Abavoka bari mu bagize uruhare mu gushimangira ihame ry’uburinganire – CNF

Yanditswe na Sezibera Anselme

Ku ya 14-08-2019 saa 18:27:14
Umunyamabanga Nshingwabikorwa wa CNF Kamanzi Jacqueline uwa 2 iburyo, ubanza iburyo ni Me Manyecket Sylvie, uwa 2 uvuye ibumoso ni Me Kavaruganda Julien na Me Kalugu Celine (Foto Gentil)

Umunyamabanga Nshingwabikorwa w’Inama y’Igihugu y’Abagore (CNF) Kamanzi Jacqueline, ashimangira ko umwuga w’Abavoka uri mu byagize uruhare mu gushimangira ihame ry’uburinganire hagati y’abagore n’abagabo mu Rwanda.

Ibyo Kamanzi yabigarutseho nyuma yo gutangiza inama y’iminsi 2 y’Ihuriro mpuzamahanga ry’abagore bakora umwuga w’abavoka hirya no hino ku Isi irimo kubera i Kigali kuva tariki ya 14-15 Kanama 2019.

Iyo nama yitabiriwe n’abagera kuri 400 bavuye mu bihugu binyuranye ifite insanganyamatsiko igira iti: “Uruhare rw’abagore b’abavoka muri sosiyete”.

Nk’uko Kamanzi yabigarutseho, asanga igihe umubare w’Abavoka uzaba wabaye mwinshi biba ari byiza kubera inshingano bafite zijyanye no kunganira abantu mu mategeko. Ati: “Umwuga w’Abavoka uri mu byahaye imbaraga mu ishyirwa mu bikorwa ryo gushyigikira ihame ry’uburinganire n’ubwuzuzanye mu Rwanda. Nk’uko Perezida Kagame Paul yabikomojeho, ni ngombwa kubahiriza uburenganzira bw’abagore hatagombeye amategeko. Iyo umubare wabo mu mwuga w’abavoka ari mwinshi nk’abantu batawumenyerewemo, biba ari ikimenyetso kiza kerekana inzira y’iterambere ry’umugore mu Rwanda, bikaba inzira ituma abantu bajya mu mirimo bikagirira n’Igihugu akamaro.”

Avuga ko uburinganire bwagiye bubangamirwa rimwe na rimwe n’imyemerere y’abantu ishingiye ku madini, ariko ku rundi ruhande n’umuco ukabigiramo uruhare.

Kamanzi avuga ko no mu buzima busanzwe abagore bakunda ukuri, bakanga akarengane kandi bagakunda ko abantu bamererwa neza, agasanga igihe bijyanishijwe n’umwuga w’ubwavoka bunganira abantu bafite imanza, bafite ibibazo birebana n’ubutabera, biba byiza kuko banasora Igihugu kigatera imbere.

Ati: “Kugira abagore b’Abavoka ni ikimenyetso kigaragaza ko igihugu cyacu cyateye imbere kandi hariho gahunda yo kwinjizamo n’abandi benshi. Kuba hariho ihuriro ry’abagore b’Abavoka hirya no hino ku Isi (RIFAV), rinifuza ko hano mu Rwanda haba nk’ishami ry’iryo huriro, mu bigamijwe ni uko natwe iryo huriro twarigira kuko twari dusanzwe dufite abagore bari mu rugaga rw’Abavoka ku rwego rw’u Rwanda ariko batari muri ririya huriro rigari bagenzi babo barimo. Ikitezweho ni ukureba uburyo iryo huriro ryakwandikwa hano mu Rwanda bityo na bo bakaribamo.

Mu gihe u Rwanda ruzaba rumaze kwinjira muri iryo huriro, hari ubufatanye Abavoka bacu b’Abagore bazagira hamwe n’abandi bityo bikabafasha guhuza, kurandura imbogamizi y’imyumvire abantu bari babafiteho ko batari muri uwo mwuga ahubwo ari uw’abagabo.”

Umuyobozi ushinzwe urugaga rw’abavoka b’igitsina gore bibumbiye mu rugaga rw’Abavoka mu Rwanda Me Kalugu Celine, avuga ko igitekerezo cyafatiwe i Bujumbura ubwo abagore bakora umwuga w’Abavoka bahuraga bakiyemeza gushyiraho Ihuriro rihuza abagore benshi bakora uwo mwuga mu bihugu bitandukanye (RIFAV) bamaze igihe mu mwuga kandi bazi ibibazo bahura na byo, kugira ngo bigishe abashya bawinjiramo kugira ngo babafashe kubona icyo bazatanga nk’umusaruro muri sosiyete zose.

