21°C , Intermittent clouds | Kigali-Rwanda
Dr. Mukabaramba Alvere, Umunyamabanga wa Leta muri Minisiteri y'Ubutegetsi bw'Igihugu ushinzwe imibereho y'abaturage

Abaturage 60% ni bo bafite amakuru ku ivugururwa ry’ibyiciro by’ubudehe

Yanditswe na Mugisha Benigne

Ku ya 14-08-2019 saa 17:14:50

Abaturage bagera kuri 60% ni bo bemera ko bafite amakuru ku ivugururwa ry’ibyiciro by’ubudehe nk’uko bigaragazwa n’ubushakashatsi bwakozwe n’Umuryango Transparency International Rwanda.

Ubu bushakashatsi bwakozwe ku bagore 58% n’abagabo 48% bwagaragaje uko gushyira abaturage mu budehe byagenze, bunagaragaza ko hari abaturage badafite amakuru ku ivugurura ry’ibyiciro by’ubudehe.

Umunyamabanga wa Leta muri Minisiteri y’Ubutegetsi bw’Igihugu, ushinzwe imibereho y’abaturage, Dr. Mukabaramba Alvera, yemera ko abaturage bose bataragerwaho n’ayo makuru ariko ko kubibaganiriza bikomeje, agasanga mu gihe kiri imbere buri muturage azaba yaragezweho n’ayo makuru kuko bishyizwemo imbaraga nyinshi ku bufatanye bwa MINALOC na sosiyete sivili.

Ati “Ni byo koko hari abaturage batazi ko ibyiciro by’ubudehe birimo kuvugururwa, ariko igikorwa kirakomeje, nizeye ko kizasozwa Abanyarwanda bose bafite ayo makuru.”

Ku kijyanye n’imibare yagaragajwe n’ubushakashatsi cy’uko 40% by’abaturage babuze serivisi kubera ibyiciro by’ubudehe n’abandi 20% bahawe serivisi zitabagenewe kubera ibyiciro by’ubudehe, Dr. Mukabaramba yavuze ko yemera ko amakosa yakozwe mu gushyira abantu mu byiciro by’ubudehe ariko ahakana imibare yabonywe mu bushakashatsi aho yemeza ko harimo gukabya.

Ku kijyanye n’imibare yatangajwe n’ubushakashatsi ivuga ko 2% by’abaturage bemeza ko ibyiciro y’ubudehe bicyuye igihe byagaragayemo ruswa, naho 98% bakavuga ko nta ruswa babibonyemo, aha Mukabaramba yagaragaje ko atahakana ko hari amakosa yaba yarakozwe mu byiciro by’ubudehe, ariko ngo igice kunini kigaragaza ko byakozwe neza.

Umuyobozi wa Transparency International ishami ry’u Rwanda, Ingabire Marie Immaculée, avuga ko abaturage bakoreweho ubushakashatsi bagaragaje ko harimo abatazi ivugururwa ry’ibyiciro by’ubudehe, ariko hari n’abandi bafite ayo makuru.

Ku kijyanye n’imibare yagaragajwe n’ubushakashatsi ariko MINALOC ikagaragaza ko itayemera kuko harimo gukabya, Ingabire yavuze ko ik’ ingenzi ari uko abakoze ubushakashatsi bageze mu baturage kandi uburyo bwakoreshejwe bukaba bwemewe mu bushakashatsi.

Yagize ati “Kutemera imibare yavuye mu bushakashatsi nta cyo bitwaye, ariko kuba uburyo bwakoreshejwe abwemera ndetse bukanemerwa mu bushakashatsi ibyo birahagije. Gusa ubushakashatsi bwakozwe uko byagombye kandi bwagaragaje icyabuvuyemo kandi ni ukuri kuko byivugiwe n’abaturage.”

N’ubwo hatagaragazwa igihe ibyiciro by’ubudehe bishya bizatangirira, Dr. Mukabaramba avuga ko igihe kitazwi ariko ko nyuma y’imirimo irimo gukorwa bizashyikirizwa Inama y’Abaminisitiri nyuma bikabona gusohoka.

Dr. Mukabaramba Alvere, Umunyamabanga wa Leta muri Minisiteri y’Ubutegetsi bw’Igihugu ushinzwe imibereho y’abaturage

TANGA IGITEKEREZO

Leave a Reply

Your email address will not be published. Required fields are marked *