21°C , Mostly cloudy | Kigali-Rwanda
Minisitiri w'Ibidukikije, Dr. Vicent Biruta

Abikorera bagaragaje ubushake mu kugabanya imyuka yangiza akayunguruzo k’izuba

Yanditswe na MUTUNGIREHE SAMUEL

Ku ya 14-09-2018 saa 07:54:09

Mu gihe ibihugu by’Isi byemeranyijwe ko muri Mutarama 2018 bizatangira gushyira mu bikorwa amasezerano ya ‘Montreal Protocol’ yavugururiwe i Kigali mu Kwakira 2016, agamije kugabanya ibyuka bihumanya ikirere mu rwego rwo kubungabunga akayunguruzo k’imirasire y’izuba kagabanya ubukana bwayo, abacuruzi bo mu Rwanda batangaza ko bamaze kubona ibikoresho bisimbura ibisanzwe bifite gaze za Hydrofluorocarbons zohereza imyuka ihumanya ako kayunguruzo mu kirere bityo bashyigikiye ubushake bwa Leta y’u Rwanda mu gushyira mu bikorwa ayo masezerano.

Minisitiri w’Ibidukikije, Dr. Vicent Biruta

Ibikoresho birimo imyuka ya gaze zihumanya ako kayunguruzo k’izuba birimo gaze zikoreshwa cyane cyane mu bikoresho byo gukonjesha mu nzu, nka firigo, ibyumba bikonjesha byo kwa muganga, mu nganda no mu mahoteri.

Bamwe mu bikorera batangaje ko ibikoresho bibungabunga ikirere bamaze kubibona kandi basobanurira buri mukiriya wese itandukaniro ry’ibikoresho bisanzwe n’ibishya kandi hari n’izindi nyungu bitanga mu kubikoresha.

Niyibigira Peter, ukorera imwe mu nzu zigurisha ibikoresho bikonjesha mu nzu, yagize ati “Ibifite imyuka ihumanya barabiciye, ubu nta bwo byemewe kubyinjiza. Ubu hari ibikoresha gaze itangiza akayunguruzo k’izuba ariko na none bikoresha umuriro muke kugira ngo bidatera kuzamuka k’ubushyuhe bw’Isi.

Inyungu ya mbere ni uko Isi ari iyacu, icyo abantu bunguka ni uko kubungabunga iyo si tutanduza akayunguruzo k’izuba kandi bikoresha umuriro muke.”

Iradukunda Theophile ati “Mu rwego rwo kubungabunga ikirere dukoresha Daikini, icyo itandukaniraho n’izindi ni uko ikora mu buryo bwo kuyungurura umuyaga ubwayo. Nta bwo dukenera ibindi bintu byo kuwuyungurura, kuko hari nk’abantu bajya bumva impumuro y’ikintu runaka kivuye mu miyaga yo muri bya byuma bihehereza mu nzu bikaba ngombwa ko bafuruta.

Zimwe mu mbogamizi abacuruzi bavuga batangiye guhura nazo mu mikoreshereze y’ibyo byuma bikoresha umwuka utanduza ikirere zirimo kuba nta mahugurwa abantu benshi babifiteho, bityo bikaba byoroshye guteza impanuka, hakaba n’ikibazo cy’abatarasobanukirwa inyungu yo gukoresha izo gaze.”

Minisitiri w’Ibidukikije Dr. Biruta Vincent, yavuze ko gukoresha ibikoresho bigezweho bituma igihugu n’abantu muri rusange babona inyungu babikeneyeho no kutangiza ikirere n’ibidukikije muri rusange.

Yakomeje avuga ko kuva u Rwanda rwashyira umukono kuri ayo masezerano hakozwe byinshi birimo iteka rya minisitiri rigena uburyo bwo gutumiza no kohereza hanze ibyangiza akayunguruzo k’imirasire y’izuba, ibicuruzwa n’ibindi birimo ibyo bintu, guhuza abantu bose batumiza ibikoresho bikonjesha, kubahugura kugira ngo bamenye izindi gaze bakoresha no kubafasha gushyiraho ishyirahamwe ribahuza kimwe no guhugura inzego za Leta zirimo iz’ubugenzuzi.

Ati “Dufite abantu batangiye kuzana gaze zisimbura ziriya dushaka gukuraho; icyo navuga ni uko twebwe nk’igihugu iyo dushyize umukono ku masezerano tuba twiteguye no guhita tuyashyira mu bikorwa kandi nta bwo ari twebwe twenyine kuko n’iyo twayashyira mu bikorwa twenyine ntibyagira impinduka zigaragara ku Isi. Amasezerano ya Montreal ashyizwe mu bikorwa neza tukaba twizera ko na ririya vugurura ryakorewe i Kigali ibihugu bizayitabira kuko twese tubifitemo inyungu.

Ku bushake bw’abikorera; bitugaragariza ko urugamba rwo kubungabunga ibidukikije tutaruriho twenyine nka Leta ahubwo ko n’abikorera bafite ubwo bushake kandi ko babonamo n’inyungu mu bucuruzi”.

Amasezerano ya “Motreal Protocol” yashyizweho umukono mu mwaka wa 1987, u Rwanda rwayemeje burundu mu 2003.

TANGA IGITEKEREZO

Leave a Reply

Be the First to Comment!

avatar