26°C , Partly sunny | Kigali-Rwanda
Minisitiri w'Imari n'Igenamigambi, Amb. Claver Gatete iburyo n'Umuyobozi mukuru w’ikigega OFID, Suleiman J Al-Herbish (Foto James R.)

Amafaranga yose y’umushinga w’amazi muri Kigali yabonetse-Amb. Gatete

Yanditswe na MUTUNGIREHE SAMUEL

Ku ya 13-03-2018 saa 07:04:53

Minisitiri w’Imari n’Igenamigambi, Amb Claver Gatete, yatangaje ko amafaranga yose yari akenewe ku mushinga w’amazi mu Mujyi wa Kigali, wa miliyoni zirenga 262 z’amadolari y’Amerika, akaba asaga miliyari 223 z’amafaranga y’u Rwanda, yamaze kuboneka, igisigaye akaba ari ugushyira mu bikorwa uwo mushinga abaturage bakabona amazi ahagije mu myaka ine iri imbere.

Minisitiri w’Imari n’Igenamigambi, Amb. Claver Gatete iburyo n’Umuyobozi mukuru w’ikigega OFID, Suleiman J Al-Herbish (Foto James R.)

Yabitangaje ejo hashize, tariki ya 12 Werurwe 2018, ubwo yashyiraga umukono ku masezerano y’inguzanyo ya miliyoni 20 z’amadolari y’Amerika, arenga miliyari 17 z’amafaranga y’u Rwanda, yatanzwe n’Ikigega mpuzamahanga kigamije iterambere (OFID).

Amb. Gatete yagize ati “Ni amafaranga aje kunganira wa mushinga munini w’amazi n’isuku mu Mujyi wa Kigali twari dusanganywe urenga miliyoni 262 z’amadolari y’Amerika. Uyu mushinga urimo abaterankunga banyuranye, Banki Nyafurika Itsura Amajyambere yashizemo miliyoni zirenga 171 z’amadolari y’Amerika, ‘European Investment fund’ yashyizemo miliyoni 45 z’amayero na Guverinoma y’u Rwanda yashyizemo miliyoni zirenga 20 z’amadolari y’Amerika.

Ubu noneho amafaranga yose agize uyu mushinga wa miliyoni zirenga 262 akaba yuzuye, ibisigaye bikaba ari ugushyira mu bikorwa ibijyanye n’uyu mushinga wo guteza imbere amazi n’isuku mu Mujyi wa Kigali.”

Umunyamabanga wa Leta muri Minisiteri y’Ibikorwa Remezo ushinzwe ingufu, amazi n’isukura, Kamayirese Germaine, yavuze ko Leta y’’u Rwanda yiyemeje gushaka ayo mafaranga kugira ngo ishyire mu bikorwa ibyo yiyemeje bikubiye mu ntego z’iterambere rirambye (SDGs), aho mu 2030 abatuye Isi bose bazaba bafite amazi 100%.

Ati “Hari imishinga yo kuvugurura imiyoboro y’amazi mu Mujyi wa Kigali ndetse no mu migi itandatu yunganira Kigali, aya mafaranga aje gushyira mu bikorwa imishinga ijyanye no kongera amazi mu gihugu mu turere dutandukanye kandi na none aje gukora mu bindi bikorwa bijyanye n’isuku n’isukura.

Amafaranga y’umushinga wose azaha amazi meza abaturage bagera kuri miliyoni n’ibihumbi 300, azatanga ibikorwa by’isuku n’isukura ku bantu bagera kuri miliyoni imwe n’ibihumbi 500 mu gihugu hose.”

Umuyobozi mukuru w’ikigega OFID, Suleiman J Al-Herbish, yavuze ko  ibikorwa byo kugeza amazi ku baturage nibyuzura, byitezweho kuzamura igipimo cy’abafite amazi meza n’isuku kandi bigatanga imirimo ku rubyiruko rw’Abanyarwanda.

Ati “Nkuko twese tubizi, ibikorwa by’amazi n’isuku ni ingenzi kandi bidufasha kugera ku majyambere arambye. Ndemeza ko iyi gahunda izagera ku cyo igamije kandi Abanyarwanda benshi bazagezwaho ibikorwa by’amazi n’isuku kandi nishimiye ubufatanye bw’u Rwanda n’ikigega OFID.”

Amafaranga ya OFID azafasha kandi mu kwagura uruganda rwa Nzove n’urwa Gihira II no kubaka imiyoboro y’amazi mu turere twa Musanze, Rubavu, Muhanga, Nyagatare, Huye na Rusizi.

Ikigega OFID gisanzwe gitera inkunga u Rwanda mu nzego zitandukanye, mu guteza imbere ubwikorezi nko kubaka imihanda aho bafatanyije n’abandi baterankunga no mu rwego rw’ingufu; ni bamwe kandi mu bemeye gutera inkunga umushinga wo kubaka ikibuga mpuzamahanga k’indege cya Bugesera.

 

TANGA IGITEKEREZO

Leave a Reply

Be the First to Comment!

avatar