21°C , Partly cloudy | Kigali-Rwanda
Abakuru b'Ibihugu na za Guverinoma muri Afurika, n'abandi bayobozi, bari mu nama ya G20 iherutse kubera mu gihugu cy'u Budage

Afurika yungukira iki mu nama za G20?

Yanditswe na Kayitare Jean Paul

Ku ya 04-11-2018 saa 17:42:02

Zimwe mu mpuguke mu by’ubukungu, zigaragaza ko kuba abakuru b’ibihugu by’Afurika baratumiwe mu nama y’ihuriro ry’ishoramari ry’ibihugu bikize bya G20 iherutse kubera mu Budage mu mpera z’ukwezi gushize, kimwe n’iyabaye umwaka ushize, hari byinshi Afurika ihungukira.

Ubusanzwe G20 ni ishyirahamwe ry’ibihugu bikize ku isi birimo Leta Zunze Ubumwe z’Amerika, u Bufaransa, u Budage, u Bushinwa, Arabie Saoudite, Argentine, Brésil, u Butaliyani, Australie, u Bwongereza n’ibindi.

Kaberuka Teddy, inararibonye akaba n’umuhanga mu by’ubukungu, asobanura ko ubukungu bw’isi hari imirongo buhabwa n’ibihugu bikize kuko ari byo biri imbere hanyuma ibindi bigakurikira.

Akomeza agaragaza ko iyo ibyo bihugu bishyizeho umurongo mwiza w’ubutwererane mu bucuruzi mpuzamahanga, ibihugu bindi birakurikira cyane cyane iby’Afurika. Ikindi ni uko ibihugu by’Afurika iyo urebye uruhare rwabyo mu bucuruzi mpuzamahanga, rukiri hasi kuko imibare igaragaza ko mu bucuruzi mpuzamahanga, Afurika ifite hafi 2%.

Akomeza avuga ko uko ubucuruzi bwihariwe n’ibihugu binini bya G20, ari nako byashyizeho amasezerano n’amategeko atuma bihora birushaho kunguka no kugira ubukungu bwinshi.

Ati “Ariko iyo habayeho inama nk’iriya kandi ibihugu by’Afurika bigatumirwa hakabaho kumva ibitekerezo byabyo, na byo bikumva aho ibihugu bikomeye biganisha umurongo wa politiki y’ubukungu, bituma na byo bishobora kuzibona mu ruhando mpuzamahanga mu bucuruzi.”

Yongeraho ati “Hari ububyutse bw’ibihugu by’Afurika muri iyi minsi bugamije kongera uruhare rwabyo mu bukungu mpuzamahanga, haba mu bucuruzi, mu byo Afurika yohereza hanze, ibyo iha inganda zo ku isi ariko cyane cyane ishoramari muri Afurika. Ishoramari rero rikorwa n’abantu bafite ubushobozi nka biriya bihugu. Nibaza ko ari yo mpamvu banatumiye ibihugu bitangiye kuzana ishoramari kugira ngo barebe umurongo baha ishoramari noneho n’ibihugu bigakomeza gutera imbere.”

Undi muhanga akaba anafite ubunararibonye mu by’ubukungu bw’isi, Dr. Bihira Canisius, kuri we asanga kuba ibihugu by’Afurika byaratumiwe mu nama ya G20, ari uko byabonywemo ubushobozi.

Ati “Nge ndabona bazadufasha kubera ko babonye ko dufite ubushobozi, dushaka kwiteza imbere kandi noneho bakaba barimo kurushanwa n’Abashinwa n’Abahinde. Urabona ko bashaka kugira ngo bigarurire uyu mugabane wacu, urebye ubushobozi bw’iterambere barabufite ariko batinyaga kubuduha ahubwo bagashaka gukomeza kudutwara umutungo kamere ariko igihe cyarageze kuko barabona ko bitagishoboka. Barimo kugerageza gufasha ibihugu by’Afurika kugira ngo na byo bitere imbere.”

Abakuru b’Ibihugu na za Guverinoma muri Afurika, n’abandi bayobozi, bari mu nama ya G20 iherutse kubera mu gihugu cy’u Budage

Dr. Bihira agaragaza ko hari imbogamizi zagiye zituma umugabane w’Afurika udatera imbere harimo guheza umugore, kuba hari abakuru b’ibihugu by’Afurika bumva ko ibyiza byose biba i Burayi, bakabitsayo amafaranga ndetse bakanubakayo amazu.

Ati “Habanje kubaho igisa n’ubukoloni abayobozi b’ibihugu by’Afurika bakumva ko ibyiza biba i Burayi, ugasanga amakonti, amazu yabo byibereye i Burayi, bumvaga nta kintu bashyira mu bihugu byabo, umugore adahabwa agaciro mu bihugu by’Afurika, aho yirirwaga ahinga, asarura imbuto ariko ugasanga nta kandi gaciro bamuha, yajya muri banki kuguza amafaranga ntibayamuhe agahabwa umugabo gusa.”

Anavuga kandi ko mu bihugu by’Afurika usanga bigizwe n’urubyiruko aho usanga ruri kuri 60% cyangwa 70% mu gihe muri Amerika cyangwa i Burayi urubyiruko ruri hasi kuko babyara abana bake, abantu bakuze bashoboye gukora ari bo benshi ariko na bo bakaba bagiye guhura n’ikibazo cy’uko abasaza bazaba benshi bakabura abantu babakorera.

Ashimangira ko indi ngingo ituma umugabane w’Afurika utarashoboye gutera imbere, harimo kuba abakuze ari bo bafite akazi mu gihe urubyiruko rutagafite.

Ati “Twe muri Afurika urubyiruko dufite, rufite intege ariko usanga abenshi bari mu bushomeri ahubwo nk’abasaza ari bo basaziye mu kazi, barimo gusinzira batabasha gukora, rwa rubyiruko narwo ruri mu bushomeri ugasanga icyo ari ikibazo kireba Afurika hafi ya yose uretse Afurika yo mu Majyaruguru.”

Dr. Bihira yongeraho ko mu ishoramari hari ikibazo, akagaragaza ko nk’igihugu cya Nigeria gifite lisansi nyinshi muri Afurika, ariko kikaba kitagira ibyuma biyiyungurura kuko kitashoboye gushoramo amafaranga.

Ati “Barayicukura bakajya kuyiyungururira hanze, yagaruka ikagaruka ihenze kurusha no mu bihugu bihana imbibi na Nigeria, ugasanga ahubwo abaturage baho barajya kugura lisansi cyangwa mazutu muri Bénin. Icyo ni ikintu gituma Afurika isigara inyuma kubera bwa buryo bw’ishoramari buri hasi. Ku rundi ruhande mbona umugabane w’Afurika uzungukira kuri G20.”

TANGA IGITEKEREZO

Leave a Reply

Your email address will not be published. Required fields are marked *