19°C , Partly sunny | Kigali-Rwanda

Amagare: Abakinnyi b’u Rwanda biteguye kwitwara neza muri shampiyona y’Afurika

Yanditswe na BUGINGO FIDELE

Ku ya 13-02-2018 saa 07:25:27

Abakinnyi bazahagararira u Rwanda muri shampiyona y’Afurika mu mukino wo gusiganwa ku magare “African Continental Cycling Championships 2018”   baratangaza ko biteguye kwitwara neza bagahesha ishema u Rwanda.

Shampiyona y’Afurika igiye kubera mu Rwanda ku nshuro ya kabiri iratangira uyu munsi tariki 13 Gashyantare 2018 gusa  amarushanwa nyiri izina azatangira ejo tariki 14 Gashyantare nyuma asozwe tariki 18 Gashyantare 2018.

Abakinnyi bazahagararira u Rwanda mu kiciro cy’abagabo (Men Elite). Uhereye ibumoso ni Nsengimana Jean Bosco, Byukusenge Patrick, Niyonshuti Adrien, Ndayisenga Valens na Uwizeye Jean Claude

Abakinnyi bazaserukira u Rwanda

Abakinnyi 20 ni bo bazaserukira u Rwanda muri iyi  shampiyona y’Afurika aho bari mu byiciro bitandukanye.

Mu bakobwa hari abakinnyi 4 b’abangavu (Women Junior) ari bo Mushimiyimana Samantha, Irakoze Neza Violette, Nzayisenga Valentine na   Manishimwe Jeannette. Mu bakobwa bakuru n’abatarengeje imyaka 23  (Women Elite &U-23) hari Ingabire Beathe, Girubuntu Jeanne d’arc, Manizabayo Magnifique na Tuyishimire Jacqueline.

Mu kiciro cy’abagabo, mu ngimbi “Men Junior”   hari  Habimana Jean Eric, Nkurunziza Yves, Gahemba Barnabé na Nzafashwanayo Jean Claude. Mu bakuru n’abatarengeje imyaka 23 “Men Elite &U-23” hari Nsengimana Bosco, Byukusenge Patrick, Uwizeye Jean Claude, Ndayisenga Valens,  Niyonshuti Adrien, Areruya Joseph, Mugisha  Samuel  na Munyaneza Didier.

Ibihugu 22 ni byo byemeje kwitabira

Ibi bihugu birimo u Rwanda, Algeria, Afurika y’Epfo, Ethiopia, Nigeria, Swaziland, Seychelles, Eritrea, Namibia, Djibouti, Ile Maurice, Benin, Kenya, Burkina Faso, Ghana, Zambia, Sudan, Uganda, RDC, Maroc, Misiri  n’u Burundi.

Muri rusange abakinnyi bose hamwe ni 167 harimo abagabo 122 n’abagore 45. Gusa uyu munsi tariki 13 Gashyantare 2018 haraba inama y’abayobozi b’amakipe kugira ngo harebwe amakipe ahari ndetse n’abakinnyi.

Uko irushanwa rizagenda

Tariki 14 Gashyantare 2018, hazabaho gusiganwa n’igihe nk’ikipe « Team Time Trial »  mu bangavu n’ingimbi  aho bazasiganwa ibilometero 18,6  nyuma hakine  abakobwa bakuru n’abatarengeje imyaka 23 “Women Elite &U-23”  ndetse n’abahungu  bakuru n’abatarengeje imyaka 23 “Men Elite &U-23” aho bazasiganwa intera y’ibilometero 40 mu nzira ya Kicukiro-Nyamata-Kicukiro.

Irushanwa rizakomeza tariki 15 Gashyantare 2018  ahakinwa gusiganwa n’igihe ariko umukinnyi ku giti ke “Individual Time trial”, hazakina  abangavu n’ingimbi  bazakora ibilometero 18,6 naho  abakobwa bakuru n’abatarengeje imyaka 23 ndetse n’abahungu bakuru n’abatarengeje imyaka 23  basiganwa intera y’ibilometero 40.

Tariki 16 Gashyantare 2018 hazaba inama ya tekinike ari nayo izemeza umubare w’abakinnyi mu byiciro byose bazakina amasiganwa yo mu muhanda “Road race”.

Tariki 17 Gashyantare 2018  hazakinwa isiganwa ryo mu muhanda “Road race” mu ntera y’ibilometero 12 yo kuva Sitade Amahoro-Kimironko-Kibagabaga-Nyarutarama-RDB-Airtel-Sitade Amahoro. Ingimbi “Men Junior” bazahazenguruka inshuro 6 (72 km) naho abangavu (Women Junior) bahazenguruke inshuro 5 (60 km) naho abakobwa bakuru n’abatarengeje imyaka 23 bazahazenguruke inshuro 7 (84 km).

Mu gusoza, tariki 18 Gashyantare 2018, mu bagabo n’abaterengeje imyaka 23 bazazenguruka inshuro 14 (168 km).

TANGA IGITEKEREZO

Leave a Reply

Be the First to Comment!

avatar