27°C , Partly sunny | Kigali-Rwanda
Bamwe mu bitabiriye iyi nama

Afurika ishyize hamwe yaca iterabwoba – Dr. Ngirente

Yanditswe na Twagira Wilson

Ku ya 06-02-2019 saa 08:46:37

Minisitiri w’Intebe, Dr. Ngirente Edouard, asanga ubufatanye ari bwo bw’abashinzwe umutekano ari bwo bwakemura ikibazo cy’iterabwoba muri Afurika.

Yabivuze kuwa 5 Gashyantare 2019, mu gikorwa cyo gutangiza inama ya 24 ihuje inzego za Polisi mpuzamahanga mu rwego rw’Afurika ‘interpol’, mu gihe k’iminsi 3.

Muri iyo nama abayobozi bahagarariye ibihugu bisaga 40 byo muri Afurika baraganira ku ngamba zafatirwa ikibazo cy’iterabwoba, ibyaha by’ikoranabuhanga, amafaranga asohoka muri Afurika anyujijwe mu nzira zidasobanutse, icuruzwa ry’abantu n’izindi ngingo zirebana n’umutekano w’ibihugu.

Mu butumwa yahaye inzego za Polisi mpuzamahanga, Minisiri w’Intebe yagaragaje ko ikibazo cy’ubujura bw’amafaranga asohoka muri Afurika buri mwaka binyuze mu nzira zitemewe, iterabwoba ritwara ubuzima bw’abaturage muri Afurika, n’ibyaha bigezweho bikomeje gukorwa hakoreshejwe uburyo bw’iterabwoba, icuruzwa ry’abantu, byose bikeneye ingamba n’ubufatanye bw’ibihugu by’Afurika ariko asaba ko ubuyobozi bwabigiramo uruhare.

Dr. Ngirente ati “Hakenewe ubufatanye bw’ibihugu by’Afurika kugira ngo ikibazo k’iterabwoba n’ibindi nk’icuruzwa ry’abantu, iby’ikoranabuhanga n’ubujura bw’amafaranga byose bicike burundu, kuko nk’ubu Ishami ry’Umuryango w’Abibumbye rishinzwe ubukungu rigaragaza ko Umugabane w’Afurika utakaza miriyari 50 z’amadorari y’Amerika buri mwaka binyuze mu bujura bw’amafaranga anyuzwa mu nzira zitemewe n’amategeko, kandi ibyo byose bidindiza gahunda z’iterambere ry’Afurika.”

Yagarutse ku kibazo k’iterabwoba, avuga ko hari ingero za vuba aho ryibasiye ibihugu nka Somalia, Kenya, Mali na Nigeriya aho ibyihebe byahitanye ubuzima bw’inzirakarengane z’abaturage b’Afurika, n’ihohoterwa ry’uburenganzira bwa muntu, agashimangira ko ubufatanye bw’ibihugu by’Akarere n’ibindi mpuzamahanga bukenewe, ko ingamba zikenewe zitagerwaho buri gihugu gikoze cyonyine.

Umuyobozi Mukuru wa Polisi y’u Rwanda, IGP Dan Munyuza, yibukije ko iyi nama ibaye nyuma y’inteko rusange ya Interpol yabaye mu Gushyingo 2015, ahanini byose bigaruka ku ngamba zo kurwanya ibibazo by’iterabwoba, yizera ko ubufatanye busanzwe buhari hagati y’inzego za polisi z’ibihugu babuteje imbere bagera ku ntego biyemeje yo kurwanya ibyaha by’iterabwoba n’ibyaha bikorwa hakoreshejwe ikorana buhanga.

Umunyamabanga Mukuru wa Interpol Jurge Stock yagize ati “Urebye igikenewe cyane ni ukwitegura no guhozaho mu birebana no guhabwa amahugurwa, kuko bigenze bityo intego abantu bihaye yagerwaho maze tukagira Afurika, akarere ndetse n’Isi birangwamo umutekano bisesuye.’’

Muri iyo nama, Minisitiri w’Intebe yatambagijwe anatangiza ku mugaragaro imyitozo yiswe, Table Top Exercise “Cyber Tracks II” ikiciro cya kabiri ihabwa abahugurwa igamije kurwanya ibyaha by’iterabwoba.

TANGA IGITEKEREZO

Leave a Reply

Your email address will not be published. Required fields are marked *