23°C , Mostly cloudy | Kigali-Rwanda
Umukozi ushinzwe guhuza ibikorwa muri CLADHO wamuritse ibyavuye mu bushakashatsi Murwanashyaka Evariste (Foto Sezibera A)

Abaturage 73% bagerwaho n’ingaruka zo kudasobanukirwa itegeko ry’ubutaka

Yanditswe na Sezibera Anselme

Ku ya 06-12-2018 saa 15:38:25

Impuzamiryango yita ku burenganzira bwa muntu (CLADHO) iravuga ko mu bibazo yasanganye abaturage mu bijyanye n’ubutaka, iby’ibanze bishingiye ku misoro y’ubutaka, kwimurwa na serivisi zitangwamo.

Ibyo ni mu bushakashatsi bwakozwe na CLADHO mu turere dutandatu tw’u Rwanda aho abaturage 73% batazi itegeko ry’ubutaka.

Umukozi ushinzwe guhuza ibikorwa muri CLADHO wamuritse ibyavuye muri ubwo bushakashatsi, Murwanashyaka Evariste, atangaza ko ikibazo gikomeye babonye ari uko abaturage batazi itegeko ry’ubutaka kandi kutarimenya bituma batanubahiriza ibirikubiyemo.

Agira ati: “Twabajie imiryango 180 mu turere twa Musanze, Ngororero, Gatsibo, Rusizi, Kamonyi na Gisagara. 27% mu bo twaganiriye ntibishyuye imisoro y’ubutaka kubera kumva ari menshi abandi batarisobanukiwe. Kwimurwa ku bw’inyungu rusange 45% bavuze ko bishyurwa batinze ndetse abandi 35% bavuga ko amafaranga bahabwa adahuye n’agaciro k’ubutaka bwabo kandi n’abemeye bagatindirwa kwishyurwa.

Twagaragarijwe ko serivisi z’ubutaka na zo zitishimirwa kuko abakozi bazitanga ari bakeya kandi abazisaba ari benshi”.

Abaturage 99% bavuga ko amafaranga 30.000 yo kubona icyangombwa cy’uko ubutaka ari ubw’umuntu ari menshi.

Karamage avuga ko nka Cladho yifuza ko abaturage bakwigishwa itegeko ry’ubutaka, kugena imisoro y’ubutaka bikagenwa ku bushobozi bw’abaturage hanyuma mu bijyanye no kwimura abaturage k bw’inyungu rusange bajya bahabwa amafaranga mbere.

Avuga ko nyuma y’ubushakashatsi Cladho igiye kwegerana n’inzego zibishinzwe izigaragariza ibyo bagejejweho n’abaturage kandi bagire n’uruhare mu gutuma itegeko ry’ubutaka rimenyekana ku baturage.

Umukozi w’ikigo gishinzwe imicungire n’imikoreshereze y’ubutaka mu Rwanda Mukarage Jean Baptiste, kuri we ngo n’ubwo hari ibibazo mu butaka, hari inzego zikora uko zishoboye ngo bikemuke.

Agira ati: “Twashyizeho gahunda yihariye y’uko buri mwaka hazajya habaho icyumweru kihariye cyo kubasobanurira amategeko bakanahabwa serivisi kandi bakayibona mu munsi umwe”.

Mukarage avuga ko ibibazo abaturage bagiye bagiye bagaragariza CLADHO, n’icyo kigo byakigejeweho kandi kandi kiri kugira icyo kibikoraho mu bijyanye n’amategeko kuko byinshi muri byo bisaba ko ahinduka ndetse ku buryo izo mpnduka zizaza zisubiza ibibazo byose.

Mukarage avuga ko kuba bamwe bataramenya amategeko, mu 2009 ubutaka butangira kwandikwa mu Rwanda icyo kigo cyagiye gihura n’abaturage kenshi mu nama ariko habanje kunozwa iyandikwa ry’ubutaka.

Avuga ko banakoresha ibitangazamakuru mu biganiro bitangwa abaturage bakagenda basobanukirwa amategeko.

Kuba serivisi z’ubutaka zivugwaho gutinda cyangwa gutangwa mu buryo butanoze, Mukarage asobanura ko zitangirwa mu nzego nyinshi ariko hari n’ubwo umukozi umwe ateshuka akazitanga nabi zikazamo no gutinda.

Mukarage avuga ko uko hagaragaye ibibazo ari nako itegeko ry’ubutaka rivugururwa kandi n’ibisigaye byose bizarebwaho muri icyo gihe bikibangamira abaturage birimo n’ibiciro mu ngurane z’ubutaka.

Mukarage ati: “Iyo serivisi zihenze zituma n’ubundi abaturage bataza kuzisaba kandi amakuru arimo akaba atajyanye n’igihe”.

Guhera 2004 hashyizweho amategeko yo kuvugurura imikoreshereze y’ubutaka, bituma u Rwanda ruba urwa 2 ku isi mu gutunganya imikoreshereze y’ubutaka.

Abakozi ba Cladho hamwe n’indi miryango ya sosiyete sivile bagaragaza ibyavuye mu bushakashatsi (Foto Sezibera A)

Umukozi ushinzwe guhuza ibikorwa muri CLADHO wamuritse ibyavuye mu bushakashatsi Murwanashyaka Evariste (Foto Sezibera A)

Umukozi w’ikigo gishinzwe imicungire n’imikoreshereze y’ubutaka mu Rwanda Mukarage Jean Baptiste

Umukozi ushinzwe guhuza ibikorwa muri CLADHO wamuritse ibyavuye mu bushakashatsi Murwanashyaka Evariste(Foto Sezibera A)

TANGA IGITEKEREZO

Leave a Reply

Your email address will not be published. Required fields are marked *