23°C , Mostly cloudy | Kigali-Rwanda
Umwe mu bayobozi b'ibigo by'amashuri wahawe mudasobwa(Foto Hakizimana Y)

Abayobozi b’amashuri barasabwa kongera ubumenyi mu ikoranabuhanga

Yanditswe na Hakizimana Yussuf

Ku ya 06-12-2018 saa 12:37:03

Ikigo k’Igihugu gishinzwe Uburezi (REB) cyasabye abayobozi b’ibigo by’amashuri kugira ubumenyi bwisumbuyeho mu ikoranabuhanga.

Abo bayobozi baranasabwa gukoresha ikoranabuhanga kugira ngo bazabashe gukurikirana uko abarimu bategura amasomo, bigisha abanyeshuri hagamijwe kunoza ireme ry’uburezi.

Ubu butumwa bwatanzwe mu muhango wo gushyikiriza ibigo 52 by’amashuri ya Leta bibarizwa mu Karere ka Rwamagana ibikoresho byifashishwa mu gutanga Interineti na mudasobwa 52, bizafasha aba bayobozi kunoza akazi bakora.

Uwasenga Sengati Diane ni umukozi w’Ikigo k’Igihugu gishinzwe Uburezi (REB) mu gashami k’ikoranabuhanga, yemeza ko uruhare rw’abayobozi b’ibigo by’amashuri ku ikoranabuhanga ari umusingi ukomeye ku ireme ry’uburezi.

Yagize ati: “Mu gihe tugezemo ikoranabuhanga ryihutisha akazi, no guhanahana amakuru, ubumenyi bw’umuyobozi w’ishuri ku ikoranabuhanga buzatuma ireme ry’uburezi ryiyongera kuko aba afite icyo aheraho, akamenya uburyo abarimu bategura amasomo, bakayigisha abana ku buryo butabagoye, abayobozi bagomba kugira ubumenyi ku ikoranabuhanga kandi bukaba bwagutse ni na yo ntandaro yo kunoza ireme ry’uburezi”.

Umwe mu bayobozi b’ibigo by’amashuri wahawe mudasobwa(Foto Hakizimana Y)

Kagingo Aloys ni umwe mu bayobozi b’ikigo cy’amashuri yisumbuye mu Murenge wa Rubona yagize ati: “Umuyobozi w’ikigo ni we koko ukwiye kugira ubumenyi bwisumbuye mu ikoranabuhanga kugira ngo azabashe kugenzura no gukurikirana ko amasomo yifashisha ikoranabuhanga atangwa neza. Twigishijwe gukora twifashishije ikoranabuhanga, hari ibyo Minisiteri y’Uburezi yashyizemo imbaraga nk’icyumba k’ikoranabuhanga aho umwana azajya yigishwa hifashishijwe ikoranabuhanga, ubu buryo tugomba kububyaza umusaruro.”

Abandi bayobozi b’ibigo by’amashuri na bo bemeza ko umuntu atanga icyo afite, Nyirampakaniye Antoinette yagize ati: “Ntawutanga icyo adafite niba umuyobozi w’ishuri nta bumenyi ku ikoranabuhanga afite, n’ubundi abana bo ku kigo ayobora nta bumenyi bazabona bufite ireme kuko n’ubagenzura nta cyo abiziho. Si icyo gusa kuko twanigishijwe amasomo ajyanye n’imiyoborere y’ibigo by’amashuri tukabihuza n’ikoranabuhanga kugira ngo buri wese abashe kumenya intumbero y’ikigo, ikoranabuhanga rero ni ngombwa.”

Mu rwego rwo gufasha aba bayobozi kuzajya babona ubumenyi bwisumbuye kandi bakarushaho kwiga bifashishije interineti, ibigo 52 byahawe na VVOB Education for Development, umushinga ugamije kuzahura ireme ry’uburezi mu Rwanda mudasobwa, n’ibikoresho bya Internet bizabafasha kunoza akazi no kubasha kwiga Iyakure.

Umuyobozi w’uriya mushinga Jef Peeraer yemeza ko mu turere 14 batanze mudasobwa 700 zizifashishwa n’abayobozi b’ibigo by’amashuri kugira ngo barusheho kunoza ireme ry’uburezi.

TANGA IGITEKEREZO

One Comment on “Abayobozi b’amashuri barasabwa kongera ubumenyi mu ikoranabuhanga”

  1. Nanjye ndi umwe mu bagezweho n’iyi gahunda. Turashimira cyane REB na VVOB kudutekerezaho bakaduha Laptop na Connection. Bigiye kudufasha kuzamura ubumenyi.
    Mukomereze aho gahunda igere Kuri benshi bashoboka

Leave a Reply

Your email address will not be published. Required fields are marked *