21°C , Partly sunny | Kigali-Rwanda
Nkurunziza Yves, umwe mu bakinnyi bazaserukira u Rwanda mu irushanwa ry'abatarengeje imyaka 23 muri Afurika

Amagare: Abazaserukira u Rwanda mu irushanwa ry’Afurika mu bato baramenyekanye

Yanditswe na BUGINGO FIDELE

Ku ya 12-01-2019 saa 10:28:11

Tariki 04-02-2019

Douala-Douala (18.6 km)

Tariki 05-02-2019

Douala-Douala (102.3 km)

Tariki 06-02-2019

Nkongsamba-Dschang (68.3 km)

Tariki 08-02-2019

Ngoulemakong-Yaoundé (111.1 km)

Tariki 09-02-2019

Yaoundé-Yaoundé (103.4k)

Tariki 04 kugeza 09 Gashyantare 2019 muri Cameroun hazabera irushanwa rihuza  amakipe y’ibihugu  mu batarengeje imyaka 23  Tour de l’espoir 2019 »  akaba ari  inshuro ya  kabiri rigiye  kuba nyuma y’iryabaye ku nshuro ya mbere umwaka ushize wa 2018.

Ikipe yegukanye iri rushanwa ikaba ibona itike yo guserukira Afurika mu irushanwa ry’abatarengeje imyaka 23 mu Bufaransa “Tour de France U-23”.

Abategura iri rushanwa “Vivendi Sports” nyuma yo gushyira ahagaragara  inzira iri siganwa rizanyuramo, banatangaje amwe mu makipe y’ibihugu yamaze kwemeza kuzitabira. Iri risiganwa rizaba rigizwe n’intera 5 aho abasiganwa bazasoza bakoze kilometero 400.

Umuyobozi wa Vivendi Sports, Robins Tchale-Watchou  atangaza ko imyiteguro irimo kugenda neza kandi bizera ko iri rushanwa rizarushaho kugenda neza ugereranyije n’umwaka ushize wa 2018.

Phillipe Colliou uzaba uyoboye iri siganwa (Directeur de Course) we atangaza  ko ubushize hitabiriye amakipe y’ibihugu muri Afurika ariko uyu mwaka hazanitabira  amakipe  yo hanze y’Afurika. Yakomeje avuga ko iri rushanwa ari ryiza  kuko rihuza abakinnyi bakomeye mu kiciro cy’abatarengeje imyaka 23  bikabafasha kuzamura urwego rwabo.

Ati “Ni amahirwe y’abakinnyi bakiri bato kuko rituma bazamura urwego rw’imikinire kandi bikabaha amahirwe yo kujya ku rwego rw’abakinnyi babigize umwuga.”

Nk’uko bitangazwa n’abategura iri siganwa uyu mwaka wa 2019 hazitabira amakipe 19  arimo 14 yo muri Afurika n’andi 6 yo hanze y’Afurika arimo ay’i Burayi, Amerika no muri Aziya.

Amakipe amaze kwemeza ko azitabira ni Algeria, Benin, Burkina Faso, Cameroun, Cote d’Ivoire, Eritrea, Kenya, Maroc, Ethiopia, Mauritius, Nigeria, Tunizia, Rwanda n’ikipe y’abakinnyi banze bo muri Afurika (Equipe Mixte Afrique).

Hari kandi n’amakipe yo hanze y’Afurika arimo Argentine, Equateur (Amerika), Portugal, UC Monaco (u Burayi) n’u Buyapani (Azia).

Abakinnyi bazaserukira u Rwanda

Irushanwa riheruka muri 2018 ryabaye tariki 31 Mutarama kugeza 04 Gashyantare 2018 ryegukanwe na Areruya Joseph bihesha u Rwanda itike yo guhagararira Afurika muri  Tour de France U-23   tariki  17 kugeza 26 Kanama 2018.

Muri uyu mwaka wa 2019 nk’uko tubikesha ishyirahamwe ry’umukino wo gusiganwa ku magare mu Rwanda “FERWACY”,  abakinnyi 6 bazaserukira u Rwanda  bamaze gutangazwa. Aba barimo Manizabayo Eric  ukinira ikipe ya Benediction, Hakiruwizeye Samuel ukinira CCA bombi bitabiriye irushanwa ryabereye mu Bufaransa. Hari kandi  Nkurunziza Yves, Nzafashwanayo Jean Claude  bakinira Benediction Club, Ruberwa  Jean Damascene ukinira Nyabihu CT akaba yaranitabiriye iry’umwaka ushize wa 2018 na  Mugisha Moise ukinira Fly.

Iyi kipe izaba iri kumwe n’umutoza, Byukusenge Nathan, Ruvogera Obed ushinzwe kunanura imitsi abakinnyi na Maniriho Eric usanzwe ari umukanishi.

Ikipe izitwara  neza ikegukana iri siganwa izabona itike yo kuzahagararira Afurika muri Tour de France U-23,  irushanwa rizaba tariki 15 kugeza 25 Kanama 2019.

Nkurunziza Yves, umwe mu bakinnyi bazaserukira u Rwanda mu irushanwa ry’abatarengeje imyaka 23 muri Afurika

 

TANGA IGITEKEREZO

Leave a Reply

Your email address will not be published. Required fields are marked *