Me Kalugu avuga ko nyuma yo gusanga u Rwanda rufite umwanya mwiza wahaye umwari n’umutegarugori, biyemeje kuba ari ho hafungurirwa iyo nama ari nayo mpamvu bateraniye i Kigali kuri uyu wa 14-15 Kanama 2019 kugira ngo urugaga rw’Abavoka b’abagore mu Rwanda babe ari bo babyamamaza kandi babisangize inzego zose kugira ngo nizishobora kugira ubufasha babaha.

Ni inama yahuje abagore bakora umwuga w’Abavoka bakomotse mu bihugu birimo Cote d’Ivoire, Burundi, Repubulika Iharanira Demokarasi ya Kongo, Benin, Djibouti, Congo Brazaville, Cameroun, Burukinafaso, u Bufaransa n’u Rwanda nk’ibihugu bihujwe n’ururimi rw’Igifaransa.

Mu kiganiro yahaye abanyamakuru, Me Kalugu yagarutse ku mbogamizi zikibangamiye abagore bakora umwuga w’Abavoka. Agira ati: “Amikoro makeya ari mu mbogamizi zikigaragara kuko ntabwo ari akazi gahemba buri kwezi bisaba kumenya gushaka abakiriya kandi uwukora akagaragaza ko afite ubunararibonye mu rwego runaka. Icya kabiri ni uko umusanzu ugenda uzamuka cyane ariko usanga binaterwa n’imiterere y’ibiciro ku masoko, bikanaterwa no kuba dufite ubwishingizi mu kwivuza butuma dusabwa kuzamura amafaranga kugira ngo tubone ayo dukuramo kugira ngo tubashe kubaho neza.”

Me Kalugu avuga ko nk’abagore bakora umurimo w’Abavoka igihe bazaba bamaze kwinjira neza muri iryo huriro asanga bazaryungukiramo ubuvugizi bukomeye kandi buzabafasha kugera ahantu henshi no kubona ibintu byinshi kandi bigatanga amahirwe cyane ku bavoka bashya binjira mu mwuga b’abagore.

Manyecket Sylivie wazanye igitekerezo cyo gushinga Ihuriro ry’Abavoka b’igitsina gore ku rwego mpuzamahanga (RIFAV), avuga ko abagore bakora uwo mwuga usanga badahabwa agaciro mu bihugu bimwe aho bababona nk’abadashoboye cyangwa abatabasha kuzuza inshingano zabo ku bakiriya babagana igihe batwite, babyaye, bigatuma urubanza barimo rudindira.

Gusa ashimangira ko u Rwanda rwabaye intangarugero ku Isi mu kugaragaza ko umugore ashoboye, ari nayo mpamvu bagomba kurwigiraho bakanahafungura ishami ry’Ihuriro.

Me Kavaruganda Julien, Perezida w’Urugaga rw’Abavoka mu Rwanda, avuga ko Ihuriro mpuzamahanga ry’abagore bakora umwuga w’Abavoka (RIFAV) ryabashimishije kandi rigahitamo kuza gukorera inama mu Rwanda kuko bifasha mu gusangizanya uburyo banoza umwuga wabo kandi bakagira uruhare runini muri sosiyete baba bakorera.

Avuga ko ku Rwanda ari byiza kuko rwagaragajwe nk’intangarugero mu bindi bihugu mu guha abagore agaciro kandi bishingiye kuri uwo mwuga bizatuma rutanga ubufasha, ubushobozi n’ingero bagenzi babo bagenderaho mu kujya kubaka ibihugu byabo n’ingaga baturukamo kandi bakajyana amakuru meza y’uko mu Rwanda bikora.

Me Kavaruganda avuga ko abagore bamaze kwinjira muri uwo mwuga batanga ibisubizo by’umwihariko ku bijyanye n’ihohoterwa rishingiye ku gitsina kuko benshi babumva kurusha uko bakunganirwa n’umwavoka w’umugabo. Hari kumenya ibibazo bijyanye no kubaka umuryango no kubasha kubikurikirana cyane kurusha abagabo.

Inama y’Ihuriro (RIFAV) yitabiriwe n’abavoka b’abagore 200 bahagarariye ibihugu binyuranye harimo abagera kuri 80 ku ruhande rw’u Rwanda. Muri rusange mu Rwanda habarurirwa abavoka bose hamwe 1200 abagore muri bo bakaba bagera kuri 280.

Umunyamabanga Nshingwabikorwa wa CNF Kamanzi Jacqueline uwa 2 iburyo, ubanza iburyo ni Me Manyecket Sylvie, uwa 2 uvuye ibumoso ni Me Kavaruganda Julien na Me Kalugu Celine (Foto Gentil)

Umwanditsi:

Sezibera Anselme

Tanga Igitekerezo

Email yanyu ntigaragazwa ku rubuga. Amazina na Email ni ngombwa.