Amagare: Abakinnyi bazahagarari u Rwanda muri shampiyona y’Afurika bakomeje imyiteguro 

Yanditswe na admin

Ku ya 04-02-2018 saa 10:17:27
Abakinnyi bazaserukira u Rwanda muri shampiyona y'Afurika mu kiciro k'ingimbi, uhereye ibumoso ni Habimana Jean Eric,Nzafashwanayo, Gahemba na Nkurunziza Yves

 Kuva Tariki 13-18 Gashyantare 2018 mu Rwanda  hazabera shampiyona y’Afurika  y’umukino wo gusiganwa ku magare “African Cycling Championship 2018” ahazagaragara abakinnyi mu byiciro bitandukanye.

Abakinnyi bazaserukira u Rwanda muri shampiyona y’Afurika mu kiciro k’ingimbi, uhereye ibumoso ni Habimana Jean Eric,Nzafashwanayo, Gahemba na Nkurunziza Yves

Abakinnyi 10 mu kiciro k’ingimbi (Men Juniors), abangavu (Women Juniors)   n’abakobwa bakuru (Elites) bamaze gushyirwa ahagaragara ko ari bo bazahagararira u Rwanda muri ibi byiciro. Aba bakinnyi  barimo  Habimana Jean Eric, Nkurunziza Yves, Gahemba Barnabe  na Nzafashwanayo Jean Claude mu ngimbi.

Hari Mushimiyimana Samantha na Irakoze Neza Violette mu bangavu (Women Juniors) naho mu bakuru  hakaba  Ingabire Beathe, Girubuntu Jeanne d’Arc, Manizabayo Magnifique na Tuyishimire Jacqueline.

Ikipe y’abakobwa, uhereye ibumoso ni Girubuntu Girubuntu Jeanne d’arc , Tuyishimire Jacqueline, Manizabayo Magnifique , Irakoze Neza Violette , Mushimiyimana Samantha na Ingabire Beathe

Aba  bakinnyi  bari bamaze iminsi bitoreza i Musanze  ariko kuva ejo tariki 05 Gashyantare 2018 bagomba  gutangira kwitoreza mu nzira zizakoreshwa muri Shampiyona y’Afurika baba i Nyamata.  Izi nzira ni Kicukiro-Bugesera izakoresha mu gusiganwa n’igihe “Time Trial” ndetse n’inzira ya Sitade Amahoro-Kimironko-Kibagabaga-Nyarutarama-RDB- Sitade Amahoro izakoresha mu gusiganwa mu muhanda “Road race”.

Umutoza w’ikipe y’igihugu  y’ingimbi “Juniors”  hamwe n’iy’abakobwa “Women Cycling Team”, Byukusenge Nathan yatangaje ko imyitozo irimo kugenda neza kandi  yizeye ko abakinnyi be bazitwara neza bakegukana imidali muri shampiyona y’Afurika igiye kubera mu Rwanda ku nshuro ya kabiri.

Aba bakinnyi nabo ikizere ni cyose, Nkurunziza Yves wegukanye “Rwanda Cycling Cup 2017” mu kiciro k’ingimbi atangaza ko  bafite intego yo guhesha ishema igihugu begukana imidali . Ati “Abakinnyi turi kumwe bose barakomeye kandi bazi icyo bashaka, ndabizeza ko tuzitwara neza tukegukana imidali”.

Uretse aba bakinnyi  bari mu kiciro k’ingimbi, abangavu n’abakobwa bakuru, abari mu  kiciro cy’abahungu bakuru  n’abatarengeje imyaka 23 ( Elites &U-23) hari abari mu myitozo i Musanze nabo bagomba gutangira   kwitoreza mu nzira zizakoreshwa  muri shampiyona y’Afurika  bakaziyongeraho abakinnyi  bari muri Cameroun   aho bitabiriye imikino y’Afurika  y’abatarengeje imyaka 23 nyuma hakazatangazwa urutonde ntakuka rw’abazaserukira u Rwanda.

Umwanditsi:

admin

Tanga Igitekerezo

Email yanyu ntigaragazwa ku rubuga. Amazina na Email ni ngombwa.