18°C , Partly sunny | Kigali-Rwanda

Amagare: Benediction yabonye umuterankunga mushya uzatanga miriyoni zisaga 40

Yanditswe na BUGINGO FIDELE

Ku ya 16-01-2020 saa 07:39:01
Sempoma Felix watangije ikipe ya Benediction akaba ari n'umutoza yemeza ko umuterankunga mushya azabafasha kugera ku ntego zabo

Ikipe ya Benediction mu mukino wo gusiganwa ku magare  yashinzwe muri 2005 kuva mu mpera za 2018 yagiye mu kiciro  cy’amakipe y’ababigize umwuga  ku rwego mpuzamahanga “UCI Continental Team”.

Umwaka wa 2019 iyi kipe yashatse abaterankunga batandukanye  aho yahise ifata izina ry’umuterankunga mukuru “Excel Energy” iba Benediction Excel Energy. Ubwo umwaka wa 2019 warangiraga, Sempoma Felix washinze iyi kipe akaba n’umutoza wayo yatangarije Imvaho Nshya  ko mu mwaka wa 2020 bazashakisha undi muterankunga bityo n’izina ry’ikipe rigahinduka nk’uko bisanzwe bikorwa kuko buri mwaka bandikisha ikipe mu ishyirahamwe ry’umukino wo gusiganwa ku magare ku Isi “UCI”.

Tariki 14 Mutarama 2020 ni bwo byatangajwe ku mugaragaro ko ikipe ya Benediction isanzwe ibarizwa mu Karere ka Rubavu  izakorana n’umunterankunga mushya  “Ignite Power”. Iyi akaba ari kampani mpuzamahanga yo muri Amerika  ikora ibijyanye no gukwirakwiza ingufu zituruka ku mirasire y’izuba mu bihugu bitandukanye  muri Afurika birimo n’u Rwanda.

Uyu muterankunga azajya agenera ikipe ya Benediction miriyoni zisaga 40 z’amafaranga y’u Rwanda ku mwaka, akazajya agaragara ku mwambaro w’iyi kipe  nk’umuterankunga mukuru.

Iyi kipe Benediction yakinnye umwaka wayo wa mbere wa 2019 yitwa Benediction Excel Energy muri uyu mwaka wa 2020 izaba yitwa Benediction Ignite Team. Sempoma yatangaje ko ubu bamaze kohereza ibisabwa byose muri UCI banabamenyesha ko bahinduye izina  bakaba bategereje uruhushya “Licence”.

Gusa iyi kipe izakomeza n’abandi baterankunga yari isanganwe barimo Inyange,   Ridley, G-Skin, Vittoria, 100% n’abandi.

Umwe mu bayobozi  ba Ignite Power, Peter Feinberg yatangaje ko bishimiye gufatanya n’ikipe ya Benediction. Yagize ati: “Ibikorwa by’ikipe n’abakinnyi  birerekana ko  gukora cyane, kugira umuhate n’imyitwarire myiza bituma hari byinshi bishoboka. Ibi rero  ni zo ndangagaciro zacu nka Ignite Power, gufatanya  rero  ni ibintu byiza kuri twese”.

Yakomeje avuga ko umukino wo gusiganwa ku magare mu Rwanda umaze gukundwa cyane aho abaturage benshi bawukurikirana. Ati: “Iyi mikoranire izatuma tugera ku baturage benshi.”

Umutoza w’ikipe ya Benediction, Sempoma Felix yatangaje ko ubu bufatanye buzabafasha kugera ku ntego zabo zo kwitabira amarushanwa menshi yaba ay’imbere mu gihugu ndetse n’ayo hanze y’igihugu. Hari kandi gutegura amarushanwa yo gushaka abana bafite impano kugira ngo bafashwe kuzamura urwego rwabo.

Abakinnyi 10 Benediction izakoresha mu mwaka wa 2020

Muri aba bakinnyi  nta bwo harimo Nsengimana Jean Bosco wegukanye Tour du Rwanda 2015  na Uwizeyimana Bonaventure utakibarizwa mu Rwanda.

Abakinnyi iyi kipe izakoresha harimo 8 bakomoka mu Rwanda ari bo Byukusenge Patrick, Uhiriwe Byiza Renus, Munyaneza Didier, Nzafashwanayo Jean Claude, Nkurunziza Yves, Manizabayo Eric, Rugamba Janvier  na Uwiduhaye. Abandi bakinnyi babiri bakomoka muri RDC ari bo Tshiana Kamena Loick na Ishara Kinanira Daniel.

Umusaruro wa Benediction muri 2019

Muri 2019, ikipe ya Benediction  yitabiriye «Tour du Rwanda 2019», «Tour de Limpopo 2019 » muri Afurika y’Epfo, “Tour cycliste international de la RDC 2019”. ryegukanwe na Nzafashwanayo Jean Claude ndetse Tour du Senegal 2019 ryegukanwe na Munyaneza Didier.

Muri 2020 iyi kipe izatangirira kuri Tour du Rwanda 2020 initabire n’andi marushanwa  mpuzamaganga atandukanye hanze y’u Rwanda.

Byukusenge Patrick

Manizabayo Eric

Munyaneza Didier

Nkurunziza Yves

Nzafashwanayo Jean Claude

Rugamba Janvier

Uwiduhaye

Uhiriwe Byiza Renus

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.