22°C , Partly sunny | Kigali-Rwanda

Afrobasket 2021: Amakipe 13  ni yo amaze kubona itike y’imikino ya nyuma

Yanditswe na BUGINGO FIDELE

Ku ya 22-02-2021 saa 23:20:03
Ikipe y'u Rwanda izakira irushanwa

Kuva taliki 17 kugeza 21 Gashyantare 2021 mu mujyi wa Monastir muri Tunizia n’i Yaounde muri Cameroun habereye imikino y’amajonjora  y’icyiciro cya kabiri  yo gushaka itike  y’imikino  ya nyuma y’Afurika  mu mukino wa Basketball  “FIBA Afrobasket Rwanda 2021 Qualifiers ”.

Nyuma y’iyi mikino, amakipe 13 ni yo amaze kubona itike yo kuzakina imikino ya nyuma y’ Afurika “FIBA Afrobasket Rwanda 2021” izabera mu Rwanda  kuva taliki 24 Kanama kugeza 05 Nzeri 2021.

Aya makipe arimo ikipe y’u Rwanda izakira irushanwa ariko ikaba yarakinnye imikino y’amajonjora aho yari iri mu itsinda D iri kumwe na Nigeria, South Sudan na Mali zose zikaba zifite itike.

Izindi kipe zabonye itike ni Senegal, Angola, Kenya, Cote d’Ivoire, Cameroun, Tunizia, Misiri, Central African Republic na  RDC.

Muri rusange imikino izitabirwa n’amakipe 16, andi atatu akaba ategerejwe mu mikino izaba mu minsi iri mbere nk’uko bitangazwa n’ishyirahamwe ry’umukino wa Basketball muri Afurika “FIBA-Afrique”.

Mu itsinda C, imikino yaberaga muri Cameroun hari umukino wagombaga guhuza Cameroun na Guinea Equatorial urasubikwa kuko iyi kipe yageze i Yaounde yatinze  ku buryo nta mwanya uhagije wo kubapima COVID- 19 kugira ngo bakine. Uyu mukino nuba rero hagati ya Guinea iri ku mwanya wa 3 mu itsinda n’amanota 7 na  Guinea Equatorial  ubu ifite amanota 6 harimo ikipe imwe izahita ibona itike.

Andi makipe 2 azava mu itsinda E ririmo Misiri, Morocco, Cap Vert na Uganda. Mu mikino yo muri iri tsinda yagombaga kubera  i Monastir muri Tunizia, ikipe y’igihugu ya Uganda nta bwo yabashije gukina nyuma y’aho abantu 5 muri iyi kipe basanzwemo COVID-19.  Ikipe ya Uganda igomba gukina na Misiri, Cap Vert na Morocco. Nyuma y’iyi mikino  ni bwo hazamenyekana amakipe 2 azabona itike agasanga Misiri yo yamaze kubona itike aho ifite amanota 10, ikurikiwe na Cap Vert na Morocco n’amanota 6 mu gihe Uganda iri ku mwanya wa 4 n’amanota 5.

Imikino y’Afurika iheruka “FIBA Afrobasket 2017” yabereye muri Tunizia na Senegal aho ikipe y’igihugu ya Tunizia yegukanye igikombe itsinze Nigeria amanota 77 kuri 65 naho ikipe ya Senegal yegukana umwanya wa 3 itsinze Morocco ku manota 73 kuri 62.

Amakipe amaze kubona itike ya FIBA- Afrobasket Rwanda 2021

Nigeria

Mali

South Sudan

Tunizia

Kenya

Senegal

Cote d’Ivoire

Central African Republic

Cameroun

Angola

Misiri

RDC

Foto: FIBA-Afrique

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.