18°C , Intermittent clouds | Kigali-Rwanda

Abiga TVET bazagera kuri 60% mu 2024 bavuye kuri 31% bariho

Yanditswe na Mugisha Benigne

Ku ya 19-05-2019 saa 15:58:39
Guverinoma y'u Rwanda ishyize imbaraga mu guteza imbere imyuga n'ubumenyingiro hongerwa amashuri abyigisha mu gihugu (Foto Mukagahizi R)

Gahunda ya Guverinoma y’imyaka 7 yo kwihutisha ubukungu (NST1) mu rwego rw’imyuga n’ubumenyingiro, ni uko abiga amashuri y’imyuga n’ubumenyingiro (TVET) bazagera kuri 60% mu mwaka wa 2024 bavuye kuri 31%, nk’impuzandengo iriho uyu munsi.

Ibi ni ibitangazwa n’Umuyobozi Mukuru w’Ikigo k’igihugu k’imyuga n’ubumenyingiro (WDA) Eng. Gatabazi Pascal, aho avuga ko hari ingamba zihari zo kugera ku mpuzandengo ya 60% y’abanyeshuri bazajya biga amashuri y’imyuga n’ubumenyigiro, ariko kuri ubu bikaba bikiri kuri 31%.

Yagize ati: “Ugereranyije aho tuva n’aho tugana turacyafite intambwe nyinshi zo gutera ngo tubigereho, ariko burya na WDA ntimaze imyaka myinshi ni iyo muri 2010, guhera icyo gihe twatangiye gukora ibishoboka ngo tugere ku ntego ariko ntibirashoboka, gusa dufite ingamba.”

Avuga ko Leta igenera Ikigo k’imyuga n’ubumenyingiro ingengo y’imari ingana na miriyari 60 z’amafaranga y’u Rwanda, akaba ari mu rwego rwo gufasha amashuri ya TVET gutera imbere.

Ati “Ishoramari Leta ishyira muri iyi gahunda amafaranga atari make, amikoro y’igihugu urebye uko angana ubona gishyirwamo imbaraga nyinshi, amashuri makuru y’imyuga n’ubumenyingiro muri buri ntara arahari no mu Mujyi wa Kigali.”

Eng. Gatabazi avuga kandi ko hari miriyoni 80 z’amadorari yatanze na Leta muri gahunda yo kongera amashuri y’imyuga n’ubumenyingiro kugira ngo abanyeshuri bige neza nta bucucike, ndetse ngo ni muri ya ntumbero yo kugera kuri 60% by’abanyeshuri biga TVET.

Eng. Gatabazi Pascal, Umuyobozi Mukuru wa WDA (ibumoso) na Bideri John Bonds, perezida w’Inama y’ubutegetsi ya WDA

Umuyobozi Mukuru wa WDA ariko avuga ko hakiri imbogamizi y’ibikoresho bigezweho muri ayo mashuri, ngo kuko 50% by’amashuri ya TVET ntagira ibikoresho bihagije mu kwigisha abanyeshuri.

Avuga ko ibikoresho bivugwa muri TVET bigabanyijwemo ibice bibiri, igice k’ibikoresho bishira n’ibidashira, ariko ngo nta bwo ari uburyo bwo gutaka kubera ibitagenda, ngo ahubwo WDA igiye gukora ibishoboka kugira ngo habeho ikigega kihariye cyo guteza imbere ubumenyi bw’imyuga, kitavuye mu ngengo y’imari ya Leta.

Avuga ko mu gihe inzego zinyuranye zafatanya mu bikorwa no mu buvugizi, ngo intego y’igihugu yabasha kugerwaho.

Eng. Gatabazi avuga ko kuri ubu WDA ishinzwe igenzura ry’ireme ry’imyigishirize, ni mu gihe RP yo ifite mu nshingano imyigishirize. Ati “Ntiduteganya kwitana ba mwana twe na RP ahubwo tuzatahiriza umugozi umwe kugira ngo tugere ku ntego igihugu kihaye kugera mu 2024.”

Eng. Gatabazi yavuze ko hari n’uburyo bwo kugenzura imikorere y’abarezi bo mu mashuri y’imyuga n’ubumenyingiro kugira ngo bakore neza, harebwe niba imyitwarire yabo ikwiriye ndetse n’abanyeshuri bikaba uko.

Ati “Hari aho twakosorera imyitwarire y’abarimu, uburere bw’abanyeshuri, tugiye kugenzura aya mashuri, ahari intege nke mu miyoborere nayo tuyikosore, ahari abarimu batitwara neza, basiba, badategura ubona badatanga imbaraga zose bafite, bityo dusigare tuvuga icyo tudafite ariko ibyo dufite na byo tubikoreshe neza.”

