24°C , Partly cloudy | Kigali-Rwanda

Abaturarwanda ntibagire  impungenge zo gutekesha Gazi-RURA

Yanditswe na Tumukunde Georgine

Ku ya Mar 28, 2018 saa 8:52

Guverinoma y’u Rwanda, muri gahunda yayo y’imyaka  7 (2017-2024),  ifite intego yo kugabanya ikoreshwa ry’ibicanwa bituruka ku bimera ( inkwi, amakara)  bikava  kuri 86.3%  bikagera kuri 42%, mu rwego rwo gukomeza kubungabunga ibidukikije no korohereza Abaturarwanda kubona ibindi bicanwa. Ni yo mpamvu ikangurira  Abaturarwanga gukoresha ubundi buryo bwo guteka burimo n’ubwa Gazi.

Gaz ishyirwa mu macupa agapfundikirwa neza

 

Ikigereranyo cyakozwe n’inzego zitandukanye zirebwa n’ikibazo k’ibicanwa  kigaragaza  ko  gutekesha Gazi (LPG)  ari  uburyo bwiza buhendutse kurusha amakara n’inkwi, bufite isuku, butangiza ibidukikije kandi ntibugire ingaruka ku buzima kuko butagira imyotsi ishobora kwangiza   imyanya y’ubuhumekero.

Abaturarwanda ntibakwiye  kugira  impungenge zo gukoresha Gazi, batinya ko yaturika  kuko amacupa ishyirwamo aba afunze neza kandi agenzurwa,  hakarebwa ubuziranenge bwayo nk’uko bitangazwa n’Urwego Ngenzuramikorere (RURA).

Eng.  Rusine Gérard  Umuyobozi w’Ishami rishinzwe kugenzura  Gazi n’ibikomoka kuri Peteroli muri  ( RURA), yagize ati: “ Amacupa aba afunze neza, Gazi ntiyapfa guturika cyangwa ngo ipfe  gusohoka.  Kugira ngo icupa riturike  ni uko ryaba ryarabitswe nabi cyangwa rimaze igihe kinini ku isoko, ni yo mpamvu  buri myaka 10 icupa risuzumwa hakarebwa niba ritarangiritse. Ubu mu Rwanda amacupa ahari afite uburambe bw’imyaka 30.”

Abakoresha Gazi ntibaragera  kuri 1%

Eng.  Rusine avuga ko ubu barimo gukangurira  abaturage gukoresha Gazi kuko umubare w’abayikoresha ukiri muto utaragera    kuri 1% mu Gihugu hose, mu migi nturagera ku 10%.

Ati: “Abaturarwanda batinyuke gutekesha  Gazi,  bareke gukoresha amakara n’inkwi kuko  byangiza  ibidukikije kandi na bo ubwabo bikabangiza kubera imyotsi. Icyo nabizeza ni uko mu nganda bakora ku buryo umuturage abasha gukoresha Gazi ntibe yateza impanuka ngo itwike, kandi mu gihe hari iyasohotse mu icupa bihita bimenyekana kubera umwuka wayo udasanzwe, bityo umuntu akaba aretse gucana. Tugiye kurushaho kugenzura amacupa  aturuka hanze, anashyirweho ibimenyetso by’uko yagenzuwe, umuturage azage ayagura abanje kureba ko afite icyo kimenyetso cy’ubuziranenge.”

Uwitabiriye gutekesha Gazi ntasubira inyuma

Bamwe mu baturage batekesha Gazi bavuga ko uwamaze kuyikoresha adashobora kuyireka.

Ugirimana Liliane utuye mu Murenge wa Kigarama mu Karere ka Kicukiro yagize ati: “Nange nabanje kuyitinya, nkumva ko nacana igaturika ariko ibyo nibwiraga si byo […],  nyimaranye imyaka ibiri, nayiguze habaye imurikagurisha bansobanurira uko nzajya nyikoresha, narayimenyereye numva nta bundi buryo nakoresha mu guteka, amakara narayaretse burundu.”

Ndahiro John umucuruzi uhagarariye zimwe muri kompanyi zicuruza  Gazi  mu Mujyi wa Kigali  yagize ati: “Uwatekesheje Gazi ahita yumva ari byiza ntashobora kubireka, nashishikariza n’abandi kubigerageza. Kuyitekesha birihuta, bitandukanye n’inkwi cyangwa amakara.”

Abacuruza Gazi bagomba gusobanurira abaturage uko ikoreshwa

Abacuruza Gazi bagomba kujya basobanurira abaturage baje kubagurira uko bayikoresha n’uburyo bayibika. Bakamenya  ko hari n’uburyo bwo kuyikoresha neza ntishire vuba,  ikaba yanatekeshwa ibishyimbo aho kubitekesha amakara nk’uko bamwe babigenza.

