18°C , Mostly cloudy | Kigali-Rwanda

Abasaga 51% bize muri Carnegie Mellon University Africa ni Abanyarwanda

Yanditswe na Imvaho Nshya

Ku ya 14-01-2021 saa 11:25:51

Carnegie Mellon University Africa (CMU-Africa ) ni ishami rya Kaminuza imwe rukumbi (Carnegie Mellon University) yo muri Leta Zunze Ubumwe z’Amerika ikorera muri Afurika, ikaba ifite icyicaro cyayo gikuru mu Rwanda guhera mu mwaka wa 2011.

Ni kaminuza ibonwa nk’ingenzi mu cyerekezo cy’u Rwanda, cyo kuba Igihugu cyubatse ubukungu bushingiye ku bumenyi n’ikoranabuhanga, ikaba yigisha amasomo yose y’icyiciro cya Gatatu cya Kaminuza hakoreshejwe ubuyobozi n’ibikorwa byose bya Kaminuza biri muri Afurika.

Ni Kaminuza yavutse ku bufatanye bwa Carnegie Mellon University na Leta y’u Rwanda, igamije gukemura ikibazo cy’umubare muke w’abahanga mu by’ubumenyi n’ikoranabuhanga.

Kuri uyu wa Kane tariki ya 14 Mutarama 2021, Abadepite bagize Komisiyo y’Uburezi, Ikoranabuhanga, Umuco n’Urubyiruko, bagiranye ikiganiro na Minisitiri w’Uburezi Dr. Uwamariya Valentine, ku mushinga w’iterambere ry’iyo Kaminuza.

Minisitiri Dr. Uwamariya yagejeje ku Badepite ishusho rusange ya Kaminuza ya Carnegie Mellon University Africa, agaragaza ko nubwo imaze mu Rwanda igihe kitaragera ku myaka icumi, ariko umusaruro wayo umaze kuba mwinshi, ndetse mu bayizemo baturuka mu bihugu 19, Abanyarwanda bihariye 51%.

Minisitiri Dr Uwamariya yavuze ko abitabira amasomo ya CMU-Africa bamaze kwikuba 3 kuva yatangira mu #Rwanda, ndetse bigaragara ko nibura 90% by’abarangiza muri iyi kaminuza baguma muri Afurika, bakagira uruhare mu guteza imbere ikoranabuhanga muri uyu mugabane.

Yavuze ko by’umwihariko ku Rwanda, kuva kaminuza yasinyana amasezerano y’imikoranire na Guverinoma y’u Rwanda, yafashije Minisiteri y’Uburezi (MINEDUC) gutegura integanyanyigisho y’ishuri ry’ikoranabuhanga.

Yakomeje ashimangira ko MIEDUC iri gukorana na Kaminuza zo mu Rwanda zigisha ibijyanye n’ikoranabuhanga kugira ngo harebwe uburyo hanozwa porogaramu zigishwa bityo bizafashe abanyeshuri bashaka kwiga muri CMU-Africa gutsinda ikizamini kibemerera kuyigamo.

Minisitiri Dr Uwamariya yavuze kandi ko hari gushakwa abaterankunga kugira ngo kaminuza ya CMU-Africa ibashe kugira ubushobozi bwo kwigisha no kwakira abanyeshuri benshi ndetse n’umubare w’Abanyarwanda bayigamo wiyongere.

Yagaragaje zimwe mu mbogamizi zirimo kuba CMU-Africa ihenze cyane ku buryo abenshi mu Banyarwanda bayigamo biyishyurira bibagora cyane, bigatuma umubare w’abanyeshuri b’Abanyarwanda uba muke.

Kwiga muri iyi Kaminuza iri mu zikomeye cyane ku Isi bisaba kuba wifite, cyane ko binavugwa ko ku mwaka umunyeshuri umwe yishyura agera muri miliyoni 16 z’amafaranga y’u Rwanda.

Ku banyeshuri bo mu bihugu bigize Umuryango w’Ibihugu bya Afurika y’Uburasirazuba (EAC), bo bashobora guhabwa buruse (scholarship) itangwa na Leta y’u Rwanda, bakishyura 50% bingana n’amadolari 8.000 ku mwaka angana na miriyoni 8 z’amafaranga y’u Rwanda.

Abadepite basabye ko hashyirwaho gahunda yo kumenyekanisha CMU-Africa kugira ngo abanyeshuri biga muri kaminuza z’u Rwanda bajye biga bazi ibyiza byayo, hanitabwa ku ireme ry’uburezi kugira ngo abanyeshuri b’Abanyarwanda babashe kujya batsinda ibizamini bibemerera kuyigamo.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.