18°C , Partly cloudy | Kigali-Rwanda

Akarere ka Muhanga mu muvuduko udasanzwe w’iterambere ribereye u Rwanda

Yanditswe na NIYONSENGA SCHADRACK

Ku ya Jul 31, 2018 saa 9:29

Akarere ka Muhanga gafite amahirwe menshi azamura umuvuduko w’iterambere mu nzego zose u Rwanda rwerekejeho amaboko, akarusho ni uko aka karere kegereye Umujyi wa Kigali kakaba kanafite umugi watoranyijwe muri itandatu yunganira Kigali.

Ibiro by’Akarere ka Muhanga

Muhanga ni kamwe mu turere umunani tugize Intara y’Amajyepfo y’u Rwanda kakaba gafite kilometero kare 647,7, kagizwe n’imirenge 12, utugari 63 n’imidugudu 331.

Ubukungu bwa Muhanga bushingiye ku bucukuzi bw’amabuye y’agaciro no ku bucuruzi ariko hari n’ubuhinzi bukomeje gutera imbere umunsi ku wundi.

Ukigera muri aka Karere uvuye mu Mujyi wa Kigali usanganirwa n’ibikorwa remezo bigaragaza umuvuduko w’iterambere ry’Umujyi wa Muhanga ndetse n’Akarere muri rusange. Muri ibyo bikorwa remezo harimo amashanyarazi, amatara yo ku mihanda, imihanda mishya ya kaburimbo ndetse n’imihanda y’igitaka itsindagiye, amazi meza yakwijwe mu baturage, inyubako zigezweho z’amahoteli, ibitaro n’ibindi.

Nk’uko bisobanurwa n’Umuyobozi w’Akarere ka Muhanga Uwamariya Beatrice, byose byagezweho bitewe n’imbaraga zashyizwe mu kuzamura ubukungu bw’Akarere no guharanira imibereho myiza y’abagatuye muri rusange.

Umuyobozi w’Akarere ka Muhanga, Uwamariya Beatrice

Yagize ati “Hari byinshi byakozwe ariko ubu turasa nk’aho ari bwo tugitangira kuko gahunda z’ibigomba gukorwa zihari ni nyinshi kandi ni nziza kuko zigamije iterambere rirambye rya buri muturage.”

Imiterere y’ubukungu bw’akarere ka Muhanga

Umunyamakuru w’Imvaho Nshya yazengutse mu bikorwa bigaragarira buri wese mu bukungu, imibereho myiza y’abaturage, ubutabera ndetse n’imiyoborere myiza, yihera ijisho byinshi mu bimaze kugerwaho n’ibikirimo gukorwa. By’umwihariko ubukungu bw’Akarere bufite umuvuduko utangaje kubera imbaraga zishyirwa mu mishinga igamije guhindura isura y’Akarere.

Imiturirwa ikomeje kuzuzwa mu Mujyi wa Muhanga

Muri aka Karere higanjemo ishoramari ry’ubucukuzi bw’amabuye y’agaciro bukorerwa mu mirenge  11. Amabuye y’agaciro aboneka muri Muhanga arimo Gasegereti, Koruta, Zahabu n’ayandi.

Muri aka karere hanacukurwa umucanga n’ibumba byiza; Meya  Uwamariya ati “Abashakashatsi baraje bapima iryo bumba baduhamiriza ko riri ku rwego rwiza cyane. Ni ibumba rishobora kubumbwamo ibikoresho bita amadongo byajyaga bitumizwa mu mahanga. Icyo dutegereje ni ukubona abashoramari bazaza bagatangira kuribyaza umusaruro.”

Akomeza agira ati “Mu gice k’icyaro ariko haniganje ubuhinzi. Dufite ubuhinzi bw’ibinyabijumba nk’imyumbati, ibirayi, amateke n’ibijumba ariko tukagira n’ibinyampeke nk’ibigori, ibishyimbo, umuceri n’ibindi. Ku bijyanye n’ibiribwa nta kibazo kiri muri aka karere.”

Abakora ubu buhinzi mu bice by’imisozi no mu bishanga bagiriwe ikizere kuko bibumbiye mu makoperative yagiye yongererwa ubushobozi akanahabwa ubufasha  n’Ishami ry’Ikigo gishinzwe guteza imbere amakoperative (RCA).

