26°C , Partly sunny | Kigali-Rwanda

Amagare: Abakinnyi b’u Rwanda basabwe kwitwara neza muri shampiyona y’Afurika

Yanditswe na BUGINGO FIDELE

Ku ya 08-02-2018 saa 08:34:29

Minisitiri w’Umuco na Siporo, Uwacu Julienne   yasabye abakinnyi b’u Rwanda kwitwara neza muri shampiyona y’Afurika.

Tariki 06 Gashyantare 2018, Minisitiri Uwacu  ari kumwe n’abayobozi batandukanye mu nzego nkuru za siporo mu Rwanda nka Komite Olempike ndetse n’ishyirahamwe ry’umukino wo gusiganwa ku magare “FERWACY”  bakiriye ikipe y’u Rwanda yegukanye isiganwa ry’Afurika ry’abatarengeje imyaka 23 ryabeye muri Cameroun kuva tariki 31 Mutarama kugeza 04 Gashyantare 2018.

Abakinnyi b’u Rwanda basabwe kuzitwara neza muri shampiyona y’Afurika

Uyu muhango wabereye muri Golden Tulip La Palisse Hotel i Nyamata mu Karere ka Bugesera aho hari n’abakinnyi  bose bazaserukira u Rwanda muri shampiyona y’Afurika izabera mu Rwanda kuva tariki 13-18 Gashyantare 2018.

Minisitiri Uwacu yashimiye abakinnyi muri rusange nyuma yo kwegukana amarushanwa atatu akomeye   arimo Tour du Rwanda 2017 yabaye mu Gushyingo 2017, La Tropicale Amissa Bongo 2018 yabaye muri Mutarama 2018 n’iri rushanwa ry’abatarengeje imyaka 23, aya marushanwa yose akaba yaregukanwe na Areruya Joseph.

Uwacu yavuze ko ibi byerekena intambwe nziza umukino wo gusiganwa ku magare umaze gutera ugereranyije n’imyaka 10 ishize. Gusa avuga ko hakiri byinshi byo gukora. Ati Hari  amarushanwa akomeye ku rwego rw’isi  tutarakina, ni uguharanira kuhagera kandi byose birashoboka”.

Aha ni ho yasabye abakinnyi bazahagararira u Rwanda muri shampiyona y’Afurika kwitwara neza bakegukana insinzi.

Perezida w’ishyirahamwe ry’umukino wo gusiganwa ku magare mu Rwanda  “FERWACY”, Bayingana Aimable   wari wajyanye n’ikipe y’u Rwanda muri Cameroun yagaragaje ko ikintu cyahindutse cyatumye muri iyi minsi ikipe y’u Rwanda  itsinda ari uko basigaye bakina kinyamwuga. Ati Ubu abakinnyi bacu  basigaye bakina kinyamwuga ari byo byaburaga mu gihe cyashize, abakinnyi  b’ahandi bakadutsinda kandi twari dufite amahirwe n’ubushobozi bwo  gutsinda.”

Abakinnyi b’u Rwanda ntibarabona ishimwe ryabo

Kuva kuri Tour du Rwanda 2017, La Tropicale Amissa Bongo 2018 n’iri rushanwa ry’Afurika ry’abatarengeje imyaka 23, abakinnyi b’ikipe y’u Rwanda ntabwo barahabwa ishimwe bemerewe na Misiteri y’Umuco na Siporo “MINISPOC”.

Areruya Joseph wegukanye aya marushanwa yose yavuze ko nabo bishimiye intambwe nk’abakinnyi b’u Rwanda bamaze gutera kuko batagitinya. Gusa avuga ko ubusanzwe nta mushahara bagira bityo rero baba bakeneye ko ibyo bakiniye babihabwa kugira ngo bibafashe mu buzima busanzwe.

Minisitiri Uwacu Julienne kuri iki kibazo yagize ati Kugeza ubu nta kibazo kidasanzwe, agahimbazamusyi gatangwa iyo irushanwa rirangiye, dufite uburyo dukora  kandi iyo duteganyije irushanwa duteganya gutsinda ku buryo abitwaye neza bashimirwa, birimo gukorwa kandi bizarangira vuba”.

Bitewe n’isiganwa urwego ruriho, buri mukinnyi agomba kugenerwa ishimwe rya miliyoni 3 kuri buri siganwa ku barikinnye.

 

TANGA IGITEKEREZO

Leave a Reply

Be the First to Comment!

avatar