17°C , Partly cloudy | Kigali-Rwanda

Abatujwe mu mudugudu wa Rugendabare bishimiye inkunga bahawe na RGB na Serena

Yanditswe na KAYIRA ETIENNE

Ku ya 25-06-2019 saa 09:03:52
Uhereye iburyo ni Dr Kayitesi Usta Umuyobozi w'agateganyo wa RGB, ashyikiriza Kayisime Nzaramba Meya w'Akarere ka Nyarugenge sheki ya miriyoni 7.6 y'inkunga y'abatujwe muri IDP Rugendabare

Imiryango y’Abanyarwanda igera kuri 72 itujwe mu Mudugudu w’Ikitegererezo wa Rugendabare (IDP Model village) wo mu Murenge wa Mageragere ho mu Karere ka Nyarugenge, batangaje ko bishimiye inkunga bahawe n’Urwego rw’Igihugu rushinzwe Imiyoborere RGB ndetse n’ubuyobozi bwa Hoteri Serena.

Mu batujwe muri uwo mudugudu n’Ubuyobozi bw’Akarere ka Nyarugenge harimo abarokotse Jenoside yakorewe Abatutsi mu Rwanda, n’imiryango y’abandi Banyarwanda batishoboye.

Igikorwa cyo kuremera imiryango y’abatishoboye batuye muri uwo mudugudu wa Rugendabare, cyabimburiwe no gushyira indabo ku Rwibutso rwa Butamwa rushyinguyemo imibiri irenga 1200 y’abazize Jenoside yakorewe Abatutsi mu Rwanda mu 1994.

Murangwa Jean Bosco, Perezida wa IBUKA mu Murenge wa Mageragere, yatangaje ko gukomeza kwibuka no guha agaciro ababyeyi babo n’abavandimwe babo bakorewe Jenoside mu cyahoze ari Butamwa n’ahandi mu gihugu hose, ngo biri mu bikorwa bikomeza imitima kimwe no gutuza neza no kuremera intwaza n’abatishoboye.

Murangwa yagize ati “Twe abacitse ku icumu rya Jenoside yakorewe Abatutsi mu Rwanda, ntituzahwema gushimira Umukuru w’Igihugu cyacu cy’u Rwanda Paul Kagame n’inzego zose za Guverinoma ku bwo kuduhoza ku mutima hagamijwe kubeshaho neza abatishoboye bo muri twe. Turashimira by’umwihariko RGB n’abafatanyabikorwa b’Akarere kacu ka Nyarugenge bari barangajwe imbere na Dr. Kayitesi Usta, Umuyobozi w’agategenyo w’Urwego rw’Igihugu rushinzwe Imiyoborere hamwe n’Abayobozi ba Hoteri Serena baremeye imiryango ituye muri IDP Rugendabare kugira ngo imibereho yabo irusheho kuba myiza muri aya mazu meza bubakiwe”.

Mu miryango mishya 32 yatujwe mu mudugudu wa Rugendabare mu mpera z’icyumweru gishize mu Murenge wa Mageragere mu Karere ka Nyarugenge, harimo imiryango 16 y’abacitse ku icumu rya Jenoside yakorewe        Abatutsi mu 1994.

Mu kiganiro kihariye Imvaho Nshya yagiranye na Ndekezi François-Xavier, Umunyamabanga Nshingwabikorwa w’Akagari ka Kankuba Umudugudu wa Rugendabare ubarizwamo, yatangaje ko uwo mudugudu ngo wari usanzwe utuyemo imiryango 40 y’Abanyarwanda batishoboye.

Ati: “Mu mpera z’icyumweru gishize ni bwo hatujwe indi miryango 32 y’abatishoboye, batuzwa mu nyubako 4 zigeretse zuzuye vuba aha. Byabaye amahire RGB n’abafatanyabikorwa batandukanye b’Akarere ka Nyarugenge bagenera imfashanyo zitandukanye abatuye IDP Rugendabare. Buri muryango mushya wahawe inzu irimo intebe nshya zo kwicaraho ndetse n’ibitanda n’ibisaswa”.

Umunyabanga Nshingwabikorwa w’Akagari ka Kankuba yamenyesheje ko buri muryango mushya ngo wahawe ibiribwa birimo umufuka w’umuceri n’uwa kawunga. Bahawe kandi amasafuriya, indobo n’amajerikani, ritiro 7 z’amavuta yo kurya buri muryango n’amasabuni n’ibasi.

Ati: “Hamwe na sheki ya miriyoni zirindwi n’ibihumbi magana atandantu by’amafaranga y’u Rwanda (7, 600,000frw) RGB yashyikirije Meya w’Akarere kacu ka Nyarugenge ku bwo gufasha abagenerwabikorwa b’umudugudu wa Rugendabare, Urwego rw’Igihugu rushinzwe Imiyoborere hamwe n’Abayobozi ba Serena bemereye abaturage umutekinisiye uzabafasha gutunganya igishanga cya hegitare 6 bazahingamo imboga ndetse babemerera n’imbuto za kijyambere bazahingamo”.

