19°C , Mostly cloudy | Kigali-Rwanda

Abasengera mu Itorero Nyamirambo Assemblies of God Family Church barisanga

Yanditswe na Nshim Janvier

Ku ya Oct 10, 2018 saa 5:09

Itorero Nyamirambo Assemblies of God Family Church ryiyemeje gufatanya na Leta y’u Rwanda mu kubaka Igihugu rihuza rikanahumuriza Abanyarwanda cyane ko ryatangiye gukorera i Nyamirambo mu mwaka wa 1995.

Pasiteri Rwabikinga Evariste wakijijwe akaba Umukozi w’Imana akiri muto, ni Umuvugabutumwa mu Itorero Nyamirambo Assemblies of God Family Church wemeza ko izina ry’iri torero ryongerwaho umuryango (family) kuko buri wese urigannye arisanga.

Yagize ati: “Impamvu twashyizeho Family twaravuze tuti:  ‘iri ni itorero ry’umuryango aho umuntu wese aza yisanga yaba umukene, yaba umukire, uko yaba ateye kose. ‘Family Church’ ni ingeri zose zisanga mu muryango. Abana bahurizwa mu mashuri atandukanye ajyanye n’imyaka yabo bahagabwa ubumenyi buri ku rwego babasha kumva (Sunday School Ministry), ikiciro cy’urubyiruko kitwa Abambasaderi ba Kirisito kandi na bo bahuzwa mu matsinda mato agendeye ku myaka yabo. Abagore bari mu itsinda ryitwa ‘Abarezi beza’, abagabo na bo bakaba mu itsinda ryitwa  ‘Abayobozi Beza’.”

Itorero rifite inshingano mu kugira uruhare rw’imibereho myiza y’abarigana ndetse n’abatuye mu karere rikoreramo muri Rusange. Iyo hari abana birukanywe mu ishuri kubera ubushobozi buke, itorero rifatanya n’ababyeyi babo kwishyura.

Abakirisito barafasha iyo hari unaniwe kubona ubuvuzi bw’ibanze, kandi bakuganirwa n’itorero. Hatangwa inyigisho mu buryo buhoraho zo kwiteza imbere mu bukungu, kurera abana, imibanire myiza mu muryango nyarwanda n’ibindi. Usanga mu itorero hari amatsinda y’ubwizigame afasha abantu kugera ku ntego z’ubuzima bwabo batari kwigezaho, kandi n’inyigisho ku ishoramari n’icungamari kugira ngo n’abafite ubushobozi buke babashe gutera imbere.

Itorero risura abarwayi kwa muganga no gufasha indembe zitishoboye, ritanga amaraso yo gufasha indembe kwa Muganga byibura kabiri mu Mwaka, kandi ryishyurira ubwisungane mu kwivuza byibura abantu 150 buri mwaka mu bufatanye n’Akarere ka Nyarugenge.

Itorero rifatanya n’inzego z’ibanze mu mudugudu rikoreramo mu bikorwa bitandukanye kandi iyo hari igikorwa gikeneye ubufasha itorero rikibonekamo nko gushyigikira umunsi w’abarwayi ku bufatanye n’Ibitaro Bikuru bya Kaminuza (CHUK), gutanga ubufasha ku banyarwanda birukanywe muri Tanzania ku bikoresho by’ibanze bari bakeneye muri icyo gihe harimo n’ibyo kurya ndetse n’ibiryamirwa, n’ibindi bikorwa bifasha abababaye kurusha abandi.

Pasiteri Rwabikinga yakomeje asaba abakirisitu kubaha Imana bakanakorana neza na Leta  bagakoresha ibice byose Imana yabahaye: umwuka, ubugingo n’umubiri.

Avuga ko abantu bafata igice cy’umwuka bakavuga ngo ni cyo kizera Imana cyane, birengagije icy’umubiri, baba bibeshya cyane kuko Adamu yaremwe mu ishusho y’Imana imubumba mu gitaka aba ikintu kitagira ubuzima, ishyiramo umwuka wayo aba muzima, agira ubugingo buzima.

Imana yatunganyije ingobyi ishyiramo ibyo kurya byose bizatunga uwo muntu n’umufasha yamuremeye ari we Eva, irangije imuha inshingano zo guhinga no kubirinda.

Akomeza asaba Abanyarwanda kumenya inshingano bafite ku Isi kuko kwizera Imana gusa bidahagije; ati “Dukeneye no kubungabunga bya bindi Imana yaduhaye. Iyo tubona ibintu byose karemano bigaragaza kurema kw’Imana, tugomba kubirinda tukabiteza n’imbere.”

Abanyarwanda kandi barasabwa guhinduka abakirisito nyakuri kuko ari byo bizatuma batandukana n’ikibi bakaba abaturage beza mu Isi n’abaragwa b’Ijuru.

Ibi ni bimwe mu bigize ubufasha bwatanzwe i Kanyinya

Aha hategurwaga ahubakwa inzu z’abatishoboye

Abakirisito b’Itorero Assemble of God mu gikorwa cy’Umuganda ngarukakwezi