Eng. Gatabazi avuga ko intego igihugu kihaye ikiri kure ariko ko imbaraga zigiye gushyirwa mu bukangurambaga kugira ngo Abanyarwanda babashe guhindura imyumvire, ababyeyi bohereze abana muri aya mashuri, abana na bo bumve ko kugana amashuri y’imyuga ari kimwe mu bikenewe mu kwihangira umurimo.

Ati “Ubu dufite intego yo gukora ubukangurambaga mu mwaka wose mu rwego rwo gushishikariza Abanyarwanda kwitabira amashuri y’imyuga, byarakozwe ariko biranakomeje, ndatekereza ko hari ikiziyongeraho kinini.”

Eng. Gatabazi yavuze ko hari na gahunda yo gukurikirana ikoreshwa neza ry’uburyo bugenerwa amashuri ya TVET kugira ngo bukoreshwe neza bubyazwe umusaruro ukenewe.

Umuyobozi Mukuru wa WDA avuga ko indi ngamba ari ugukorana n’Urwego rw’abikorera kugira ngo abanyeshuri biga TVET babone inganda bimenyerezamo umwuga, ni naho hari isoko ry’umurimo.

Ati “Gusa Urwego rw’abikorera mu Rwanda rurakiyubaka ariko kandi rugendera ku murongo mwiza, turashaka gukorana n’inganda z’abikorera kugira ngo babashe kwigira ku murimo no mu nganda bityo bagire ubumenyi buhagije.”

Avuga ko bifuza ko Urwego rw’abikorera rukorana cyane na TVET kugira ngo rugire uruhare mu bushobozi n’ubumenyi bw’abana b’u Rwanda mu myuga. Gatabazi avuga ko izi ngamba zose zivuzwe hejuru ari izizafasha kuzamura imibare y’abiga amashuri ya TVET ariko harimo n’ubumenyi bufite ireme.

Avuga ko ubushakashatsi bwakozwe bwagaragaje ko abasaga 70% by’abakoresha bishimira abakozi bahabwa n’amashuri ya TVET kuko icyo baba babatezeho bakibona, naho 66% barangije TVET ngo nyuma y’amezi atarenze atandatu baba babonye akazi.

Eng. Gatabazi avuga ko intego y’igihugu yo kongera imirimo igera kuri 1 500 000 idashingiye ku buhinzi izagerwaho byose biturutse ku biga amashuri ya TVET.

Avuga ko adashidikanya ko umuvuduko amashuri y’imyuga ariho na WDA, Intego Leta yihaye izagerwaho yo kugera ku banyeshuri 60% biga ibijyanye n’imyuga n’ubumenyingiro ndetse ngo n’imirimo idashingiye ku buhinzi iteganywa guhangwa nayo ngo ikaba yashobora kurenga ikenewe.

Ababyeyi na bo bemeza ko intego benshi muri bo bafite ari ukohereza abana mu mashuri y’imyuga kuko basanga ari yo azabafasha kujya ku isoko ry’umurimo hakiri kare kandi bakabasha kwihangira umurimo badategereje gusaba akazi.

Karangwa Jean Paul ni umubyeyi, aganira n’Imvaho Nshya yemeje ko amashuri y’imyuga akunzwe cyane muri iki gihe n’abanyeshuri ndetse n’ababyeyi kuko atuma umwana atangira gukora hakiri kare.

Avuga ko mbere amashuri y’imyuga yafatwaga nk’ajyamo abana b’abakene cyangwa abana b’abaswa, ariko ngo kuri ubu si ko biri kuko ngo usanga abana benshi babyiganira kujya mu mashuri y’imyuga.

Ati “Ibi bigaragaza ko ababyeyi bahinduye imyumvire bari bafite ku mashuri y’imyuga, byatumye abana batari bake batangira kuyitabira kuko basanga afite akamaro kanini.”

Izabayo Venantie na we ni umubyeyi, avuga ko imyumvire y’abana n’ababyeyi ku mashuri y’imyuga yahindutse, ngo ahubwo ubu ababyeyi benshi bifuza ko abana babo biga imyuga, uretse ko hari abana bataba bayishaka ariko yemeza ko ari yo myiza kwiga, kuko bizatuma uwayize atangira gukorera amafaranga hakiri kare, kandi akaba afite umwuga umutunze.

Eng. Gatabazi we asanga intego igihugu kihaye izagerwaho kuko hari ingamba nyinshi zafashwe zo kongera abanyeshuri bitabira amashuri y’imyuga n’ubumenyingiro kongeraho ingengo y’imari n’abafatanyabikorwa ba Leta bishimira gutera inkunga amashuri y’imyuga n’ubumenyingiro.

Guverinoma y’u Rwanda ishyize imbaraga mu guteza imbere imyuga n’ubumenyingiro hongerwa amashuri abyigisha mu gihugu (Foto Mukagahizi R)

 

Umwanditsi:

Mugisha Benigne

Tanga Igitekerezo

Email yanyu ntigaragazwa ku rubuga. Amazina na Email ni ngombwa.