Abacuruzi ba gaze bato na bo barebwa n’amabwiriza mashya

Gusobanurira abaturage biri no mu mabwiriza mashya yashyizweho na RURA.

Amabwiriza arebana n’ ubucuruzi bwa Gazi

Muri 2016  ni bwo RURA yatangiye kugenzura ibijyanye n’ubucuruzi bwa  Gazi. Muri Mutarama 2018, yashyizeho amabwiriza mashya asimbura ayagenderwagaho  kuva muri 2012.

Amabwiriza mashya ateganya ibigenderwaho mu kuzana Gazi mu gihugu, kubaka inganda zo kuyibika, kuyishyira  mu macupa mato, imikorere y’abayiranguza  n’ abayicuruza ku  masoko mato.  Ugiye gukora kimwe muri ibi bikorwa agisabira uruhushya muri RURA.

Kuba buri gikorwa gitangirwa uruhushya bifasha mu kugenzura imikorere y’abashoramari muri ubu bucuruzi  na serivisi zihabwa abaturage ku buryo nta ruhande rubangamirwa.

Amabwiriza ateganya n’ibihano

Nyuma yo kwigisha no gusobanurira abashoramari ku bijyanye na Gazi, abatubahiriza amabwiriza bahabwa ibihano.

Eng.  Rusine ati: “ Nubwo twashyizeho ibihano si uburyo bwo kunaniza abashoramari ahubwo ni ukugira ngo  imikorere igende neza; abari muri ubu bucuruzi ntibabangamire bagenzi babo n’abaturage babone serivisi nziza.”

Yagarutse kuri bimwe mu bibazo bizakemuka hakurikijwe amabwiriza yashyizweho.  Ati: “ Natanga  urugero,  hari  bamwe binjira mu bucuruzi bwa Gazi  ntibazane amacupa yabo bagakoresha ay’abandi  bigatuma uwazanye aye ku isoko  atamugarukira  agahomba,  mu gihe wa wundi ukoresha ay’abandi yunguka cyane. Ibihano byashyizweho kugira ngo bice ako  kajagari, bityo abantu bashishikarire kwinjira mu bucuruzi bitewe n’uko  bufite umurongo mwiza uhamye.”

Hashyizweho n’uburyo bwo kwandikisha amacupa agakurikiranwa, uwayazanye ku isoko ntazage ayabura.  Abacuruza Gazi  bagomba kuzajya bagura  amacupa ku muntu ufite icyangombwa gitangwa na RURA.

Kubaka ibigega bya Gazi

Eng.  Rusine Gérard avuga ko amabwiriza ya RURA ateganya ko  abashoramari bashobora no kubaka  ibigega bya Gazi hafi y’ingo ziri mu midugudu,   buri rugo rukajya ruyikoresha,  rukishyura  iyo rwakoresheje hifashishijwe  mubazi (compteur).

Hari gahunda yo kongera ububiko bwa Gaze mu Gihugu

Ati: “ Iyi  ni gahunda ikoreshwa mu bindi  bihugu  byateye imbere no mu Rwanda turashaka ko ihagera.”

Guverinoma y’u Rwanda irateganya no kubaka  ibigega binini ku buryo Igihugu kigira ububiko bwa Gazi ishobora kumara  nk’amezi abiri, kuko kugeza ubu ibigega bihari ari bito.

RURA yatanze igihe kingana n’umwaka kugira ngo abashoramari banini mu bya Gazi babanze basobanurirwe amabwiriza mashya banitegure kuyakurikiza, na ho abacuruzi  bato bo bahawe amezi atatu.

Uko ibiciro bya Gazi bihagaze

Ku  kibazo cy’uko abaturage bamwe bavuga ko ibiciro bya Gazi biri  hejuru, Eng.  Rusine avuga ko kugeza ubu nta mabwiriza arashyirwaho arebana n’igiciro ngo hagenwe  ikitagomba kurenzwa,  yizeza ko  igihe hazaba hariho abayicuruza benshi bahanganye  ku isoko ibiciro bizamanuka, ariko ngo  n’ubu ntibiri hejuru cyane ugereranyije n’ibihugu bituranye n’u Rwanda.

Serivisi zo kugurisha Gazi zegerejwe abaturage hirya no hino mu Gihugu cyane cyane mu migi,  kuri za sitasiyo z’ibikomoka kuri Peteroli hafi ya zose irahaboneka.

RURA irakangurira abaturage kujya bayigezaho ibibazo bahura na byo mu bijyanye na Gazi; byaba ibishingiye ku macupa bahawe atameze neza, atuzuye n’ibindi, bagahamagara kuri terefoni itishyuzwa ya 3988 cyangwa bakohereza ubutumwa kuri info@rura.rw  bakoresheje interineti.