19°C , Partly sunny | Kigali-Rwanda
Nkusi Deo, Umunyamabanga Nshingangwabikorwa wa CHENO, ari mu kiganiro n'Imvaho Nshya (Foto Gisubizo G.)

Abasaga 60 bakozweho ubushakashatsi bubaganisha ku kuba intwari

Yanditswe na MUGISHA BENIGNE

Ku ya 23-01-2018 saa 07:04:48

Mu gihe  u Rwanda rwitegura kwizihiza umunsi w’Intwari ku nshuro ya 24, Urwego rushinzwe Intwari, Impeta n’Imidali by’Ishimwe (CHENO) ruratangaza ko rumaze gukora ubushakashatsi ku bantu basaga  60 barimo abantu ku giti cyabo n’amatsinda y’abantu basabiwe kugirwa Intwari.

Nkusi Deo, Umunyamabanga Nshingangwabikorwa wa CHENO, ari mu kiganiro n’Imvaho Nshya (Foto Gisubizo G.)

Ibi ni ibitangazwa na Nkusi Deo, Umunyamabanga nshingwabikorwa  wa CHENO mu kiganiro kihariye yagiranye n’Imvaho Nshya ku myiteguro y’umunsi w’intwari n’ibikorwa biteganyije mu kuwizihiza.

Nkusi yagize ati “Mu gihe u Rwanda rwitegura kwizihiza umunsi w’intwari ku nshuro ya 24, twavuga ko hari icyo twakoze kijyanye n’ubushakashatsi bw’abasabiwe kugirwa intwari, kuri ubu abantu ku giti cyabo n’amatsinda y’abantu bakoreweho ubushakashatsi bagera kuri 30, ariko ubaze buri mutwe  w’umuntu n’abagize ayo matsinda bagera kuri 60 bose hamwe.”

Nkusi avuga ko ku rwego rwa CHENO umurimo w’ubushakashatsi wasojwe kuri abo bantu, igisigaye akaba ari umurimo w’inzego zibakuriye zizabashyira ku mugaragaro mu gihe kitaramenyekana.”

Ku bijyanye n’ibikorwa byo mu cyumweru cyahariwe Intwari  bizabanziriza umunsi w’Intwari nyir’izina, yavuze ko ikiganiro nyunguranabitekerezo ku butwari  giteganywa tariki ya 26 Mutarama 2018, ahazagaragazwa amateka ku rwego rw’isi, rw’Afurika n’u Rwanda, hagaragazwa ababaye intwari kuri izo nzego n’ibikorwa by’ubutwari bakoze.

Ikindi gikorwa giteganywa mu cyumweru cyahariwe ubutwari ni igitaramo cyateguwe na CHENO ku bufatanye n’Umujyi wa Kigali kizabanziriza umunsi w’Intwari.

Yagize ati “Mu gitaramo k’Intwari hazagaragazwa umuco w’ubutwari mu Rwanda, banashishikarize Abanyarwanda kugera ikirenge mu k’intwari no gukomera ku muco w’ubutwari.”

Hari n’amarushanwa y’umupira mu nzego zinyuranye, hakazahembwa amakipe 4 ya mbere mu mupira w’amaguru.

Ingengo y’imari yagenewe ibihembo gusa, imyiteguro itarimo, ni amafaranga y’u Rwanda ni miliyoni 12, nk’uko bisobanurwa na Nkusi, aho ikipe ya mbere izahembwa miliyoni 6, iya kabiri ihembwe milyoni 3, iya gatatu miliyoni ebyiri naho iya nyuma ari nayo ya kane miliyoni 1.

Hazabaho kandi amarushanwa y’ingabo, muri ayo marushanwa yose amafaramga azayavamo azahabwa abamugariye ku rugamba, icya kabiri gihabwe abarinzi b’igihango naho igice cya gatatu gihabwe itsinda rizwi ku izina rya “Dukomeze ubutwari” rigizwe n’Intwari z’i Nyange.

Umunsi w’Intwari uzabera ku rwego ry’imidugudu mu gihugu hose, insanganyamatsiko ku nshuro ya 24 ikaba igira iti “Dukomeze ubutwari twubaka u Rwanda twifuza.”

TANGA IGITEKEREZO

Leave a Reply

Be the First to Comment!

avatar