26°C , Mostly cloudy | Kigali-Rwanda

AIF yahawe igihembo k’inganda zahize izindi mu bwiza bw’ibikorwa no gufasha abahinzi

Yanditswe na RUTAYISIRE EMILE

Ku ya 20-12-2019 saa 09:20:49
Nzorubara Doriane ashyikirizwa igihembo cya AIF

Uruganda Africa Improved Food (AIF) rukorera mu Rwanda rumaze kumenyekana ku ifu izwi nka “Nootri” rwahawe igihembo cy’uruganda rukora ibiribwa byiza byujuje ubuziranenge kandi rutanga ikizere cy’ahazaza mu bihembo bizwi nka ‘Foodex (Food Industry Excellence) Awards, bihabwa inganda zahize izindi buri mwaka.

Madamu Nzorubara Doriane, Umuyobozi ushinzwe ibikorwa muri AIF ni we wakiriye igihembo cy’uruganda AIF nk’igihembo cy’uruganda rutanga ikizere cy’ejo hazaza kubera gukorana bya hafi no kongerera ubushobozi abahinzi b’ibigori bo mu Rwanda, rukabafasha kugira umusaruro mwiza ufite ubuziranenge ndetse no gufasha amashyirahamwe yo mu karere.

AIF yari muri icyo kiciro hamwe n’inganda za Coca-Cola Beverages Africa, Bio food products na Kenya Breweries Ltd, buri ruganda rukaba rwarahawe nibura ibihembo bibiri binyuranye kubera ibyo biyemeje bakanabigeraho.

Iki gihembo uruganda AIF rukaba rwaragishyikirijwe tariki 5 Ukuboza 2019 mu muhango wabereye i Nairobi muri Kenya, warimo abayobozi b’inganda zikora ibiribwa n’ibinyobwa.

Mu itangazo rigenewe itangazamakuru uru ruganda rwashyize ahagaragara tariki ya 17 Ukuboza 2019, rigaragaza ko muri uwo muhango ifu izwi nka Nutripro yatangiye gukorwa muri uyu mwaka n’uruganda Tropikal Brands Africa ku bufatanye na AIF, yashimwe nk’ifu nziza y’umwaka.

Izindi nganda zahawe ibihembo harimo Inganda nka National Foods Ltd rwo muri Zimbabwe, Mjengo Ltd na Capwell Industries Ltd zo muri Kenya nazo zahawe ibihembo.

Ubwo yakiraga igihembo cy’uruganda Tropikal Brands Afrika, Victoria Kutima yagaragaje ibyishimo n’icyubahiro uruganda rufite yishimira intambwe uruganda rukomeje gutera mu kongerera agaciro umusaruro w’ibihingwa bikenerwa mu buzima bwa buri munsi cyane muri Afurika y’Iburasirazuba.

Umuyobozi ushinzwe imenyekanishabikorwa muri Tropikal Brands Afrika Limited, Simon Kabue, yavuze ko muri urwo ruganda bafatanye urunana mu gutunganya no kongera agaciro k’ibiribwa abaguzi bakenera.

Yagize ati “Kumenya ibikenewe mu buzima bw’umuntu ni byo bituma tuva mu gutunganya ibiribwa mu buryo buciriritse tukagera ku biribwa byuzuye intungamubiri kamere, bihendutse, bidahumanye kandi bifite ibyo umuryango ukeneye. Ikirango k’igikoma cyakozwe mu ifu ya Nutripro ni cyo gisubiza ibyo byose biba bikenewe mu buzima bwa muntu.”

Ubufatanye bwa AIF na Tropikal Brands Afrika bwatangiye mu ntangiriro z’umwaka wa 2019, hatunganywa ifu y’Igikoma ya Nutripro Family, iboneka mu maduka yo muri Kenya. Iyo fu ikaba ifite intungamubiri z’agaciro kadasanzwe  kuko usanga irimo vitamini zigera kuri 12, imyunyu ngugu 3 ndetse na poroteyine. Iyo fu usanga ifunze muri ambaraje cyangwa udukarito dufite isuku, tudakangwa n’ubukonje bigatuma iyo ifu ikomeza kugira umwimerere kugeza ikoreshejwe.

Ubu bufatanye bukaba bwaraje bwiyongera ku bwo uru ruganda rwagiranye n’Ishami rya Loni rishinzwe Ibiribwa (WFP) mu kubatunganyiriza ifu ihabwa impunzi muri Kenya, Uganda na Sudani y’ Epfo izwi nka Super Cereal yari isanzwe itunganyirizwa mu Burayi.

Ubufatanye kandi bwiyongera ku bundi uruganda rufitanye na Minisiteri y’Ubuzima mu Rwanda, aho rukora ifu izwi nka Shisha Kibondo igira uruhare mu kurinda abana igwingira n’imirire mibi igatangwa mu bigo nderabuzima.

Uruganda Tropikal Brands Afrika ni urwo mu gihugu cya Kenya rukagendera ku mategeko mpuzamahanga. Uruganda rufite uburambe bw’imyaka 20 rukaba rufite umurage wo gukora rugamije gukora ibiribwa byujuje ubuziranenge kandi rukaba uruganda rw’Afurika koko nk’uko izina ryarwo ribigaragaza ko ruri mu gihugu kirangwa n’ahantu h’amashyamba n’ibyanya by’amafu bibereye amaso.

Uruganda Africa Improved Foods, rwashinzwe ku bufatanye bwa Leta y’u Rwanda na DSM uruganda rukora ibijyanye n’imirire ndetse na Vitamini, IFC ishami ritera inkunga abashoramari rikorera muri Banki y’isi, CDC Banki y’iterambere y’u Bwongereza na  FMO Banki y’iterambere y’u Buholandi.

Uruganda rwabonye ibyangombwa byemewe n’amategeko muri Nyakanga 2015, rutangira gukora mu kuboza 2016 rufite intego yo gukora indyo yuzuye kandi ibikozwe bikagera ku babigenewe bimeze neza, bikabagirira akamaro mu buzima bwabo bwa buri munsi, kandi ibikorwa bikava mu bihingwa byo mu Rwanda. Uruganda «Africa Improved Foods » ruyoboye izindi muri Afurika rukagira uruhare rugaragara mu kugabanya igwingira ry’abana hagamije gufasha kwirinda imirire mibi.

Ifu ya Nutripro Family ikorwa mu bufatanye bw’Uruganda rwo muri Kenya na AIF nayo yahawe igihembo

Umwanditsi:

RUTAYISIRE EMILE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.