Umujyi wa Muhanga, ikitegererezo cy’umugi ukwiye kunganira Kigali

Mu gihe u Rwanda rukataje mu iterambere, by’umwihariko muri gahunda yo kuzamura imigi mito yunganira Umurwa Mukuru wa Kigali, Umujyi wa Muhanga ni umwe mu yatoranyijwe kubera ibyiza wihariyeho byabyazwa umusaruro.

Gare ya Muhanga yahinduye Isura y’Umujyi wa Muhanga

Ukigera muri uyu mugi ubona ko uri ku rwego rushimishije kubera ibikorwa remezo byamazwe kuzura nk’inyubako zigezweho, imihanda myiza, isuku ahantu hose no ku bantu bose, urujya n’uruza rw’abakora imirimo itandukanye ibyara inyungu n’ibindi byinshi.

Umujyi wa Muhanga ugaragaza umwihariko w’udushya twinshi urusha indi migi yo mu Ntara y’Amajyepfo nko kuba uherereye mu izingiro ry’Intara ukaba unegereye Kigali cyane, ku buryo nk’abacuruzi biborohera kuwukoreramo haba mu kurangura cyangwa kuhashinga ikicaro cy’ubucuruzi.

Imiturire mu karere igenda irushaho gutezwa imbere

Meya  Uwamariya yagize ati: “Kuba uyu mugi waragiye mu yunganira Umujyi wa Kigali byazamuye ibikorwa byinshi ndetse binatuma haza abashoramari benshi; kugeza ubu uyu mugi wacu uri ku rwego rwo kuba ubonekamo serivisi zose zijyanye n’igihe.”

Hoteli St André ni imwe muri hoteli zigezweho wasangamo serivisi zose z’amahoteli

Akomeza ahamya ko Umujyi wa Muhanga wiganjemo imirimo y’ubucuruzi, iy’ubukorikori, gutwara abantu n’ibintu, iby’amahoteli n’ubukerarugendo bukorerwa mu cyaro no mu mugi, n’ubukungu bushingiye kuri serivisi nziza n’imiyoborere myiza.

Mu mibereho myiza, Muhanga iri ku rwego ruhanitse

Mu rwego rwo kuzamura imibereho myiza y’abaturage, Ubuyobozi bw’Akarere ka Muhanga butangaza ko bukomeje gukora byinshi bifasha kubungabunga imibereho ya buri wese. Abatishoboye bubakiwe inzu zijyanye n’igihe kandi ngo iyo gahunda irakomeje.

Meya  Uwamariya ati: “Twubatse inzu nziza zituzwamo abakene batishoboye mu rwego rwo kubakura muri ya manegeka y’imisozi miremire aboneka mu bice binyuranye by’icyaro; dufatanyije n’abandi bafatanyabikorwa twubatse n’Umudugudu wa ‘Horezo’ watashywe n’Umukuru w’Igihugu cyacu ku munsi wo kwizihiza isabukuru yo Kwibohora ku nshuro ya 24. Ibyo byose ni muri kwa kuzamura imibereho myiza y’abaturage bacu, ngira ngo mwarabibonye ko ahubatswe umudugudu hahita hanashyirwa n’ibindi bikorwa nk’amashuri, amavuriro, ibibuga byo kwidagaduriraho n’ibindi.”

Umudugudu wa Horezo ni umwe mu midugudu y’ikitegererezo yujujwe mu karere ka Muhanga

Akomeza ashimira Nyakubahwa Perezida wa Repubulika Paul Kagame wabahaye umurongo wo gushyira inyungu z’umuturage imbere y’ibindi byose.

Kuri ubu ngo ibikorwa byo gutuza abantu bose ku midugudu birakomeje hirya no hino mu mirenge y’Akarere ka Muhanga cyane ko muri buri mwaka w’ingengo y’imari hagenwa amafaranga agomba kwifashishwa mu kubaka ibikorwa remezo n’inzu z’abatishoboye.

Muhanga ibyaza umusaruro kuba ikora ku ruzi rwa Nyabarongo

Umugezi wa Nyabarongo wabyajwe umusaruro nyuma y’uko ari na rwo rwashyizweho Urugomero rw’amashanyarazi rutanga umuriro ungana na Megawati 28.

