19°C , Mostly cloudy | Kigali-Rwanda

Abasenateri bagaragarije MINALOC ibyiza n’imbogamizi mu mikorere ya njyanama

Yanditswe na Mukagahizi Rose

Ku ya 07-03-2019 saa 13:32:41
Minisitiri w’Ubutegetsi bw’Igihugu Prof. Shyaka Anastase (ubanza ibumoso) yaganiriye n' Abasenateri bo muri Komisiyo ya Politiki n’Imiyoborere Myiza muri Sena y’u Rwanda

Abasenateri bo muri Komisiyo ya Politiki n’Imiyoborere Myiza muri Sena y’u Rwanda bakiriwe na Minisiteri y’Ubutegetsi bw’Igihugu MINALOC, baganira ku mikorere y’urwego rw’Inama njyanama z’Inzego z’ibanze nyuma y’urugendo bakoze mu turere twose tw’igihugu.

Abasenateri bagaragaje ibyiza n’imbogamizi basanze mu mikorere y’Inama njyanama z’Utugari, Imirenge n’Uturere ubwo basuraga uturere twose tw’igihugu bareba uko zikora.

Visi Perezida wa Komisiyo ya Politiki n’imiyoborere myiza muri Sena, Kazarwa Gerturde, yavuze ko mu mikorere y’Inama njyanama babonye ibyiza byinshi.

Mu bibazo Abasenateri babonyemo yagarutse ku kuba bamwe mu bajyanama batumva neza inshingano zabo, ubushobozi buke mu kumenyesha abaturage imyanzuro bafata, kutamenyesha abaturage igihe bazahurira, imyubakire y’Inama njyanama ituma batisanzura mu gutanga ibitekerezo kuko abenshi ari abakozi b’uturere.

Yagize ati “Twabonye ibyiza byinshi ariko ntitwabuze no kubura imbogamizi mu byo njyanama zikora. Hari aho bakora ugasanga ibyo bakora barabizi, bagakora ibintu nk’uko itegeko ribigena, bagakora inama nk’uko itegeko ribigena ariko hari aho twabonye imbogamizi.”

Akomeza agira ati “Imbogamizi zigaragaramo kenshi hari ubwo umujyanama aba adatuye aho akorera iyo ari kure y’aho akorera usanga akunda gusaba impushya ku mukoresha we. Hari ubwo umukoresha we agera aho akarambirwa.”

Izindi mbogamizi ngo zirebana n’imyubakire ya njyanama kuva ku rwego rw’akarere kuko bose ari abajyanama, bagera ku rwego rw’akarere bakitoramo nyobozi, bakitoramo umuyobozi w’akarere n’abamwungirije, iyo myubakire yagera ku murenge Umunyamabanga Nshingwabikorwa w’Umurenge akaba umutekinisiye usanzwe akaba ari we uyobora umurenge hanyuma agakora na njyanama abantu batowe n’abaturage cyo kimwe no ku kagari.

Yagize ati “Bigaragara ko iyo myubakire ari uburyo batubwiraga ariko nanone ni ukuganira, ese nyobozi zisohoka muri njyanama ni byo byiza? Ibyo byose twarabibonaga ariko ni urugendo, ni ukuganira tukareba igikwiye kuko twicaye hamwe twese turebera hamwe ikibazo.”

Minisitiri w’Ubutegetsi bw’Igihugu Prof. Shyaka Anastase yavuze ko imbogamizi zose ziri muri njyanama zo mu nzego z’ibanze bazizi.

Avuga ko kuri ubu MINALOC yatangiye gahunda yo kuvugurura kuri politiki igena kwegereza ubuyobozi n’ubushobozi abaturage.

Imbogamizi zihari ngo zizarebwa muri icyo gikorwa mu buryo za njyanama zikorana mu karere, mu murenge, mu kagari no kumanuka ujyana hasi, uburyo njyanama zimenyesha ibyemezo byabo abaturage ku buryo abaturage bamenya ko zibaho ngo bazitabire.

Hazanarebwa imikorere n’imikoranire ya za njyanama na za nyobozi, uburyo njyanama zibona uburyo bwo gukoresha ariko na none umusaruro wa za njyanama.

Prof. Shyaka yagize ati “Ibyo byose ibyinshi byari bizwi byagiye biganirwaho, igisigaye ni ugutekereza igisubizo byazahabwa.”

Minisitiri w’Ubutegetsi bw’Igihugu Prof. Shyaka Anastase (ubanza ibumoso) yaganiriye n’ Abasenateri bo muri Komisiyo ya Politiki n’Imiyoborere Myiza muri Sena y’u Rwanda

Umwanditsi:

Mukagahizi Rose

Tanga Igitekerezo

Email yanyu ntigaragazwa ku rubuga. Amazina na Email ni ngombwa.