Afrobasket 2021: Ikipe y’u Rwanda yatsinzwe umukino wa kabiri mu itsinda

RDC 50-61 Tunizia

Madagascar 79-95 Central Africa Republic

South Sudan 77- 64 Mali

Rwanda 62- 83 Nigeria

Tariki 29-11-2020

RDC- Madagascar (11h00)

Tunizia -Central Africa Republic (14h00)

Nigeria-Mali (17h00)

Rwanda-South Sudan (20h00)

Kuri uyu wa Gatandatu tariki 28 Ugushyingo 2020 ubwo hakinwaga imikino y’umunsi wa 4 y’irushanwa ryo gushaka   itike y’imikino y’Afurika “Afrobasket 2021”, ikipe y’u Rwanda yatsinzwe umukino wa kabiri mu itsinda D.

Iyi kipe y’u Rwanda yatsinzwe na Nigeria  yegukanye igikombe cy’Afurika muri 2015 ku manota 83 kuri 62.  Agace ka mbere Nigeria yatsinze  amanota 22 kuri 13, agace ka kabiri Nigeria igatsinda ku manota 25 kuri 15. Agace ka 3, ikipe y’u Rwanda yatsinze Nigeria amanota 24 kuri 19 gusa agace ka nyuma  ka 4, Nigeria igatsinda ku manota 17 ku 10.

Umukinnyi wa Nigeria, Ike Diogu ni we watsinze amanota menshi muri uyu mukino (18) naho ku ruhande rw’ikipe y’u Rwanda, Kami Kabange atsinda amanota 13.

Muri iri tsinda D habaye n’undi mukino   aho ikipe ya South Sudan yatsinze Mali amanota 77 kuri 64.

Indi mikino yabaye ni iyo mu itsinda A aho  ikipe ya Tunizia ifite igikombe giheruka cya 2017 yatsinze RDC amanota 61 kuri 50, uyu ukaba ari umukino wa kabiri  iyi kipe ya Tunizia yari itsinze.  Muri iri tsinda kandi, ikipe ya Central Africa Republic yatsinze Madagascar amanota 95 kuri 79.

Imikino ibanza yo gushaka itike  igeze ku musozo

Kuri iki Cyumweru tariki 29 Ugushyingo 2020 harasozwa imikino ibanza yo gushaka itike  y’imikino y’Afurika yaberaga mu Rwanda kuva tariki 25 Ugushyingo 2020.

Mu mikino iteganyijwe mu itsinda  A,  ikipe ya RDC irakina na Madagascar (11h00) naho ikipe ya Tunizia ikine na Central Africa Republic (14h00).

Mu itsinda D, ikipe ya Nigeria irakina na Mali (17h00) naho ikipe y’u Rwanda ikine na South Sudan (20h00).

Amafoto y’umunsi wa 4:

Foto: FIBA Africa