21°C , Partly cloudy | Kigali-Rwanda

Abatwara abagenzi baributswa kubahiriza amabwiriza agenga serivisi batanga

Yanditswe na Tumukunde Georgine

Ku ya Oct 31, 2018 saa 9:19

Urwego Ngenzuramikorere (RURA) rurakangurira abatwara abagenzi gukora kinyamwuga, bakubahiriza amabwiriza yashyizweho agenga serivisi zo gutwara abantu n’ibintu.

Uru Rwego rugaragaza ko hari byinshi byagezweho mu guteza imbere serivisi zo gutwara abantu n’ibintu, ariko hari ibitaranozwa; aho usanga abashoferi bamwe batitwara neza, abafite kompanyi zitwara abagenzi na bo hari ibyo batubahiriza.

Bamwe mu bagenzi, abashoferi n’abafite kompanyi zitwara abagenzi na bo bagaragaza ko hari ibikwiye kunozwa.

Tuyishime Emerence ukorera mu Mujyi wa Kigali agataha mu Karere ka Muhanga yagize ati: “ Kuva i Kigali ujya i Muhanga bavuga ko ari hafi ugasanga umushoferi bamuhaye kuhagenda inshuro nyinshi ku munsi. Bidutera impungenge z’uko yananirwa agakora impanuka”.

Murera Pasteur umushoferi ukorera ku murongo wa Rubavu-Karongi yagize ati: “Abashoferi batitwara neza barahari; bamwe babyukana umunabi bitewe wenda n’ibibazo byo mu muryango cyangwa baraye mu nzoga, bene nk’abo bakwiye gukurikiranwa”.

Ruhamiriza Eric Umunyamabanga Nshingwabikorwa w’Ihuriro ry’Abatwara Abagenzi mu Rwanda (A.T.P.R), agaragaza ingamba zafashwe zo gukomeza kunoza serivisi zo gutwara abagenzi, ati: “Ku bufatanye na Polisi y’u Rwanda na RURA tugerageza gutanga amahugurwa menshi kugira ngo dukangurire abatwara abagenzi kwitwararika, birinda gutwara basinze cyangwa banyoye ibiyobyabwenge. Ubu abashoferi bahabwa ibyangombwa na RURA natwe tugira ibyo tubaha ku buryo iyo hari ugaragayeho amakosa ahabwa ibihano”.

Yongeraho ati: “Iyo tuzi ko umuntu yakoze ikosa afite ikarita biroroha kumukurikirana, kandi uyifite na we agomba kwitwara neza kuko aba abizi neza ko nakora ikosa atava muri sosiyete yakoragamo ngo ajye mu yindi, kandi ko nabura akazi akicara azaba ateje ikibazo umuryango we. Dushimira RURA yashyizeho ariya makarita”.

Ku kibazo cy’abakoresha bananiza abashoferi babaha imihigo idashobotse; bagakora amasaha y’ikirenga ku munsi, Ruhamiriza yagize ati: “Icyo kibazo kigeze kugaragara ariko ku bufatanye na Minisiteri y’Ibikorwa Remezo twakoze igenzura tureba amasezerano abakoresha bagirana n’abashoferi, tureba niba babaha ubwishingizi. Tugira n’umwanya wo kuganira n’abashoferi, kugeza ubu icyo kibazo cyo gukora amasaha y’ikirenga twizera ko cyakemutse nta cyo bakitugaragariza”.

Abatwara abagenzi barakangurirwa gutanga serivisi nziza

Imyitwarire igomba kuranga umushoferi

Ndagijimana Aaron Umuyobozi ushinzwe ubugenzuzi (Transport inspection) muri serivisi zo gutwara abantu n’ibintu muri RURA yagize ati: “Turifuza abashoferi bakora kinyamwuga kugira ngo serivisi zigende neza; abashoferi bakwiye kugira imyumvire y’uko umugenzi ari we ubatunze, ari we ubahemba, ari we utuma baba bari muri kariya kazi, kuko adahari umushoferi ntiyabaho na kompanyi ntiyabaho”.

Ibyagezweho mu kunoza serivisi zo gutwara abantu n’ibintu ni byinshi ariko haracyari ibikeneye kunozwa nk’uko bigarukwaho na Mukamurera Vénérande ukuriye ishami rishinzwe kurengera abafatabuguzi muri RURA, anibutsa abashoferi imyitwarire ikwiye kubaranga.

Ati: “ Umushoferi agomba kugira isuku ku mubiri we, akagirira isuku ikinyabiziga atwaye, akarangwa n’imyitwarire myiza, akubaha abagenzi n’abo bahuje umwuga, akambara imyambaro imuranga (impuzankano) igaragaza kompanyi akorera n’ikarita y’akazi”.

