22°C , Intermittent clouds | Kigali-Rwanda

Abitwaye neza mu mikino y’Isi y’abafite ubumuga bwo mu mutwe  barashimiwe

Yanditswe na BUGINGO FIDELE               

Ku ya 06-12-2019 saa 18:17:17
Abayobozi batandukanye bari kumwe n'abana begukanye imidari mu mikino y'Isi yabere Abu Dhabi

Muri Werurwe 2019, ikipe yari igizwe n’abakinnyi 24  bafite ubumuga bwo mu mutwe  bitabiriye imikino y’Isi y’abafite ubumuga bwo mu mutwe “Special Olympics World Summer Games 2019” yabereye  mu mujyi wa Abu Dhabi muri Leta zunze Ubumwe z’Abarabu begukana imidari 8.

Umuryango “Special Olympics Rwanda” wita ku bana bafite ubumuga bwo mu mutwe binyuze mu mikino ku bufatanye na Banki y’Isi  bateguye igikorwa cyo gushimira aba  bakinnyi bitwaye neza muri iyi mikino. Iki gikorwa cyabereye muri Hotel des Mille Collines tariki 05 Ukuboza 2019.

Pasiteri Sangwa Deus, umuyobozi w’Umuryango “Special Olympics Rwanda”  yavuze ko ko uyu wari umwanya wo gushimira aba bakinnyi uko bitwaye no kubereka ko babashyigikiye.

Yakomeje avuga ko kugeza ubu bafite abakinnyi basaga ibihumbi 18 mu mikino itandukanye irimo umupira w’amaguru, Koga, kwiruka ku maguru, Boccia n’indi itandukanye.

Pasiteri Sangwa yavuze ko ubu barimo kwitegura imikino y’Afurika izabera mu Misiri muri Mutarama 2020 ariko bagakomeza gutegura abakinnyi  bazahagararira igihugu mu mikino izitabirwa n’ibihugu byo ku migabane itandukanye  izabera mu Rwanda muri 2022.

Gushimira abakinnyi  byateguwe ku bufatanye  na Banki y’Isi, Pasiteri Sangwa yavuze ko  bari gukora mu buryo bwo kugerageza ariko ko  babonye ibikorwa bakora bakumva bifuza ko bakorana. Ati : «Nta bwo namenya ngo bizaba igihe kirekire  cyangwa kigufi ariko nabashishikariza ko  twakorana igihe kirekire. »

Umuyobozi wa Banki y’Isi mu Rwanda, Yasser El- Gammal yatangaje ko iki gikorwa cyahuye no kwizihiza umunsi mpuzamahanga wahariwe  abafite ubumuga. Yakomeje avuga ko  byari ngombwa  gushimira aba bakinnnyi  kuko bitwaye neza begukana imidari 8 mu mikino y’Isi.

Yasser El- Gammal yakomeje avuga ko  bashimiye aba bakinnyi ibyo bakoze ariko  banabatera morari kugira ngo bazitware neza mu yandi marushanwa bazitabira mu minsi ya vuba.

Ku bijyanye no gukorana  n’Umuryango “Special Olympics Rwanda” ,  Umuyobozi wa Banki y’Isi, Yasser El- Gammal yatangaje ko basanzwe bakorana n’u Rwanda  mu gufasha mu buzima, uburezi  n’ibindi birimo na gahunda zijyanye no gufasha abafite ubumuga.

Ati :«Ndizere ko tuzakomeza gukorana na Special Olympics Rwanda kuko ibikorwa byabo ni byiza.»

Ministiri wa Siporo, Munyangaju Aurore Mimosa yavuze ko igikorwa nk’iki ari icyo kwishimira kuko  aba bana baba bakwiye kubegera kandi bakabashyigikira. Yavuze ko kandi ari umwanya mwiza wo kwereka bamwe mu babyeyi ko umwana ufite ubumuga na we afite icyo yashobora ko bidakwiye ko impano ye ipfukiranwa.

Abana bitwaye neza bari kumwe n’abayeyi ndetse n’abatoza babo

Bagaragazaga ibyishimo mu maso

Pasiteri Sangwa Deus, umuyobozi w’Umuryango “Special Olympics Rwanda”

Minisitiri wa Siporo, Munyangaju Aurore Mimosa

Bamwe mu bakozi ba Special Olympics Rwanda

Umwanditsi:

BUGINGO FIDELE               

Tanga Igitekerezo

Email yanyu ntigaragazwa ku rubuga. Amazina na Email ni ngombwa.