19°C , Mostly cloudy | Kigali-Rwanda
Areruya Joseph ubwo yitabiraga Paris Roubaix, isiganwa ry'umunsi umwe rikomeye ku mugabane w'u Burayi

Amagare: Areruya Joseph yakoze amateka ku mugabane w’u Burayi

Yanditswe na BUGINGO FIDELE

Ku ya 15-04-2019 saa 17:17:12

Tariki 14 Mata 2019 ni bwo mu Bufaransa habaye irushanwa mpuzamahanga ry’umunsi umwe “ Paris-Roubaix 2019” ryitabirwa n’amakipe akomeye   ku Isi  yose.

Iri siganwa riri mu marushanwa yo ku  rwego rwo hejuru “UCI World Tour” ryatangiriye mu majyaruguru y’umujyi wa Paris risorezwa ahitwa Roubaix ku mupaka w’u Bufaransa n’u Bubiligi ahari intera ya kilometero 257.

Amakipe 25  yitabiriye iri siganwa arimo  18  yo ku rwego hejuru “UCI WorldTeams” n’andi 7 y’ababigize umwuga  “UCI Professional Continental teams” arimo n’ikipe ya Delko Marseille yo mu Bufaransa ikinamo umukinnyi w’umunyarwanda, Areruya Joseph.

Areruya Joseph akaba yarakoze amateka yo kuba umukinnyi ukomoka muri Afurika yo munsi y’ubutayu bwa Sahara  wa mbere witabiriye iri siganwa rikomeye ku mugabane w’u Burayi nk’uko byanavuzwe cyane  na mbere y’iri siganwa.

Uyu mukinnyi  ufite imyaka 23 y’amavuko  yabashije gusoza iri rushanwa ariko aza inyuma ho iminota irenga 40 ku mukinnyi wabaye uwa mbere ntiyabasha  kujya ku rutonde ry’abakinnyi 100 babashije guhabwa ibihe.

Gilbert Philippe ukomoka mu Bubiligi akaba akinira ikipe ya Deceuninck-Quick Step mu Bubiligi ni we wegukanye iri siganwa aho yakoresheje amasaha 5, iminota 58 n’amasegonda 2. Yakurikiwe na  Nils Politt, umudage ukinira ikipe ya Katusha-Alpecin yo mu Busuwisi (5h58’02”) naho ku mwanya wa 3 haza Yves Lampaert   ukomoka mu Bubiligi nawe akaba akinira  ikipe ya  Deceuninck-Quick Step (5h58’15”).

Mu bakinnyi 175 batangiye isiganwa, 100 ni bo basoje bahabwa n’ibihe bakoresheje  aho ku mwanya wa 100 hasoreje Fortin Filippo ukomoka mu butaliyani  akaba akinira ikipe ya Cofidis mu Bufaransa  waje nyuma y’iminota 27 uwa mbere ahageze.

Kuri aba 100 hiyongereyeho 10 babashije gusoza  barimo   na Areruya Joseph ariko bakoresheje iminota irenze iyagenwe  naho abandi 65  bakaba batarageze ku murongo usoza.

Areruya yishimiye uko yitwaye

Areruya Joseph aganira n’Imvaho Nshya nyuma y’iri siganwa yavuze ko ryari isiganwa rikomeye  uretse n’aho rinyura ryarimo n’abakinnyi bakomeye. Akomeza avuga ko yagize ikibazo cyo gukora impanuka inshuro 2 mu bilometero 101 mbere yo gusoza.

Ati “Nta bwo  irushanwa ryari ryoroshye  kuko numvaga nta kizere mfite cyo kurisoza ariko nashatse kwereka amahanga ko n’Umunyarwanda w’umwirabura yabasha kunyonga igare  akaba yanasoza kuko hari abatarasoje kandi bakina no mu makipe akomeye i Burayi.”

Yakomeje agira ati “Naravuze nti n’iyo nahagera bansiga iminota 100 ariko ngere ku murongo bavuge bati umunyarwanda arahageze.”

Areruya Joseph uyu ni umwaka wa kabiri arimo gukinira ikipe ya  Delko Marseille  nyuma yo kugeramo muri 2018 avuye muri Dimension Data For Qhubeka yakiniye umwaka umwe (2017).

Kuri ubu ni we ufite igihembo cy’umukinnyi w’umwaka wa 2018 muri Afurika  yegukanye nyuma yo kwitwara neza  muri 2018 aho yegukanye La Tropicale Amissa Bongo 2018 ndetse n’irushanwa ry’Afurika mu batarengeje imyaka 23 naryo ryabaye mu 2018 binahesha u Rwanda guhagararira Afurika muri Tour de France U-23.

Areruya Joseph (ibumoso) ari kumwe n’abakinnyi bagenzi be bakinana muri Delko Marseille

Areruya Joseph ubwo yitabiraga Paris Roubaix, isiganwa ry’umunsi umwe rikomeye ku mugabane w’u Burayi

Areruya ubwo yakoraga impanuka habura ibilometero 101

TANGA IGITEKEREZO

Leave a Reply

Your email address will not be published. Required fields are marked *