19°C , Partly cloudy | Kigali-Rwanda
Gashugi André, Umuyobozi Mukuru w'Ikigo k'Ibigega by'imari mu Rwanda (Foto James R)

Amafaranga mu kigega ‘RNIT/Iterambere Fund’ yiyongereyeho 76%

Yanditswe na MUTUNGIREHE SAMUEL

Ku ya 04-10-2018 saa 07:10:28

Umuyobozi mukuru w’Ikigo k’Ibigega by’Imari mu Rwanda (RNIT) André Gashugi, atangaza ko abitabira kwizigamira binyuze mu kigega ‘RNIT/Iterambere Fund’ bamaze kwiyongera n’amafaranga bizigamira yiyongereyeho hafi 76% muri uyu mwaka.

Gashugi André, Umuyobozi Mukuru w’Ikigo k’Ibigega by’imari mu Rwanda (Foto James R)

Mu kiganiro n’Imvaho Nshya, Umuyobozi Mukuru wa RNIT, Gashugi yavuze ko amafaranga yo mu kigega ‘Iterambere Fund’ mu mwaka ushize wa 2017 harimo amafaranga y’imigabane y’abizigamiye hagamijwe ishoramari agera kuri miliyari imwe na miliyoni magana ane ubu akaba amaze kwiyongeraho hafi 76%.

Ati “Urebye amafaranga twari dufite mu kigega, twari dufite miliyari imwe n’ibihumbi magana ane na mirongo itandatu (1.460.000 000) ubu tukaba dufite miliyari ebyiri na miliyoni 570.”

Gashugi yasobanuye ko ibyo bituruka ku mubare w’abantu bizigamira na bo bagenda biyongera ugereranyije n’umwaka ushize wa 2017, kuko bamaze kwiyongeraho hafi 50%.

Ati “Muri uyu mwaka abizigamira biyongereyeho hafi 50%; umubare w’abantu wagiye wiyongera kuko tugenda dushishikariza abantu kwizigamira, barimo abakozi ku giti cyabo bagenda biyongera. Twari dufite hafi abantu 1700, ubu dufite hafi 2600.”

Mu kigega RNIT Iterambere Fund, agaciro k’umugabane nako kamaze kwiyongera. Ati “Agaciro k’umugabane umwe kavuye ku mafaranga 112 ubu ugeze ku 121.08 ku itariki ya 3 Ukwakira 2018. Umwaka ushize twashoboye kubona inyungu ya 9.77%; dukoze iteganyamibare, uyu mwaka biragaragara ko inyungu izaba iri hejuru ya 10% urebye uko ishoramari rigenda rikorwa.

Urebye iyo nyungu irenga 10%, ni uburyo bwiza umuntu waba wizigamiye amafaranga ye mu Kigega Iterambere Fund yaba abona inyungu mu ishoramari ikigega kigenda gikora, cyane cyane ko iryo shoramari riba rikorwa mu bicuruzwa byizewe byo ku isoko ry’imari n’imigabane ritanga inyungu ihoraho.”

Gashugi ahamya ko ishusho yo kuzamuka kw’agaciro k’umugabane itanga ikizere ko mu myaka mike iri imbere umugabane umwe uzaba uri hejuru ku buryo abizigamiye bazarushaho kubona inyungu nini n’akamaro ko kwizigamira mu buryo bw’ishoramari binyuze mu kigega Leta yashyiriyeho Abanyarwanda.

Ati “Turebye nk’uyu mwaka, uzajya kurangira umugabane umwe uri nko ku mafaranga 125. Mu gihe cy’umwaka umwe n’igice tumaze ubona ko hamaze kwiyongeraho nka 25% kandi ubona ko ari bwo ikigega cyari kigitangira. Uko tubona bigenda byiyongera, mu minsi mike cyane agaciro k’umugabane kazaba kageze ku 150”.

Umuyobozi Mukuru wa RNIT kandi yakomeje agira ati “Ibyo ni ibintu bigenda bigaragaza ko abantu bagenda biyongera, ari abantu ku giti cyabo ari n’ibigo biba bishaka aho byabitsa amafaranga yabyo mu buryo bwo kwizigamira cyangwa mu buryo bw’ishoramari, kugira ngo babone inyungu. Kandi turashimira abantu bakomeje kudusanga, tubizeza gukomeza gushora amafaranga yabo mu kigega RNIT Iterambere kugira ngo abyare inyungu nziza kurusha ahandi.”

Ubuyobozi bw’iki kigo gifite ikigega RNIT Iterambere Fund bugaragaza ko abantu bagishishikarizwa kwizigamira mu buryo bw’ishoramari kuko ari bwo buryo bwiza umuntu yakoresha mu kuzamura ubukungu bwe n’ubw’igihugu, bikaba kandi kwizigamira bitanga n’inyungu ku bwizigame umuntu aba yakoze.

TANGA IGITEKEREZO

Leave a Reply

Your email address will not be published. Required fields are marked *