25°C , Partly sunny | Kigali-Rwanda

Abatahuweho COVID-19 muri Rusizi bageze kuri 37

Yanditswe na Imvaho Nshya

Ku ya 04-06-2020 saa 19:30:14

Kuri uyu wa Kane tariki ya 4 Kamena 2020, habonetse abarwayi bashya 13 b’icyorezo cya Koronavirusi (COVID-19) mu bipimo 1,3639 byafashwe mu masaha 24 ashize, hataha abantu 9 bakize neza. Ibyo byatumye umubare w’abamaze gukira ugera kuri 280 muri 410 bamaze gutahurwaho icyo cyorezo mu Rwanda.

Minisiteri y’Ubuzima ivuga  ko abatahuwe uyu munsi bose babonetse mu Karere ka Rusizi, bakaba bashyizwe mu kato aho n’abo bahuye na bo bahise bakurikiranwa.

Abo barwayi baje biyongera ku bandi 24 batangajwe ko bari bamaze gutahurwa mu minsi ibiri ishize, bose hamwe bakaba babaye 37 bamaze gutahurwa muri ako Karere karimo imirenge ine yasubijwe muri gahunda ya Guma Mu Rugo mu gihe k’ibyumweru bibiri.

Ubwandu bwabonetse ku bari basanzwe bakora ingendo muri Repubulika Iharanira Demokarasi ya Congo (RDC) na bamwe mu bo bahuye na bo.

Kugeza ubu abakirimo kwitabwaho n’abaganga bageze ku 128  mu barwayi bamaze kuboneka  mu bipimo 72,510 byafashwe kuva umurwayi wa mbere yatahurwa muri Werurwe kugeza ubu, aho iki cyorezo kimaze gutwara ubuzima bw’abarwayi babiri.

Igikorwa cyo gupima abantu mu buryo bwa rusange mu Gihugu kirakomeje, ndetse Akarere ka Rusizi n’aka Rubavu twashyizwe mu kato mu gihe hagisuzumwa abantu ngo harebwe uko ubwandu buhagaze muri utwo duce.

Mu tundi turere, ingendo zihuza intara zitandukanye n’Umujyi wa Kigali zakomorewe. Abaturarwanda barasabwa kurushaho kubahiriza amabwiriza yo kwirinda ari yo gusiga intera ya metero, kwambara udupfukamunwa no gukaraba intoki kenshi bakoresheje amazi meza n’isabune cyangwa arukoro yabugenewe.

Imibare yatangajwe ku rwego mpuzamahanga yerekana ko muri Afurika abamaze kwandura COVID-19 bageze ku 163,599 barimo 70,894 bakize n’abandi 4,611 bahitanywe na cyo. Abamaze kwandura ku Isi bangana na 6,652,445 barimo abakize 3,209,006 n’abapfuye 390,575.

Umwanditsi:

Imvaho Nshya

2 Comments on “Abatahuweho COVID-19 muri Rusizi bageze kuri 37”

    1. Nibyo koko bajye batubwira amazina yabo kugirango niba umuntu yarahuye nabo abone uko atangiramakuru kugihe. Mubyigeho nka MINISANTE mudufashe.

Tanga Igitekerezo

Email yanyu ntigaragazwa ku rubuga. Amazina na Email ni ngombwa.