Meya  Uwamariya yagize ati: “Uwo muriro waje wiyongera k’uwari usanzwe, bituma ibura ry’umuriro rigabanuka cyane  yaba hano muri Muhanga ndetse no mu gihugu hose. Ikindi ni uko uwo muriro w’amashanyarazi watumye tubona ba rwiyemezamirimo bato benshi;  nk’urubyiruko rwahise ruwubyaza umusaruro binyuze mu bwogoshi no mu yindi mirimo ikenera amashanyarazi[…] ibyo na byo ni bimwe mu byazamuye ubukungu bw’abantu benshi.”

Udukiriro twagize uruhare rukomeye mu kongera ubukungu bw’abaturage

Uruzi rwa Nyabarongo runafasha abahinzi b’umuceri, ibigori n’ibindi kongera umusaruro mu bishanga bagatangira gukirigita ifaranga nyuma yo kwibumbira muri za koperative.

Meya Uwamariya arasaba abakorera n’abatuye hafi y’uru ruzi gukomeza kuwubyaza umusaruro ariko batawangiza, ati: “Icyo tubasaba ni ukumenya ko aya mazi abafitiye akamaro bityo bakirinda kuyangiza. Gukurikiza amabwiriza bahabwa n’abashinzwe ubuhinzi ni byo bizabafasha kutangiza uyu mugezi.”

Ibikorwa remezo birimo imihanda, amashanyarazi n’amatara yo ku mihanda ubisanga ahatandukanye

Muri Muhanga abaturage benshi bari mu byiciro by’abishoboye

Abaturage bo mu karere ka Muhanga bishimira ko iterambere ritagaragarira mu bikorwa remezo gusa ahubwo rigera no mu mibereho yabo ya buri munsi.  Kimwe mu bituma bashimira ubuyobozi bubahora hafi ni uko umubare munini w’abaturage batakibarizwa mu byiciro by’abatishoboye basaba gufashwa, ahubwo bakaba banyuzwe n’uko ubu na bo bagira uruhare mu kunganira bagenzi babo bake bakiri hasi.

Abaturage bishimira ko uko Muhanga itera imbere ari ko amahirwe y’akazi agenda yiyongera

Meya Uwamariya yahamirije Imvaho Nshya ko nyuma yo kugenzura uko abaturage bagiye bashyirana mu byiciro, basanze hasigaye umubare muke w’abari mu kiciro cy’abatishoboye.

Ati “Kugeza ubu iyo turebye dusanga abantu bari mu kiciro cya mbere cy’ubudehe ari 9.13% by’abaturage bose, abandi bose bagaragara ko bishoboye ndetse ko bakomeza kwiteza imbere mu buryo bwihuse; icyo bose tubafasha ni ukubakangurira gukora ndetse no gushakira abandi baturage icyo gukora.”

Akomeza agira ati “Tubakangurira kwitabira gahunda za Leta nk’udukiriro kugira ngo bahabonere imirimo, ariko kandi nk’iyo hanaje ibikorwa rusange nko gukora imihanda n’ibindi na bwo tubiha abaturage kugira ngo babone amafaranga, ni na yo mpamvu ubu twibanze mu gukora imihanda yo mu cyaro ku buryo ubu aka Karere kagendwa ahantu hose.”

Umwe mu mihanda yazahuye ubuhahirane ni uwo mu murenge wa Rongi utaragendekaga, aho abantu bajyagayo bakararayo bitewe n’uko urugendo rwabaga ari rurerure cyane, ariko kuri ubu urwo rugendo rwose rukorwa mu gihe k’isaha imwe gusa.

Mu rwego rwo kuzamura imibereho myiza y’abaturage b’Akarere ka Muhanga, hari kubakwa amashuri agera ku 1000, umuhanda wa Mbugampimbi-Burerabana uzatwara amafaranga angana na miliyari 2 na miliyoni 900. Hari kubakwa kandi Ibitaro bya Nyabikenke bizaba bifite ibitanda 300 bikazajya bihuriraho abaturage bo mu turere tune ari two Muhanga, Ngororero, Kamonyi na Gakenke, n’ibindi bikorwa remezo.

Meya Uwamariya ati: “Ibyo byose ni ibikorwa by’iterambere ariko kandi binatanga akazi ku baturage.”

