Abibwira ko kwizigamira bikorwa n’abahembwa menshi baribeshya – Meya wa Rusizi

Yanditswe na Ingabire Rugira Alice

Ku ya 17-07-2019 saa 09:04:12
Meya Kayumba Ephrem yakanguriye abaturage kwizigamira kugira ngo bave mu bukene (Foto Ingabire A)

Umuyobozi w’Akarere ka Rusizi Kayumba Ephrem, yasabye abaturage bo mu karere ka Rusizi kugira umuco wo kwizigamira, no gukoresha neza umusaruro w’ubuhinzi n’ubworozi wabo, kuko kwiteza imbere utizigamira bidashoboka.

By’umwihariko abakora umurimo w’ubuhinzi bibukijwe neza ko bagomba gufata neza umusaruro wabo, bakirinda kuwumarira ku masoko, dore ko iki gihembwe k’ihinga cyatanze umusaruro ushimishije.

Ni ubutumwa Meya Kayumba yagarutseho ubwo yaganiraga n’abaturage b’Umurenge wa Nkungu muri aka karere.

Yagize ati: “Hari abantu batekereza ko kwizigamira bikorwa n’abakire cyangwa n’abahembwa amafaranga menshi ariko ni ukwibeshya, nta muntu ushobora gutera imbere atizigamiye, umucuruzi yakwizigamira niba urugero wungutse ibihumbi icumi wakwizigamira ibihumbi bibiri, ayo n’ubwo tuyita amafaranga makeya aratinda akagwira.

Abahinzi na bo turabashishikariza kwizigamira bafata neza umusaruro wabo bakagira umuco wo guhunika ntibawusesagure ahubwo bihaze mu biribwa, birinda kuwumarira ku isoko ahubwo uge ujyanwa yo igihe hari ikibazo cya ngombwa bagiye gukemura, kwizigamira ni byo bizatuma tugera ku iterambere rirambye.”

Abaturage bo muri uyu murenge bagaragaje ko izi mpanuro bahawe n’umuyobozi w’akarere bazishimiye, kandi bakaba bizeye ko bazazikurikiza zikabafasha kwiteza imbere.

Niyonzima Charles, utuye mu murenge wa Nkungu mu karere ka Rusizi yagize ati: “Twishimiye inama duhawe, twezaga imyaka tukumva ko ari bwo tugomba kunywa inzoga ihenze, nge nihereyeho mfashe ingamba zo kwizigamira ndi umuhinzi nzajya nkoresha umusaruro wange neza, nywuhunike.

Ndabiganiriza n’umugore wange kugira ngo tuge tuwukoresha mu bihe bya ngombwa nko mu kwishyurira abana bacu amashuri n’ibindi. ”

Mukarujeni Francoise, na we utuye mu murenge wa Nkungu yunzemo ati: “Ubuyobozi bwiza buduha ibitekerezo bidufungura mu mutwe bigatuma dutera imbere, ndi umucuruzi ndacuruza nkunguka ariko kenshi nagiye nisanga igishoro nacyo nagikoresheje.

Ubwo umuyobozi yatwigishaga nasanze naragiye nkora amakosa yo kutizigamira nkagura ibyo ntateganyije, ariko ngiye kujya nizigamira ku nyungu nkoreshe amafaranga ibiri ngombwa, ku buryo no mu masaziro nzaba mpagaze neza”.

Akarere ka Rusizi ni kamwe mu turere tugize Intara y’Iburengerazuba, ni akarere gafite amahirwe menshi yo kubona amafaranga kuko gahana imbibi n’ibihugu nka Repubulika Iharanira Demokarasi ya Kongo n’igihugu cy’u Burundi, bikaba bitanga amahirwe yo gukora ishoramari ryambukiranya imipaka.

Aka karere kandi gakora kuri Pariki y’Igihugu ya Nyungwe aho ba mukerarugendo baza kuyisura bitewe n’ibyiza nyaburanga biyirimo, hamwe n’Ikiyaga cya Kivu n’ibindi byinshi byatuma abagaturiye batera imbere.

Meya Kayumba Ephrem yakanguriye abaturage kwizigamira kugira ngo bave mu bukene (Foto Ingabire A)

Umwanditsi:

Ingabire Rugira Alice

Tanga Igitekerezo

Email yanyu ntigaragazwa ku rubuga. Amazina na Email ni ngombwa.