21°C , Partly cloudy | Kigali-Rwanda

Akarere ka Rutsiro kagiye kubyaza ubukerarugendo amadovize

Yanditswe na Ntawitonda Jean Claude

Ku ya Nov 6, 2018 saa 9:29

Akarere ka Rutsiro gakomeje kugaragaza impinduka z’iterambere mu nzego zinyuranye, nyuma y’aho ubuyobozi bushyize imbaraga mu kubyaza umusaruro umutungo kamere ukarangwamo.

Aka karere k’ubukerarugendo karangwamo ibyiza nyaburanga byinshi birimo igice kinini k’Ikiyaga cya Kivu, imisozi iteye amabengeza inyuzemo Umuhanda wa Kivu-Belt uhuza Rutsiro na Rubavu, Karongi, Nyamasheke na Rusizi, amashyamba  ya kimeza yagizwe Pariki y’Igihugu ya Gishwati-Mukura n’ibindi.

Mu Kiganiro n’Imvaho Nshya, Umuyobozi w’Akarere ka Rutsiro Ayinkamiye Emérence yavuze ko mu buryo bwihariye bategura bwo kubyaza umusaruro aya mahirwe karemano harimo inzira ya ba Mukerarugendo inyuze muri Pariki ya Gishwati igahinguka mu ya Mukura.

Bitarenze uyu mwaka, Akarere gafatanyije n’ Ikigo k’Igihugu gishinzwe kubungabunga ibidukikije (REMA) mu mushinga wo kubungabunga amashyamba LAFREC (Landscape Approach to Forest Restoration and Conservation), birateganya kubaka amasite yo gukambikaho (base camps) arimo site ya Bitenga, iya Karumbi na Rusebeya.

Meya Ayinkamiye yagize ati “Kubaka izi site byaratangiye kandi mu mpera z’Ukuboza 2018 bizaba byaratangiye kandi tuzabitangiza ku mugaragaro ku buryo abaturage n’abandi bose bazamenya ko izo Pariki zigendwa guhera icyo gihe. Ni umushinga munini uzatwara amafaranga y’u Rwanda agera kuri miliyari ebyiri, tuzanashyiramo aho batunganyiriza amata, amabuye y’agaciro n’ibindi bikorerwa hano iwacu.”

Umuyobozi w’Akarere ka Rutsiro Ayinkamiye Emérence

Yakomeje avuga ko ku muhanda wa ‘Kivu Belt’ hateguriwe umushinga w’inzu nto,  abasura Akarere bazajya basangamo ibicuruzwa bitandukanye birimo umusaruro w’ibihingwa n’ibikomoka ku bworozi bw’inzuki, ubw’inka n’ubw’amafi.

Ati “Kuri uyu muhanda turi guteganya kuhubaka inzu zizajya zifasha abatembera mu karere na ba mukerarugendo kuguriramo umusaruro uboneka hano mu Karere ka Rutsiro nk’amata, ubuki, inanasi n’ibindi. Turagira ngo ku muhanda hazaboneke ahantu henshi ho kugurira ibicuruzwa mu buryo bworoshye.”

Biteganyijwe ko inzira ihuza Gishwati na Mukura, kimwe n’umushinga wo kubaka inzu y’umuco n’amateka (Cultural Village) hafi y’ishyamba rya Gishwati bigomba gukorwa bikarangira muri uyu mwaka w’ingengo y’imari wa 2018/2019.

Ubuhinzi n’ubworozi bikomeje kongererwa ingufu

Mu guharanira iterambere rirambye, Ubuyobozi bw’Akarere ka Rutsiro bwashyize imbaraga mu guteza imbere ubuhinzi n’ubworozi kuko ari bwo butunze umubare munini w’abaturage.

Aka karere keza ibihingwa ngandurarugo binyuranye birimo ibishyimbo, ibigori, ibirayi, urutoki, amashaza, inanasi, ingano, soya, imyumbati n’ingano mu gihe mu bihingwa ngengabukungu hera icyayi n’ikawa.

Mu karere harangwa uruganda rutunganya umusaruro w’icyayi, uruganda rw’ibigori ndetse n’inganda zigera kuri 19 zitonora ikawa yera ku nkengero z’Ikiyaga cya Kivu.

Meya Ayinkamiye yakomeje agira ati “Ku bufatanye n’Akarere hari n’undi muturage wateguye umushinga w’uruganda tumuhuza n’abafatanyabikorwa; arateganya gukora ikawa irangiye izajya iva i Rutsiro itunganyijwe igahita yoherezwa mu mahanga cyangwa ku isoko ry’u Rwanda ihita inyobwa.”

Ubworozi bw’inzuki na bwo bukomeje gutezwa imbere muri Rutsiro

Ubworozi bw’inzuki na bwo ni umwihariko w’Akarere ka Rutsiro, kuko hari n’uruganda rutunganya umusaruro uboneka mu karere kose.

