18°C , Partly cloudy | Kigali-Rwanda

Amagaju FC yiteguye kugaruka mu kiciro cya mbere umwaka utaha

Yanditswe na BUGINGO FIDELE

Ku ya 05-11-2019 saa 18:21:49
Umutoza mukuru w'ikipe y'Amagaju FC, Habimana Sosthene

Visi Perezida w’ikipe y’Amagaju FC, Harerimana Emmanuel atangaza ko bihaye intego y’uko  iyi kipe igomba gusubira mu kiciro cya  mbere umwaka utaha w’imikino wa 2020-2021.

Ibi yabitangarije mu  kiganiro   nyunguranabitekerezo ku iterambere   ry’akarere ka Nyamagabe n’ingamba zishimangira uruhare rw’umuturage mu  igenamigambi cyabereye mu murenge wa Buruhukiro tariki 05 Ugushyingo 2019.

Harerimana  yavuze ko  ubu bamaze kuzuza ibisabwa byose kugira ngo bakine shampiyona y’ikiciro cya kabiri aho bamaze ukwezi bitoza aho ubu bafite abakinnyi  28 batoranyijwe ndetse ko banashyizeho abatoza bayobowe na Habimana Sosthene nk’umutoza mukuru.

Yagize  ati : “Tumaze hafi ukwezi  twiteguta  gukina shampiyona  y’ikiciro cya kabiri kandi twizeye ko intego twiyaye tuzayigeraho yo kuzamura ikipe mu kiciro cya  mbere umwaka utaha.”

Ikipe y’Amagaju FC yari imaze imyaka isaga 10 mu kiciro cya mbere yamanutse mu kiciro cya kabiri mu mwaka w’imikino wa 2018-2019.

Nta gihindutse biteganyijwe ko shampiyona y’ikiciro cya kabiri mu mupira w’amaguru izatangira tariki 23 Ugushyingo 2019.

Visi Perezida w’Amagaju FC  yakomeje avuga ko bakoze umushinga uzemezwa mu nama y’inteko rusange ugaragaza uburyo  bushya bwo gukorana n’ikipe y’Amagaju FC binyuze mu mushinga “Global of Sports”  aho   Nyamagabe igiye kuba  ishingiro mu guteza imbere  siporo by’umwihariko  ndetse n’akarere  muri rusange.

Muri uyu mushinga kandi banafite gahunda yo kuvugurura no kwagura Sitade ya Nyagisenyi.

Umuyobozi w’akarere ka Nyamagabe, Uwamahoro Bonaventure   yavuze ko umushinga wo kwagura Sitade bawugeze kure n’uburyo  bwo kuwutera nkunga bwateganyijwe.

Hashyizweho   amashuri 4 y’ikitegererezo

Visi Perezida w’Amagaju FC, Harerimana Emmanuel yavuze ko  batangiye gahunda yo gushaka abana bakiri bato bafite impano  aho bakorana n’ibigo by’amashuri nyuma abazatoranywa bakajya bitoreza mu mashuri  y’ikitegererezo  arimo ishuri rya Kitabi, Cyanika, Kigeme na Gasaka .

Yagize ati : “Aya mashuri tuzayashakira abatoza bahugurwe ndetse no mu mashuri tuzahugura abarimu bafasha mu bya siporo.”

Akomeza avuga ko  nibamara kubona  aba bana bizera ko mu myaka 10, umushinga nugenda neza bazaba bafite abakinnyi beza kandi bahagije.

Umuyobozi w’akarere ka Nyamagabe, Uwamahoro Bonaventure avuga ko yashimishijwe cyane no kubona ubwo bahamagaraga abana mu gushaka abazajya mu ishuri ry’umupira  w’amaguru hakaza abarenga 130 bose babishaka.

Yakomeje avuga ko iyi gahunda yo kuzamura siporo itari mu mupira w’amaguru gusa  aho avuga ko bashinze ikipe y’imikino ngororamubiri kandi  nayo igaragaza ko hari abakinnyi bafite impano. Aha avuga ko guteza imbere siporo by’umwihariko  impano z’abakinnyi  bigomba gutangira bakiri bato.

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.