18°C , Partly cloudy | Kigali-Rwanda
Musabyimana Yvonne Umunyamabanga Nshingwabikorwa wa COPORWA

Abasigajwe inyuma n’amateka batuzwa hamwe n’abandi bakabigiraho

Yanditswe na NSENGIYUMVA J. DAMASCENE

Ku ya 27-06-2018 saa 06:45:07

Abasigajwe inyuma n’amateka bibumbiye mu muryango COPORWA bitabiriye inama igamije kurebera hamwe uko imiturire y’abasigajwe inyuma n’amateka ihagaze kugeza ubu.

Musabyimana Yvonne Umunyamabanga Nshingwabikorwa wa COPORWA

Ni inama yateraniye i Kigali ejo hashize ku wa 26 Kamena 2018 yahuje abanyamuryango ba COPORWA ndetse n’abafatanyabikorwa bayo baturutse mu Rwanda ndetse no mu mahanga, aho barebera hamwe uko imiturire y’abasigajwe inyuma n’amateka ihagaze n’ibibazo bahura nabyo mu buzima bwa buri munsi ndetse n’icyo basaba Leta.

Umunyamabanga Nshingwabikorwa wa COPORWA Musabyimana Yvonne yagarutse ku kuba hari aho abasigajwe inyuma n’amateka batuzwa mu midugudu yabo bonyine, ati “Kubatuza bonyine ni ugukomeza kubaheza”.

Akomeza avuga ko iyo baturanye n’abandi bituma babigiraho uburyo bw’imibereho, bakabareberaho ibijyanye n’iterambere, isuku, ndetse n’abana babo bagakina n’abandi bana, ibi byose bigatuma biyumva mu muryango nyarwanda.

Mukanana Gloriose ubarizwa mu basigajwe inyuma n’amateka bo mu karere ka Gatsibo we yavuze ko atuye mu mudugudu nk’abandi. Yagarutse kandi ku kibazo k’imiturire avuga ko ahaba hari gutuza abasigajwe inyuma n’amateka bonyine babibona nk’ikibazo gikomeye kuko bituma batisanga mu muryango nyarwanda.

Niyitegeka Eliana wasigajwe inyuma n’amateka ukomoka mu Karere ka Gasabo na we yagarutse ku kibazo k’imiturire, aho avuga ko inzu nyinshi zagiye zubakwa n’umuganda bigatuma usanga zimwe zitujuje ibyangombwa, izindi zidakomeye kandi ngo guturana n’abandi ni byo byabanyura kurushaho.

Umunyamabanga nshingwabikorwa wa COPORWA Musabyimana Yvonne asoza agaragaza ishusho rusange, aho avuga ko mbere ya 1994 abasigajwe inyuma n’amateka bari ibihumbi 50 000 kuri ubu bakaba babarirwa mu 36 228 mu gihugu hose.

Ubushakashatsi  bwakorewe mu turere 11 bugaragaza ko abubakiwe na Leta ari 928 (52,9%) muri utwo turere, aho mu karere ka  Nyaruguru konyine gafitemo 80,6% naho Akarere ka Gicumbi kakagira 75,9%. 30% nta nzu bagira, 12,2% ni bo bafite inzu ziteye sima hasi, ubushakashatsi busoza bugaragaza ko 24% nta butaka bafite bwo kubakaho.

 

TANGA IGITEKEREZO

Leave a Reply

Your email address will not be published. Required fields are marked *