Umunyamabanga Nshingwabikorwa w’Akagari ka Kankuba Ndekezi yakomeje atangariza Imvaho Nshya ko Akarere ka Nyarugenge kubakiye abagenerwabikorwa b’uwo mudugudu w’ikitegererezo ikiraro cyo kororeramo inkoko zitanga amagi. Ati “Mu muhigo bagombaga  guhabwa imishwi y’inkoko 1800, ariko bahawe 2300 barenzaho imishwi 20, bateganya ko hari ishobora gupfa ariko zose zabayeho”.

Iyo mishwi 2,320 ngo yagejejwe mu kiraro cyayo ku itariki 1 Gicurasi 2019, ngo ku ya 6 Kamena inkoko za mbere zitangira gutera amagi. Ubu ngo izigera kuri 1 500 zitera amagi abagenerwabikorwa bakayagurisha akabaha amafaranga.

Ndekezi François-Xavier ati “Kugira ngo abatuye muri IDP Rugendabare barusheho gukorera hamwe no kwiteza imbere mu bukungu, Abayobozi b’Akarere ka Nyarugenge babafashije gushinga Koperative Tuzamurane-Rugendabare. Indi nkunga ikomeye bemerewe na Hoteri Serena ni uko amagi yose izo nkoko zizajya zitera izajya iyabagurira ku mafaranga 70 rimwe”.

Kugira ngo ubu bworozi ntibugahungabane, buri wa Mbere w’icyumweru abagenerwabikorwa ba Rugendabare bahugurirwa ibijyanye no kwita kuri izo nkoko zabo. Kuva imishwi yahagera izanywe n’Inkeragutabara (Rwanda Reserve Force), abakozi babo ngo ni bo bita kuri izo nkoko zagenewe abaturage kugeza hashize amezi 4 bakabona kuzibashyikiriza bagakomerezaho.

Mukanziza Lea, Umuyobozi wa “Koperative Tuzamurane Rugendabare” yatangarije Imvaho Nshya ejo hashize ku wa mbere tariki 24 Kamena 2019 ko bashimira cyane abayobozi b’Akarere ka Nyarugenge babatuje heza bakaba banakomeje kubakorera ubuvugizi bituma babona ibigo bitandukanye bibatera inkunga yo kubateza imbere.

Ati “Mu mpera z’icyumweru gishize twatewe inkunga na RGB na Serena. Abayobozi b’ibi bigo bazanye n’abafatanyabikorwa b’Akarere kacu ka Nyarugenge bashyikiriza Meya Kayisime Nzaramba inkunga batugeneye”.

Leya Mukanziza yatangarije Imvaho Nshya ko Akarere kabatunganyirije uturima twinshi tw’igikoni, uturima tuzafasha abagenarwabikorwa ba Rugendabare kugira imirire ifite intungamubiri zihagije. Ati “Ubu buri rugo rufite uburenganzira ku magi aterwa n’inkoko Leta yacu yatugeneye. Twagize amahirwe dufite ifumbire iva muri izo nkoko, ni nayo izadufasha mu gufumbira imirima tuzahinga mu gishanga cya hegitari 6 twahawe kiri munsi y’ahitwa mu babikira”.

Aho ku kiraro k’inkoko za “Koperative Tuzamurane Rugendabare”, Ubuyobozi bw’Akarere ka Nyarugenge bwahatunganyije ivomo ritanga amazi afasha aba bagenerwabikorwa kubonera amazi inkoko zigera kuri 2,320 zirimo izigera kuri 1 500 zatangiye gutanga amagi bagurisha muri Hoteri Serena.

Umunyamabanga Nshingwabikorwa w’Akagari ka Kankuba yatangaje ko nta mpungenge bafite z’imibereho y’abo baturage batujwe muri uwo mudugudu kuko ngo abona bafite umwete wo kwita ku nkoko bahawe, kandi zatangiye kubyara umusaruro.

Abaturage ngo bakomeje guhugurirwa uburyo bwo korora neza izo nkoko, ariko n’abayobozi ngo bakoze urugendoshuri mu Karere ka Gasobo, ahari umudugudu w’ikitegererezo watujwemo abaturage batishoboye kandi bafite ibikorwa by’ubuhinzi n’ubworozi nk’ibiri muri Rugendabare.

Mukanziza Lea Perezida wa Koperative Tuzamurane Rugendabare na we yamenyesheje ko hamwe n’inama bahabwa n’Akarere ka Nyarugenge n’Umurenge wa Mageragere n’Akagari ka Kankuba ngo asanga nta kibazo bazagira mu gukataza mu iterambere ryabo.

Uhereye iburyo ni Dr Kayitesi Usta Umuyobozi w’agateganyo wa RGB, ashyikiriza Kayisime Nzaramba Meya w’Akarere ka Nyarugenge sheki ya miriyoni 7.6 y’inkunga y’abatujwe muri IDP Rugendabare

TANGA IGITEKEREZO

Leave a Reply

Your email address will not be published. Required fields are marked *