Abashoramari 100 bitezwe mu Rwanda mu nama ya ‘Made in Africa’

Yanditswe na Twagira Wilson

Ku ya 02-05-2019 saa 17:22:25
Murangwa Frank uhagarariye Ikigo k’Igihugu gishinzwe guteza imbere ubukerarugendo bushingiye ku nama

Abayobozi bahagarariye ibigo by’ishoramari bagera ku 100 baturutse mu bihugu bitandukanye by’Afurika, bategerejwe i Kigali mu nama yiswe “Made in Africa leadership Conference” izaba kuwa 6-7 Kamena 2019.

Biteganyijwe ko muri iyo nama bazaganira ku cyakorwa n’ingamba zihari mu guteza imbere ba rwiyemezamirimo bo mu rwego rw’abikorera bakorera mu Rwanda bafite imishinga batangije, harebwe n’uburyo bafashwa kugera ku masoko y’umusaruro wabo.

Mu kiganiro abafatanyabikorwa bashinzwe gutegura iyo nama barimo umuyobozi wa Breakfast Africa mu Rwanda, akaba n’umwe mu bayobozi ba KORA Coaching Group, itanga amahugurwa kuri ba rwiyemezamirimo mu Rwanda, Karera Mireille, na Murangwa Frank uhagarariye Ikigo k’Igihugu gishinzwe guteza imbere ubukerarugendo bushingiye ku nama (Rwanda Convention Bureau), babwiye abanyamakuru ko iyo nama mpuzamahanga igiye kubera mu Rwanda ku nshuro ya mbere hari amahirwe izaba izanye, cyane ko ari abayobozi 100 ahanini biganjemo abikorera bayobora ibigo binini by’ubucuruzi nk’ibigo by’imari, n’ibindi, abikorera bo mu Rwanda bashobora kubigiraho udushya mu birebana n’ibyo basanzwe bakora.

Karera yagize ati “Ni abayobozi ijana ahanini biganjemo abayobozi b’ibigo by’amabanki baturutse mu bihugu byo kuri uyu mugabane w’Afurika, bazaza i Kigali ku nshuro ya mbere, aho izo nzego zizaganira ku cyakorwa mu guhanga imirimo yafasha gukemura ibibazo by’ubushomeri ku rubyiruko, kwereka abikorera ahashobora kuboneka amahirwe yo kwagura amasoko ku musaruro w’abikorera bafite ibikorwa byabo mu Rwanda, uburyo bwo kuzamura abikorera bakiri hasi mu birebana n’imikorere, hibandwa cyane ku rubyiruko, kuko mu kerekezo 2040, urubyiruko ruzaba rumaze kwiyongera rugeze kuri miriyari isaga muri Afurika. Ubu igihe kirageze ngo dutangire kubaha amahirwe arebana n’akazi maze bahatane n’abo mu bindi bihugu byateye imbere.”

Umuyobozi wa Breakfast Africa mu Rwanda, Karera Mireille

Murangwa Frank uhagarariye ikigo gishinzwe guteza imbere ubukerarugendo bushingiye ku nama, asanga iyi nama igiye kubera mu Rwanda bwa mbere hari kinini u Rwanda ruzayungukiramo, abishingiye ahanini ko abo bashoramari bahagarariye amasosiyete manini bazahita bamenya ahari amahirwe y’ishoramari mu gihugu, bityo habe hagira abahitamo kuhashora imari, abandi basubire iwabo ari ba ambasaderi bashobora kubwira abandi bikorera mu bihugu bitandukanye by’iwabo aho bashobora gushyira imari maze bikagira impienduka ku bukungu bw’igihugu.

Murangwa Frank uhagarariye Ikigo k’Igihugu gishinzwe guteza imbere ubukerarugendo bushingiye ku nama

Bimwe mu bihugu abo bayobozi b’ibigo by’ishoramari bazaba baturutsemo ni Kenya, Gambia, Senegal, n’ahandi, bazaba biganjemo abayobora ibigo by’imari binini, hano mu Rwanda bazasura amasite 6 arimo abanyenganda bakorera mu gace kahariwe inganda i Masoro mu Mujyi wa Kigali.

Aba ni abari mu biganiro n’abanyamakuru ku gutegura inama igamije guteza imbere no gushyigikira ba rwiyemezamirimo

Umwanditsi:

Twagira Wilson

Tanga Igitekerezo

Email yanyu ntigaragazwa ku rubuga. Amazina na Email ni ngombwa.