwa harimo abakinnyi 3 b’u Rwanda bari bitezweho kwitwara neza ari bo Ndayisenga Valens wegukanye  Tour du Rwanda 2014 na 2016, Nsengimana Jean Bosco wegukanye Tour du Rwanda 2015 ndetse na Niyonshuti Adrien, umwe mu bakinnyi batangiranye n’ikipe y’igihugu y’umukino w’amagare akaba yari amaze imyaka igera ku 9 muri Dimension Data for Qhubeka.

Eritrea ni yo yegukanye imidali myinshi

Muri iyi shampiyona y’Afurika, Eritrea ni yo yegukanye imidali myinshi 20 irimo 10 ya zahabu, Feza (5) na Bronze (5). Ethiopia  yatwaye imidali 13  harimo 3 ya zahabu, Feza (7) na Bronze (3), u Rwanda rwegukanye ibidali 10 harimo 3 ya zahabu, Feza (4) na Bronze (3).

Ibindi bihugu byegukanye imidali ni Algeria  yegukanye ibiri ya Bronze, u Burundi bwegukana umwe na Namibia yegukana umwe. Shampiyona y’Afurika umwaka utaha wa 2019 izabera Asmara muri Eritrea.

 

 

TANGA IGITEKEREZO

Leave a Reply

Your email address will not be published. Required fields are marked *