21°C , Partly cloudy | Kigali-Rwanda
Me Rwangeyo Gasana Desire , Umuhuzabikorwa w’Urwego rwa MAJ mu karere ka Nyarugenge ( iburyo), Mwananawe Aimbable, Umuyobozi wa IMRO hagati na Dr Kagabo Aflodis umuyobozi wa HDI

Abaturage basuzugura ibyemezo bya MAJ banenzwe kudindiza ubutabera

Yanditswe na Mukagahizi Rose

Ku ya 11-01-2019 saa 18:26:42

Abaturage baragirwa inama yo kubaha ibyemezo by’inzu z’ubufasha mu by’amategeko ziri mu turere zizwi nka MAJ, kuko ngo babirengaho bagashaka guhangana, bikadindiza ubutabera.

Me Rwangeyo Gasana Desire, Umuhuzabikorwa wa MAJ mu Karere ka Nyarugenge, aravuga ko imyumvire ya bamwe mu baturage iza ku isonga mu bibangamiye ubutabera.

Me Rwangeyo yavuze ko kugeza ubu ikibazo gihari nyamukuru mu birebana n’ubutabera ari imyumvire, aho usanga abantu bamwe bagifite batanyurwa n’uburyo bakemuriwe ibibazo.

Yagize ati, “Aha rero usanga umuntu yirirwa mu nzego avuga ko ikibazo ke banze kugikemura. Ni mu gihe kiba cyasuzumwe ugasanga nta shingiro, wamubwira uti ‘taha ikibazo cyawe nta mpamvu yacyo’ aho kugira ngo abyumve gutyo ahubwo akajya ahandi.”

Akomeza agira ati, “Haracyari ikibazo k’imyumvire kuko niba abantu babiri batatu bakubwiye bati ‘ikibazo cyawe nta shingiro gifite’ wari ukwiriye kubyumva.”

Me Rwangeyo Gasana Desire , Umuhuzabikorwa w’Urwego rwa MAJ mu karere ka Nyarugenge

Yabivugiye mu kiganiro nyunguranabitekerezo cyahuje komite mpuzabikorwa y’urwego rw’ubutabera mu Karere ka Nyarugenge JRLOS (Justice, Reconciliation, Law and orders Sector) n’imiryango ya sosiyete sivile yishyize hamwe kugira ngo itange umusanzu wayo mu rwego rw’ubutabera.

Avuga ko hari abantu kugeza ubu batanyurwa nyuma yo guhabwa inama bakavuga ko bashaka umuyobozi w’akarere.

Iki kibazo hamwe n’ibindi birebana n’ubutabera ni byo byatumye imiryango ine ya sosiyete sivile ikora ibirebana n’ubutabera irimo Ihorere Munyarwanda Organization I.M.R.O, Health Development Initiative HDI, Rwanda NGOs Forum on AIDS and Health Promition na Great Lakes Initiative for Human Rights and Development G.L.I.H.D yishyira hamwe hagamijwe ko ubutabera bwarushaho kugera mu baturage, banafatanyiriza hamwe na komite mpuzabikorwa y’urwego rw’ubutabera mu Karere ka Nyarugenge kureba uko ibibazo by’akarengane byagaragara.

Umuyobozi w’Umuryango utari uwa Leta wita ku buzima HDI, Dr Kagaba Aphrodis, yavuze ko bashishikajwe no gutanga umusanzu wabo mu kwigisha abaturage guha agaciro ibyo inzego zibabwira kuko umuyobozi w’akarere adashobora gukemura ibibazo by’akarere kose ngo bizashoboke ahubwo ko afite abo akorana na bo kugira ngo bamufashe akemure ibibazo by’abaturage noneho babone umwanya wo gukora bita ku nyungu zabo kurusha kwirirwa birukanka mu nzego.

Mwananawe Aimable, Umuhuzabikorwa ku rwego rw’Igihugu mu muryango Ihorere Munyarwanda I.M. R.O, umuryango nyarwanda ukora muri segiteri y’ubuzima, ubutabera cyane cyane bareba uruhare sosiyete sivile yagira mu gutanga ibitekerezo mu ishyirwa mu bikorwa cyangwa se gutanga ibitekerezo by’ishyirwaho ry’amategeko, avuga ko ari ngombwa ubufatanye kugira ngo niba hari akarengane mu baturage hashakwe uburyo kakemuka, ibyakemutse bishyirwe muri raporo kandi barusheho gusenyera umugozi umwe mu kugeza ubutabera kuri buri wese.

Me Rwangeyo Gasana Desire , Umuhuzabikorwa w’Urwego rwa MAJ mu karere ka Nyarugenge ( iburyo), Mwananawe Aimbable, Umuyobozi wa IMRO hagati na Dr Kagabo Aflodis umuyobozi wa HDI

TANGA IGITEKEREZO

Leave a Reply

Your email address will not be published. Required fields are marked *