17°C , Partly sunny | Kigali-Rwanda
Umuyobozi w'Akarere ka Gakenke, Nzamwita Deogratias wagaragaje ibanga bakoresheje mu kurwanya ingengabitekerezo ya Jenoside

Akarere ka Gakenke kagaragaje ibanga ryo kwimakaza ubumwe n’ubwiyunge

Yanditswe na BUGINGO FIDELE

Ku ya 24-04-2018 saa 06:53:00

Ubushakashatsi bwa 2015 bwakozwe na Komisiyo y’Ubumwe n’Ubwiyunge ku gipimo cy’ubumwe n’ubwiyunge, bugaragaza ko Akarere ka Gakenke kari mu turere twa mbere dufite ingengabitekerezo ya Jenoside iri ku gipimo cyo hasi,  aho iri ku gipimo cya 29.1%, ak akarere kaza ku mwanya wa kabiri inyuma ya Rutsiro iri ku gipimo cya 27.2%.

Umuyobozi w’Akarere ka Gakenke, Nzamwita Deogratias wagaragaje ibanga bakoresheje mu kurwanya ingengabitekerezo ya Jenoside

Umuyobozi w’aka karere, Nzamwita Deogratias, agaragaza ko aka karere kabayemo intambara y’abacengezi aho babaga mu baturage, bityo bituma haboneka ingengabitekerezo ya Jenoside ku kigero cyo hejuru. Gusa avuga ko bakoresheje imbaraga nyinshi kugira ngo bayirwanye.

Nzamwita yakomeje avuga ko icyabafashije mu guhangana n’iyi ngengabitekerezo ya Jenoside ari ukuganira n’Inzego z’ibanze cyane mu midugudu kuko iyo gahunda yose bayigize iyabo byose bigenda neza. Yagize ati “Gahunda zose iyo bazigize izabo bakazishyiramo ingufu  no kugira ngo abaturage bazumve biroroha”.

Uretse abari mu nzego z’ibanze, Umuyobozi w’Akarere ka Gakenke avuga ko hari abavuga rikijyana n’abandi baba bayobora za Koperative, abacuruzi n’abandi batandukanye bafasha mu kumvisha abaturage gahunda y’ubumwe n’ubwiyunge.

Mbonyuwontuma Boniface ufite imyaka 65 akaba atuye mu Murenge wa Muzo, yagaragaje ko impamvu ingengabitekerezo ya Jenoside yagabanutse ishingiye ku kuba Leta y’u Rwanda yarashyizeho  gahunda y’Ubumwe n’Ubwiyunge. Ati “Leta yazanye gahunda ya ‘Ndi Umunyarwanda’ aho mu nama dukorana n’abayobozi batwigisha ko tugomba kubana mu mahoro”.

Umwe mu barokotse Jenoside yakorewe Abatutsi, Mukamurenzi Seraphina, na we akaba atuye mu Murenge wa Muzo yashimangiye ko bafite ubuyobozi bwiza kugeza ku bw’umududugu. Abaturage ngo bigishwa  gukumira ingengabitekerezo ya Jenoside   kandi bashishikarizwa kwimakaza ubumwe n’ubwiyunge.

Bamwe mu bakoze Jenoside bahagurukiye kurwanya ingengabitekerezo yayo

Ndimubanzi Theodore, umwe mu bakoze Jenoside yakorewe Abatutsi utuye mu Murenge wa Muzo, avuga ko yireze akemera icyaha ndetse agasaba n’imbabazi, akavuga ko  yabonye isomo ko ntawakongera kubimushoramo ngo amwemerere. Ati “Uretse nge wabigiyemo n’utarabigiyemo na we byamugizeho ingaruka gusa Leta y’Ubumwe yaratwigishije, ubu dusabana n’abo twahemukiye”.

Ibi binashimangirwa na Nzabonimana Mathias na we wireze akemera icyaha akaza gufungurwa mu 2003.  Ati “Ubuyobozi buduha inyigisho kandi mu rwego rwo gukumira ingengabitekerezo ya Jenoside iyo habaye ibiganiro njyana n’abana bange nkanababwira ko ibyabaye batagomba kubikora kuko byangizeho ingaruka”.

Muri rusange  igipimo cy’ubumwe n’ubwiyunge mu Rwanda kigeze muri  92.5%.

 

 

TANGA IGITEKEREZO

Leave a Reply

Your email address will not be published. Required fields are marked *