Muri Muhanga, buri murenge ufite ikigo nderabuzima.  Umurenge wa Muhanga wari usigaye ubu wuzuyemo Ikigo Nderabuzima cya Mata cyubatswe mu buryo bujyanye n’igihe. Ibigo nderabuzima bikorana n’amavuriro y’ingoboka na yo yamaze gukwizwa ahatandukanye mu karere.

Imibereho y’abana igenda irushaho kunozwa

Meya Uwamariya avuga  ko Akarere ka Muhanga gakomeje gushyira imbaraga muri gahunda y’amarerero no kwita ku buzima bw’abangavu n’ingimbi muri rusange.

Aha ni kuri Sitade ya Muhanga

Yagize ati: “Buriya biba bishatse kuvuga ngo umwana akure neza kuva agisamwa. Ababyeyi bamaze gusobanukirwa agaciro ko kwipimisha utwite ndetse no gukurikiranwa na muganga.  Iyo atwite bamubwira indyo ikwiye ku mubyeyi utwite kandi na we akayikurikiza, umwana yamara kuvuka bagakomeza kumwereka uko amurera neza kugira ngo agire imikurire myiza hatabayeho kugwingira. Izo gahunda zose zirahari muri Muhanga kandi tubona zigenda zitanga umusaruro ushimishije.”

Kuri ubu muri buri murenge hari ishuri ry’uburezi bw’ibanze bw’imyaka 12 ndetse ubw’imyaka 9 bwo bumaze gusakara henshi mu Karere ku buryo n’amashuri y’inshuke amaze kugwira. Hashyizweho na gahunda y’uko ahubakwa ikigo k’ishuri hanubakwa icumbi ry’abarimu kugira ngo boroherezwe mu kazi kabo.

Hatangiye kuvugururwa ibyumba by’amashuri bishaje no gukomeza gushyigikira uburezi butangwa mu mashuri y’abikorera nk’Abihayimana n’abandi. Kugeza ubu, ubuyobozi bwishimira ko mu Karere ka Muhanga uburezi bwavuye ku mashuri abanza bukagera ku yisumbuye ndetse na kaminuza kuko haboneka Kaminuza Gatolika ya Kabgayi.

Muri uyu mwaka w’ingengo y’imari, aka karere kiyemeje kubaka ibyumba by’amashuri 55 ndetse n’ubwiherero bwabyo byose, bikazaba bifite n’ibigega bifata amazi. Meya Uwamariya ati “Ubu dusigaye twubakira rimwe, ibyo byumba ubyumvise wagira ngo ni bikeya ariko ni ukubera ko bigomba kuba byujuje ibisabwa byose. Ikindi ni uko kuri buri shuri ubu haba hari ucyumba cy’umwana w’umukobwa.”

Byose bituruka ku miyoborere myiza n’imikoranire y’inzego inoze

Uwamariya arashimira abayobozi b’Akarere ku mikoranire myiza bagirana hagati yabo, abaturage ndetse n’izindi nzego zaba iza Leta ndetse n’abandi bafatanyabikorwa b’Akarere; ashimangira ko ibimaze kugerwaho byose ari umusaruro w’umurava n’ubufatanye bibaranga.

Yakomeje agira ati “Abafatanyabikorwa bacu baradufasha cyane; mbere wabonaga batabyitayeho batanashishikariye kuzamura Akarere kabo, ariko kuri ubu barakora neza kandi cyane. Bamaze kubona ko ari Akarere gafite amahirwe n’umuvuduko udasanzwe mu iterambere. Ikindi babonye ni uko aka karere ari keza gukorerwamo kubera ko kegereye Kigali.”

Abafatanyabikorwa ba Muhanga bashimirwa by’umwihariko umusanzu bagaragaje mu kuzamura inyubako zisobanutse mu Mujyi wa Muhanga, kuba barubatse Gare ya Muhanga ndetse no kuba bakomeje gufatanya n’Akarere mu bikorwa binyuranye cyane cyane kubaka isoko rya Kijyambere.

Bazilika ntoya ya Kabgayi iherereye i Muhanga

Akarere ka Muhanga kabyaza umusaruro Uruzi rwa Nyabarongo

Ubuhinzi bwo mu karere ka Muhanga bukorwa kinyamwuga

Ubuhinzi n’ubworozi byateye imbere muri aka karere