20°C , Partly cloudy | Kigali-Rwanda
Ba Perezida Paul Kagame (hagati), Uhuru Kenyatta wa Kenya ibumoso, na Ibrahim Boubacar Keïta wa Mali bari mu nama ya Transform Africa yiga uko ikoranabuhanga ryateza imbere ubukungu bw'Afurika

Afurika ntikwiye gusigara inyuma mu ikoranabuhanga – Kagame

Yanditswe na Twagira Wilson

Ku ya 16-05-2019 saa 07:40:41

Perezida Paul Kagame uyoboye Inama y’ubutegetsi ya Smart Africa yateguye inama ya Transform Africa, yavuze ko kuba Umugabane w’Afurika ugeze mu bihe by’ubukungu bushingiye ku ikoranabuhanga, ari yo mpamvu uwo mugabane udakwiriye gusigara inyuma mu rwego rwo guteza imbere ikoranabuhanga, agasaba abatuye Afurika kugira uruhare muri izo mpinduka.

Umukuru w’Igihugu yabitangarije i Kigali kuwa hashize ku wa Kabiri tariki ya 15 Gicurasi 2019, ubwo yatangizaga ku mugaragaro inama ya 5 nyafurika igamije kwihutisha iterambere rishingiye ku ikoranabuhanga muri Afurika “Transform Africa Summit”, aho yasobanuye ko kuba ikoranabuhanga ari urwego ruhuza Isi mu buryo butangaje, ari bimwe mu byatumye abantu bagera ku bumenyi bwifuzwa.

Perezida Kagame yagize ati “Turi mu bihe by’ubukungu bushingiye ku ikoranabuhanga. Nta bwo dukwiriye gusigara inyuma. Ese Afurika yiteguye kugira uruhare muri izi mpinduka? Aha ni ho ipfundo riri.”

Perezida Kagame yibukije ko gukorera hamwe byihutirwa. Ati “Akamaro ka Smart Africa ni ukuduhuriza hamwe twese mu ntumbero y’ikoranabuhanga mu iterambere. Ubufatanye ni bwo buzatugeza ku byo twifuza cyane cyane turenga imitego itoroshye iterwa n’imiterere y’Isi.

Impinduka mu bukungu n’uburumbuke zisaba kuba tumaze kumenya neza gukoresha ikoranabuhanga. Iki ni cyo gihe cyo kubaka ibikorwa remezo nkenerwa n’ubumenyi bwa ngombwa muri Afurika.”

Umukuru w’Igihugu yagarutse ku kamaro ka Smart Africa yateguye iyo nama mpuzamahanga ku ikoranabuhanga, ko igamije guhuza abantu aho kubatanya. Ati “Hari abahora bashaka gutandukanya umugabane wacu ku mpamvu zitandukanye. Tuzi neza ko iyi nzira atari iyo gukurikizwa. Afurika ishobora gusa kurinda inyungu z’abaturage no kongera isoko ryayo binyuze mu kwishyira hamwe n’ubuhahirane.”

Yongeyeho ko ari ngombwa gushyiraho umurongo ngenderwaho. Ati “Kuba gushyiraho umurongo ngenderwaho mu ikoranabuhanga umwe muri Afurika byihutirwa nta we bigomba gutera ikibazo. Byaratinze, kandi tuzi ko ubumwe bw’Afurika ari bwo bwungura Afurika n’abafatanyabikorwa bayo ku Isi hose.

Ikoranabuhanga rihuza Isi mu buryo butigeze bubaho. Ibi byatumye kugera ku bumenyi butandukanye byegerezwa benshi ku kigero kingana. Reka rero twe kuba ingunguru zirimo ubusa, ngo dukoreshe umurongo mugari wa interineti mu kwakira ibitekerezo by’abandi gusa.”

Yavuze kandi ko ikoranabuhanga rinakenewe mu isoko rusange ry’Afurika, ati “Isoko Rimwe ry’Afurika ubu riri mu ishyirwa mu bikorwa. Tugomba gukomeza gushyira gahunda z’iterambere n’ikoranabuhanga by’Afurika muri uwo murongo. Impinduka zishingiye ku ikoranabuhanga nta bwo bivuze kwibagirwa uburyo busanzwe dukoramo ibintu. Afurika igomba kuba indashyikirwa muri ibyo byombi.”

Perezida Paul Kagame yashimiye Smart Africa kuba yarateguye iyi nama ya ‘Transfrom Africa’, no guhuriza hamwe abafatanyabikorwa, abahanga ibishya, n’abashyiraho za politiki.

Perezida wa Kenya Uhuru Kenyata, asanga kugira ngo ikerekezo cyo guteza imbere ikoranabuhanga rigere kuri bose hagomba kwitabwa ku rubyiruko ku buryo bahabwa amahirwe, nk’uko yabikoze mu gihugu ke. Ati “Nk’ubu mu gihe k’imyaka 5 iri imbere, mfite ikizere ko nibura buri muturage wese wa Kenya azaba ashobora kugerwaho n’ikoranabuhanga mu gace atuyemo.”

Iyi nama ya 5 nyafurika ku ikoranabuhanga hamurikiwemo imashini ifite isura nk’iy’abantu ubasanzwe yifashishwa mu mirimo itandukanye yo mu nganda mu bihugu byateye imbere, robot yitwa‘Sophia’ yakozwe n’umuntu, igeze mu Rwanda bwa mbere. Ifite ubushobozi bwo kumenya abantu, kuvuga no kugaragaza ibimenyetso by’umubiri nko guseka mu gihe bibaye ngombwa, akaba ari imashini yakozwe n’ikigo kizobereye mu ikoranabuhanga kitwa Hanson Robotics cyo muri Hongkong.

Inama nyafurika ku iterambere ry’ikoranabuhanga ‘Transform Africa’ 2019 yitabiriwe n’abasaga 4000 barimo ba rwiyemezamirimo bahanze udushya n’imishinga mu birebana n’ikoranabuhanga baturutse mu bihugu bisaga 90 harimo ibyo ku mugabane w’Afurika n’ahandi ku Isi, iyo mu mwaka utaha wa 2020 izabera mu gihugu cya Guinea.

Ba Perezida Paul Kagame (hagati), Uhuru Kenyatta wa Kenya ibumoso, na Ibrahim Boubacar Keïta wa Mali bari mu nama ya Transform Africa yiga uko ikoranabuhanga ryateza imbere ubukungu bw’Afurika

 

Perezida Paul Kagame uwa 5 imbere uturutse iburyo, habanje Uhuru Kenyatta wa Kenya, hirya ya Kagame ni Perezida wa Mali Ibrahim Boubacar Keïta, n’abandi bayobozi baturutse hirya no hino bitabiriye Transform Africa

TANGA IGITEKEREZO

Leave a Reply

Your email address will not be published. Required fields are marked *