Ibindi umushoferi agomba kwitaho

Mukamurera Vénérande asobanura ibindi umushoferi akwiye kwitaho agafasha abagenzi kumererwa neza mu rugendo.

Ati: “Mu gihe imodoka yuzuye, mbere yo guhaguruka akwiye gusuhuza abo agiye gutwara, akababwira amazina ye, akanabasobanurira ibijyanye n’urugendo bagiye gukora, bituma abagenzi bumva bisanzuye ”.

Abashoferi bagomba no kuzirikana ko hari abagenzi baba bafite intege nkeya, barwaye cyangwa bafite ubumuga bakabafasha kugera mu modoka.

Umushoferi agomba guhora agenzura ikinyabiziga, ibyangiritse bigasimbuzwa bidatinze.

Mukamurera avuga ko kugaragaza ibiciro by’ingendo mu modoka byemejwe n’Urwego Ngenzuramikorere na byo bitagomba kwirengagizwa.

Abashoferi baributswa ko hari ibihano bihabwa uwakoze ikosa

Ndagijimana Aaron Umuyobozi ushinzwe ubugenzuzi muri serivisi zo gutwara abantu n’ibintu muri RURA asobanura ko hari amakarita y’ikoranabuhanga abashoferi bahawe abaranga anifashishwa mu kugenzura imyitwarire yabo.

Yasobanuye imikorere yayo agira ati: “Ni ikarita iriho imyirondoro y’umushoferi, iyo umukozi wa RURA amufashe akoze ikosa yandika iryo ikosa yifashishije ikoranabuhanga, imashini ikamukata amanota. Umushoferi iyo akomeje gukora amakosa, akagira amanota ari munsi ya 40% (ageze mu ibara ry’umutuku) ikoranabuhanga rimwambura ikarita, icyo gihe ntaba yemerewe gutwara abagenzi”.

Umushoferi ashobora guhagarikwa igihe cy’amezi 3, amezi 6, umwaka, cyangwa burundu bitewe n’amakosa yakoze. Mu Rwanda hose nta ho aba yemerewe gukorera atwara abagenzi, ashobora gutwara indi modoka itagenewe gutwara abagenzi bishyura.

Iyo ibyo bihano byo kumuhagarika by’agateganyo birangiye, asubirana amanota 100%. Nyuma y’igihe kinini ahagaritswe, hari amahugurwa ahabwa hakarebwa niba ashobora kongera gutwara abagenzi, iyo binaniranye avanwa muri uwo murimo burundu.

Ndagijimana Aaron ati: “Iyo ushaka gutwara abantu ugomba kubanza ukagira ubumuntu, ukirinda imyitwarire mibi, ukirinda ubusinzi, kunywa ibiyobyabwenge n’ibindi bishobora gushyira ubuzima bw’abantu mu kaga”.

Abafite kompanyi zitwara abagenzi bagomba korohereza abashoferi mu kazi

Abafite kompanyi zitwara abagenzi bagomba kwita ku bashoferi bakoresha, bakabaha amasaha y’akazi atavunanye, bakabashakira ubwishingizi, bakabahemba ku gihe n’ibindi bituma bakora akazi kabo neza.

Ndagijimana Aaron avuga ko abakoresha abashoferi amasaha y’ikirenga baba birengagiza ko umushoferi unaniwe ashobora gukora impanuka cyangwa hakabaho n’izindi ngaruka zishyira ikinyabiziga n’abagenzi mu kaga.

Yagize ati: “Iyo umushoferi ananiwe ashobora gukora impanuka byoroshye, akaba yatakaza buzima n’abo atwaye bakabutakaza, umukoresha na we agatakaza amafaranga kandi n’ubuzima bw’abari mu modoka buba bumureba kuko iyo bigaragaye ko abifitemo uruhare; mu byo yashoboraga gukora cyangwa atakemuye ikibazo runaka bikaba intandaro y’impanuka, arabibazwa. Abakoresha na bo tubasaba gukora kinyamwuga, babungabunge ubuzima bw’abantu batwara n’abo bakoresha ndetse n’ imari bashoye bagura izo modoka n’ibindi ntibabishyire mu kaga”.

RURA ikomeje gukora ubukangurambaga kugira ngo abashoferi ndetse n’abakoresha babo bagire imikorere inoze. Ikomeje gukora ubugenzuzi ireba ko amabwiriza yo gutwara abantu n’ibintu yubahirizwa.