Ubuyobozi bw’Akarere kandi burateganya kwagura umushinga wo korora amafi manini yiyongera ku isambaza ziboneka cyane mu kiyaga cya Kivu, ku buryo umusaruro wayo uzahindura bidasubirwaho ubuzima bw’abaturage. Mu mwaka wa 2017/2018 hubatswe Kareremba (utuzu tw’amafi) 15 mu kiyaga ndetse amafi yororerwamo yatangiye gutanga umusaruro.

Abarenga 3,000 bagiye gukurwa mu bukene bukabije

Muri gahunda yo gufasha abaturage kuva mu bukene bukabije, Meya Ayinkamiye ahamya ko umwaka wa 2018//2019 uzasiga abaturage barenga 3,000 bakuwe mu bukene bukabije binyuze muri gahunda zirimo iya Girinka, VUP n’izindi.

Meya Ayinkamiye ati “Buri mwaka tuzajya tugira abo dufasha kugira ngo tubavane muri icyo kiciro, tubigisha kwikemurira ibibazo, kurwanya amakimbirane yo mu ngo, no guharanira kwigira.”

Abaturage kandi bashyiriweho gahunda z’imibereho myiza, aho imiryango itishoboye igeze kuri 48 yamaze gutuzwa mu midugudu y’ikitegererezo (4 in1 Model Village) yubatswe mu murenge wa Kivumu n’uwa Mushubati .

Akarere ka Rutsiro gafite Ikiyaga cya Kivu, imisozi, Pariki n’ibindi byiza nyaburanga byinshi

Hubatswe ikigo kigenewe urubyiruko mu Murenge wa Mukura, mu Murenge wa Boneza na ho huzuye inzu yo gukoreramo umwuga w’ububaji (workshop). Ibi bikaba byiyongera ku mashuri ashaje agenda asimbuzwa, ibibuga by’imikino, harimo n’ikibuga cy’abafite ubumuga.

Akarere kujuje amarerero y’abana b’inshuke agera kuri arindwi ndetse akomeje kongerwa ku buryo buri kagari kazajya kubakwamo irerero riteza imbere gahunda yo kurwanya imirire mibi.

Mu gihe mu mwaka wa 2017/2018 hubatswe imihanda y’ibitaka (feeder roads) igera ku bilometero 47 muri gahunda ya VUP, muri uyu mwaka hazakomeza kubakwa imihanda yoroshya ubuhahirane muri aka karere kagizwe n’imisozi miremire ku bilometero birenga 60.

Abakora ingendo na bo bemeza ko uyu muhanda waborohereje ugatuma amasaha bamaraga mu nzira n’igiciro k’ingendo bigabanyuka

Biteganyijwe ko mu mwaka wa 2018/2019 imiryango irenga 4,000 izagezwaho amashanyarazi, abarenga 1,000 bagahabwa inka muri gahunda ya Girinka ndetse abarenga 8,0000 bakorozwa amatungo magufi.

Muri uyu mwaka ubuyobozi bw’Akarere bunateganya kugeza amazi meza ku ngo z’abaturage zirenga 600 zizahuzwa n’ibilometero 13 by’umuyoboro w’amazi bizubakwa.

Abatishoboye bageze mu za bukuru bazakomeza guhabwa ibibagenerwa muri gahunda ya VUP kugira ngo bashobore kubaho. Muri mituweli, umwaka ushize Akarere kesheje umuhigo ku kigero cya 73% ariko muri uyu mwaka karateganya kujya hejuru ya 85%.

Hazakomeza gushyirwa imbaraga mu miyoborere no gukemura ibibazo by’abaturage kuko ubu hashyizweho uburyo bwo gukurikirana niba ibibazo bigezwa ku buyobozi bw’Akarere n’imirenge bikemurwa uko bikwiye.

Ubucukuzi bw’amabuye y’agaciro bugomba gukungahaza abaturage

Nyuma y’aho bigaragariye ko Akarere ka Rutsiro gafite amabuye y’agaciro menshi, ku bufatanye n’izindi nzego za Leta harigwa uburyo ubucukuzi bw’uyu mutungo kamere bwahindura imibereho y’abaturiye ibirombe.

Meya Ayinkamiye ahamya ko imirenge yose igize Akarere ikungahaye ku mabuye y’agaciro, ari na yo mpamvu hashyirwa imbaraga mu buryo bwo kuyacukura bufasha abaturage.

Ati “Imirenge yose igize akarere igaragaramo amabuye y’agaciro. Turimo kuganira n’Ikigo gishinzwe iby’amabuye y’agaciro (RMB/ Rwanda Mines, Petroleum and Gas Board) ku buryo umusaruro wavuye ahacukuwe amabuye y’agaciro wagira icyo usigira abaturage kandi turizera ko mu myaka iri imbere bizatanga umusaruro.”

Abaturage barasabwa gukomeza gufatanya na Leta y’u Rwanda bubahiriza gahunda ibashyiriraho zigamije kubateza imbere.

Ibiro by’Akarere ka Rutsiro byubatswe mu buryo bugezweho