28°C , Sunny | Kigali-Rwanda

Amagare: Abakinnyi 4 ni bo bazaserukira u Rwanda muri shampiyona y’Isi

Yanditswe na BUGINGO FIDELE               

Ku ya 09-09-2019 saa 07:47:40
Mugisha Samuel, umwe mu bakinnyi bazaserukira u Rwanda muri shampiyona y'Isi

Abakinnyi 4 ni bo bazaserukira u Rwanda muri shampiyona y’Isi mu mukino wo gusiganwa ku magare, igiye kuba ku nshuro ya 92   “UCI Road World Championships 2019” izabera  mu  mujyi wa Yorkshire mu Bwongereza kuva tariki  22 kugeza 29 Nzeri 2019.

Abakinnyi bazaserukira u Rwanda bari mu byiciro bibiri birimo ikiciro k’ingimbi “Men Juniors” ndetse n’abatarengeje imyaka 23 “U-23”.

Mu kiciro k’ingimbi hazagenda abakinnyi 2 ari bo Uhiriwe Byiza Renus ukinira Benediction Excel Energy   na Habimana Jean Eric  ukinira ikipe ya Fly CC bakaba bazasiganwa mu muhanda “Road Race” ndetse no gusiganwa n’isaha, umukinnyi ku giti ke “Individual Time Trial”.

Aba bakinnyi barimo kwitegura, aho Uhiriwe arimo kwitegurira mu Rwanda gusa akaba amaze iminsi avuye mu Buyapani aho yamaze hafi ibyumweru bibiri yitoza.

Habimana Jean Eric we akaba ari mu Busuwisi  kuva muri Nyakanga 2019 aho yagiye gukorera imyitozo mu kigo k’imyitozo k’ishyirahamwe ry’umukino wo gusiganwa ku magare ku isi “UCI Centre”.

Aba bakinnyi bombi n’umwaka ushize wa 2018 bakaba baritabiriye  shampiyona y’Isi yabereye Innsbruck muri Autriche. Habimana muri ITT yasoreje ku mwanya wa 49 na ho Uhiriwe asoreza ku mwanya wa 59, mu isiganwa ryo mu muhanda, Habimana yasoreje  ku mwanya wa 40 mu gihe Uhiriwe atabashije gusoza.

Abandi bakinnyi bazaserukira u Rwanda ni Mugisha Moise ukinira ikipe ya Fly ndetse na Mugisha Samuel ukinira ikipe ya Dimension Data for Qhubeka.

Aba bakinnyi bazakina mu kiciro cy’abari munsi y’imyaka 23 bazasiganwa mu muhanda “Road race” ndetse banasiganwa n’isaha, umukinnyi ku giti ke “Individual Time Trial”.

Kuri uyu wa Mbere tariki 09 Nzeri 2019 ni bwo Mugisha Samuel agera mu Rwanda avuye mu Butaliyani  nyuma y’aho umwaka w’imikino urangiye akaba agomba gukomeza imyitozo.

Ku rundi ruhande ariko Mugisha  Moise,  kuri uyu wa Mbere  tariki 09 Nzeri 2019 arerekeza mu Bufaransa mu ikipe ya Les Sables Vendée CC akaba azajya mu Bwongereza muri shampiyona y’isi ari ho aturutse.

Umwaka ushize Mugisha Samuel  yari yitabiriye shampiyona y’Isi maze muri ITT asoreza ku mwanya wa 62 na ho ku isiganwa ryo mu muhanda ntiyabasha gusoza.

Mu nshuro 5 ziheruka  u Rwanda rwitabiriye shampiyona y’isi (2014,2015,2016, 2017 na 2018 ) nta mukinnyi urabasha kwegukana umudari.

Mugisha Samuel, umwe mu bakinnyi bazaserukira u Rwanda muri shampiyona y’Isi

Mugisha Moise (imbere) uzaba ari kumwe na Mugisha Samuel mu kiciro cy’abatarengeje imyaka 23

Habimana Jean Eric (ibumoso) na Uhiriwe Byiza Renus (iburyo) bazakina mu kiciro k’ingimbi

TANGA IGITEKEREZO

Leave a Reply

Your email address will not be published. Required fields are marked *