17°C , Partly cloudy | Kigali-Rwanda
Umuhinzi mu murima w'imyumbati

Amabwiriza y’ubuziranenge mu myumbati yitezweho guca igihombo mu buhinzi

Yanditswe na Mukagahizi Rose

Ku ya 14-03-2019 saa 14:21:44

Ikigo k’igihugu Gishinzwe Ubuhinzi n’Ubworozi, RAB kiravuga ko amabwiriza y’ubuziranenge mu myumbati azafasha guca igihombo kigaragaraga muri ubu buhinzi ndetse hanongerwe umusaruro.

Iki kigo kiravuga ko aya mabwiriza ngo akurikijwe haboneka byibura toni 35 kuri hegitari mu gihe kuri ubu haboneka toni 19 kuri hegitari nk’uko byagaragajwe n’Ikigo k’Igihugu k’Ibarurishamibare, NISR.

RAB irabigarukaho nyuma y’uko Ikigo Gishinzwe Ubuziranenge gishyize ahagaragara amabwiriza y’ubuziranenge 2455 harimo n’agenga igihingwa k’imyumbati.

RAB ivuga ko igihingwa k’imyumbati ari cyo cya kabiri ku rutoki gihingwa ku buso bunini ugereranyije n’ibindi bihingwa bihingwa mu Rwanda aho kiri kuri 20% by’ubuso buhingwaho.

Iki gihingwa kandi kiri mu bihingwa 7 byatoranyijwe mu byazamura ubukungu bw’igihugu.

Ni muri urwo rwego hashyizweho amabwiriza y’ubuziranenge kuri iki gihingwa harimo n’agenga ubutubuzi bw’imbuto y’umwumbati. Nyuma yayo yashyizweho, ikigo RSB kivuga ko hari ayandi ari gutegurwa.

Ndahimana Jerome ashinzwe ishami rishyiraho amabwiriza y’ubuziranenge bw’ibikomoka ku buhinzi n’ubworozi, ibinyabutabire ndetse n’ibidukikije muri RSB, agira ati: “Ubu hari ikindi kiciro cy’amabwiriza y’ubuziranenge turimo gutegura, gishobora kuzasohoka mu minsi iza. Ni amabwiriza y’ubuziranenge yereka umuntu uri gutubura imbuto y’imyumbati uburyo yakagombye kubigenza, ibyo yakagombye kwitwararika kugira ngo azashobore gutubura imbuto ifite ibisabwa kugira ngo hirindwe udukoko, kugira ngo ingeri y’imyumbati izaze ibereye amaso atapfuye, imyumbati izabe ifite ireme mu byukuri rikwiriye imbuto.”

Nyuma y’uko aya mabwiriza ashyirwaho, Ikigo Gishinzwe iterambere ry’Ubuhinzi n’Ubworozi RAB na cyo kivuga ko aziye igihe kuko ngo azafasha mu guca akajagari kari mu icuruzwa ry’imbuto y’imyumbati ibi binateza igihombo kinini abahinzi.

Dr Nduwumuremyi Athanase, ashinzwe ubushakashatsi n’iyamamazabuhinzi muri RAB, yagize ati: “Twararebye dusanga kugira ngo duce akajagari, mu icuruzwa ry’imbuto y’imyumbati hari icyo twakora kugira ngo abacuruzi, abatubuzi, abahinzi, aya mabwiriza abafashe kugira ngo badahomba kuko iyo umuhinzi aguze imbuto idafite ubuziranenge igikurikiraho ni uguhomba.”

Kimwe mu bigaragaza ko hari igihombo mbere y’uko hashyirwaho aya mabwiriza ngo ni uko umusaruro uba ugomba kuboneka kuri hegitari ari nka toni 90, nyamara bikaba bigaragara ko umusaruro utajya urenza toni 19.

Yagize ati: “Umusaruro ushobora kugerwaho, ni toni 90 kuri hegitari ariko uyu munsi ikigo k’igihugu k’ibarurishamibare cyagaragaje ko dufite ikigereranyo cya toni 19 kuri hegitari ariko turateganya ko aya mabwiriza y’ubuziranenge azatuma imbuto iboneka ari nyinshi.”

Amabwiriza 2455 yamuritswe agamije kurengera ibikorerwa mu Rwanda birimo n’imbuto y’imyumbati.

TANGA IGITEKEREZO

Leave a Reply

Your email address will not be published. Required fields are marked *