22°C , Mostly cloudy | Kigali-Rwanda
Abasenateri munteko rusange

Abayobozi bahabwa ibigo barasabwa gukoresha abakozi bafite ubumenyi

Yanditswe na SEZIBERA ANSELME

Ku ya 14-02-2018 saa 06:06:27

Bamwe mu bagize Inteko Ishinga Amategeko umutwe wa Sena barasaba abayobozi bashyirwa mu bigo binyuranye ko bakwiye kujya bashaka bakanagaragaza umubare w’abakozi bazifashisha bafite ubumenyi ku rwego tekiniki no ku buhanga babizobereyemo.

Abasenateri munteko rusange

Ibyo byagarutsweho tariki ya 12 Gashyantare 2018, ubwo abagize Sena bitabiraga Inteko rusange mu rwego rwo kwemeza abayobozi batatu basabiwe na Guverinoma imyanya y’ubuyobozi ku bigo 3 bitandukanye harimo na Laboratwari n’ibimenyetso bishingiye ku bumenyi n’ubuhanga bikoreshwa mu butabera.

Hon. Bajyana Emmanuel, avuga ko abahabwa imyanya yo kuyobora ibigo bajya bashaka n’abakozi bahagije bafite n’ubumenyi buhagije bwo gukoresha ibikoresho basanze aho bazakorera kuko hari ubwo usanga ikigo gifite ibikoresho bihenze kandi bihanitse nyamara nta bo kubikoresha cyangwa batabifitiye ubumenyi.

Hon. Bajyana asaba ko abo bayobozi bajya banateganyirizwa amahugurwa kuko hari ibigo biba bikeneye ubwo bumenyi busabwa ndetse n’ubwerekeranye n’ikoranabuhanga.

Akurikije Laboratwari y’u Rwanda, asaba abazayiyobora kujya bakira ibizamini vuba bitari byatakaza agaciro, ikindi ni ugushyira imbaraga mu bikorwa birimo amashanyarazi ahoraho ntabure kuko mu ibura ryayo hari ibizamini byangirika birimo ibya ADN n’ibindi.

Akomeza avuga ko bakwiye no kwibanda ku bijyanye no gutwara ibizamini (transport) kuko hari igihe bikererwa bigatuma byangirika bigapfa.

Senateri Dr Ntawukuriryayo Jean Damascene, avuga ko nubwo abashyirwa mu myanya y’ubuyobozi bw’ibigo bahabwa bitandukanye harimo na Laboratwari y’u Rwanda izaba ifasha ubugenzacyaha n’ubushinjacyaha kugira ngo ishobore gupima ibipimo bigaragara baba bagomba kugaragaza umubare w’abakozi bazamufasha ku rwego tekiniki no ku rwego rw’abahanga babizobereyemo.

Senateri Tito Rutaremara avuga ko kuba ibikoresho bihari, ubumenyi bw’abakozi bukaba butekerezwaho bizafasha kugabanya amafaranga yatangwaga ku bizamini byoherezwaga hanze y’igihugu ngo bige gupimwa, cyane cyane nk’ikizamini cya AND cyoherezwaga mu gihugu cy’u Budage kandi iyo Laboratwari izagabanya igihe byafataga kugira ngo ibisubizo bizagaragare ku watanze ikirego.

Dr Sezibera Richard we asanga kuba hari ibigo biba bihenze haba mu bikoresho n’abantu bazayikoramo nk’uko bigaragara kuri Laboratwari yashyiriweho umuyobozi, akaba asanga haba hakwiye abayikoramo babifitiye ubumenyi n’ubushobozi bihagije.

Dr Sezibera Richard atangaza ko akurikije uko iteye, imikorere yayo (technologie) izaba isaba guhindurwa mu myaka 5 iri imbere kandi bigasaba imbaraga zidasanzwe. Avuga ko kuba hagaragazwa ko harimo guhugurwa abasanzwe bayikoramo bitazatanga igisubizo cyari gitegerejwe, cyane ko yifuzwa ko igera ku rwego mpuzamahanga.

Aha akibaza uburyo iyo Laboratwari izabangikanwa n’indi itegurwa gushyirwa mu bihugu byo mu karere yateganywaga gushyirwa mu gihugu cya Uganda, kandi u Rwanda rusabwa gushyiramo amafaranga n’abakozi bayikoramo.

Perezida wa Komisiyo ya Sena ishinzwe Politiki n’imiyoborere myiza, Sindikubwabo Jean Nepomscene, avuga ko abanyuze imbere y’iyo komisiyo ngo bemezwe gushyirwa mu myanya bayigaragarije uburyo inzego zubatswe, bakayimurikira uburyo abakozi batangiye guhugurwa bari mu zindi Laboratwari, batangaza uburyo ibikoresho bihari haba ku rwego rw’amavuriro, ibigo bya Polisi bizajya biborohereza gupfunyika ibizamini byafashwe bikagezwa kuri Laboratwari y’u Rwanda bitangiritse.

Ku bijyanye no kuba hari indi Laboratwari iteganywa mu karere ishobora kugorana kubangikanywa n’iyo mu Rwanda, Sindikubwabo avuga ko u Rwanda nk’igihugu rujya gutekereza kuyishyiraho rwari rufite ayo makuru ku yindi itegurwa mu karere.

Akomeza ahamya ko rwayitayeho ko iyo Laboratwari itazaba ikibazo ahubwo izaba igisubizo kandi izaba ireba isoko ryo mu gihugu n’iryo mu karere. Ku byerekeranye n’ibikoresho n’abakozi n’imikorere, abaganira na komisiyo nabo bayemereye ko ari ikibazo bagenda babona kandi igishyizwe imbere ari uko hashyirwa imbaraga muri ibyo byose.

Perezida wa Sena y’u Rwanda Bernard Makuza ashima uburyo Komisiyo ya sena ishinzwe politiki n’imiyoborere myiza ishyira mu bikorwa ikanuzuza ishingano zayo, kandi agasanga ari na ngombwa kujya habaho kwegera inzego zibifite mu nshingano mu buryo bwa hafi ibyibazwa byose bigakomeza kubonerwa amakuru.

 

 

 

 

 

TANGA IGITEKEREZO

Leave a Reply

Be the First to Comment!

avatar