21°C , Intermittent clouds | Kigali-Rwanda

Abatunganya ibikomoka ku biti bishimiye inguzanyo ya NIRDA itagira inyungu ntinasabe ingwate

Yanditswe na Sezibera Anselme

Ku ya 08-11-2019 saa 07:36:11
NIRDA ikomeje ingamba zihambaye mu kongerera agaciro ibikomoka ku biti harimo no kuzamura urwego rw'inganda

Abanyenganda nto n’iziciriritse batunganya ibikomoka ku biti baravuga ko bishimiye gahunda y’ Ikigo k’Igihugu cy’Ubushakashatsi n’Iterambere mu byerekeye inganda (NIRDA) yo kubafasha kubona ibikoresho bigezweho bizatuma bahatana ku isoko ry’imbere mu gihugu ndetse no hanze.

Ni ibikoresho NIRDA izabafasha kubona binyuze mu mapiganwa abazatsinda bagahabwa ibikoresho bazaba barasabye ku nguzanyo izaca muri Banki y’u Rwanda y’Iterambere (BRD) bakayihabwa nta ngwate basabwe ndetse bakanayishyura nta nyungu basabwe.

Ni muri Open Calls Program, gahunda ya NIRDA aho abantu bakora mu ruhererekane runaka basabwa gupiganira iyo nkunga ubu hakaba hagezweho gahunda y’Inganda nto n’iziciriritse z’abikorera zikora mu ruhererekane rw’ibikomoka ku biti (wood processing value chain).

Abakora muri uru ruhererekane bavuga ko bishimiye iyi gahunda kuko izabafasha kugura imashini ubundi batari kubasha kwigurira, dore ko ubusanzwe banki zibasaba ingwate ndetse bakishyura bashyizeho inyungu bigatuma benshi batinya no gufata inguzanyo.

Munyarukiga Pierre afite imashini zibaza, yabwiye  Imvaho Nshya ati “Ndashaka kwagura ibyo nkora, usanga abantu baza kuyora ibarizo kandi nagombye kuribyaza umusaruro. Ndashaka imashini izajya ikoramo amakara yo gutekesha, bitume itemwa ry’amashyamba rigabanuka kandi ayo makara akorwe ku buryo atazamura imyotsi yangiza umwuka abantu bahumeka”.

Haji Abdub KAREMERA, Chairman wa Rwanda Wood Value Chain Association ikora muri uru ruhererekane yagize ati “Ni ibintu bidasanzwe ko umuntu yabona inguzanyo akishyura nta nyungu, abakora muri uru ruhererekane dukwiye kwakira aya mahirwe tukanoza ibyo dukora tukongera umusaruro mu bwiza no mu bwinshi.”

NIRDA ivuga ko iyi gahunda ya Open Calls iri mu murongo wo guteza imbere ibikorerwa mu Rwanda muri gahunda ya Made in Rwanda ndetse no guhanga imirimo mishya igezweho kandi itanga umusaruro.

Muri hagunda ya Leta y’Imyaka 7 kandi biteganyijwe ko hahangwa imirimo 214,000 buri mwaka, NIRDA ikaba ivuga ko iyi gahunda yo gufasha abatunganya ibikomoka ku biti n’izindi mpererekanye bizafasha ku kugera kuri iyo ntego

Miliyoni 300Frw zizatangwa ku bakora muri uru ruhererekane abazatsinda bakazanahabwa amahugurwa ku buntu bugucunga umutungo, gukoresha iryo koranabuhanga ndetse no kumenyekanisha ibyo bakora.

Kampeta Sayinzoga, Umuyobozi mukuru wa NIRDA agira ati, “Tubaha inguzanyo itagira inyungu n’ingwate dufatanyije na BRD, ibafasha kugura ibikoresho  bigezweho kandi bitangiza ibidukikije, ikabafasha kongera ubumenyi muri tekiniki ndetse no mu buryo batunganya bizinesi yabo”.

Yagarutse ku bikorerwa mu Rwanda usanga bimwe bihenze avuga ko mu bushakashatsi NIRDA yakoze basanze imwe mu mpamvu ituma ibyo bakoze bimwe bihenda ari uko nta buryo usanga buhari bwo kongerera agaciro no gutunganya ibisigazwa byasigaye batunganya imbaho.

Ati, “Mu bindi bihugu byateye imbere ibisigazwa birafatwa bigakorwamo ibindi bintu bifitiye abantu akamaro. Ni yo mpamvu abantu bazapiganwa tubashishikariza kureba ibintu  byabyazwamo umusaruro ibisigazwa, abahanga udushya ndetse banatanga akazi ku bantu benshi”.

Umuyobozi Mukuru wa NIRDA, Kampeta Sayinzoga asobanura iby’aya mahirwe y’inguzanyo idasaba ingwate

Abitabira ipiganwa barasabwa kuba bamaze imyaka ine bakora muri urwo ruhererekane, bafite aho bakorera hazwi kandi bakoresha nibura abakozi 10.

Gusaba byatangiye taliki ya 7 Ukwakira 2019 bifashishije urubuga www.nirda.gov.rw . bizarangira kuwa 30 Ukwakira 2019 abagira ikibazo mu gusaba bahamagara ku murongo utishyurwa wa 1055 bagafashwa.

Umwanditsi:

Sezibera Anselme

One Comment on “Abatunganya ibikomoka ku biti bishimiye inguzanyo ya NIRDA itagira inyungu ntinasabe ingwate”

  1. Ndabona iyi gahunda ari nziza cyane…
    Rubavu natwe aho dukorera muri united for development cooperative (UDC) dukeneye ibi bikoresho byikoranabuhanga, ikibazo nuko mbona dushobora kuba tutaramenyeye aya makuru kugihe. Mutubarize.

Tanga Igitekerezo

Email yanyu ntigaragazwa ku rubuga. Amazina na Email ni ngombwa.