18°C , Partly sunny | Kigali-Rwanda
Gashugi Andre' Umuyobozi Mukuru w'Ikigo k'ibigega by'imigabane RNIT

Abasaga 1700 bizigamiye miliyari n’igice mu kigega ‘Iterambere Fund’

Yanditswe na MUTUNGIREHE SAMUEL

Ku ya 30-03-2018 saa 07:07:23

Abanyarwanda n’ibigo bitandukanye bageze ku 1 796 bamaze kwizigamira amafaranga y’u Rwanda arenga milayari imwe na miliyoni magana atanu mu kigega Leta y’u Rwanda yashyizeho, “Iterambere Fund”, gifasha buri wese kwizigamira bigamije ishoramari.

Gashugi Andre’ Umuyobozi Mukuru w’Ikigo k’ibigega by’imigabane RNIT

Byatangajwe na Gashugi André, Umuyobozi Mukuru w’Ikigo k’ibigega by’imigabane, RNIT, ari nacyo gifite mu nshingano ikigega Iterambere Fund, mu nama rusange ya mbere yahurije i Kigali abizigamye, bareba aho imigabane yabo igeze mu nyungu, gukomeza kubashishikariza kongera imigabane yabo no kuvugurura bimwe byo bifuza kugira ngo barusheho guhabwa serivisi nziza.

Gashugi yavuze ko kuva tariki ya 12 Nyakanga 2016 Ikigega Iterambere Fund gitangijwe na Leta y’u Rwanda mu rwego rwo guteza imbere umuco wo kwizigamira, abantu ku giti cyabo batandukanye, ibigo bitandukanye, abishyize hamwe, ibimina n’amakoperative batangiye kugura imigabane yo kwizigamira mu buryo bwo kwishyira hamwe, umugabane umwe ugura amafaranga 2000 ubu bakaba bageze aho buri wese abona inyungu yo kwizigamira bigamije ishoramari.

Ati “Ikigega cyashoboye kunguka 9.77% mu gihe cy’umwaka ushize, bikaba ari inyungu nziza kuruta izindi nyungu zose bashobora kubona ahandi, mu bundi bwose busanzwe bwo kwizigamira bikaba ari uburyo bwo abanyamigabane bishimiye.

Kugeza ubu amafaranga ari mu kigega Iterambere Fund ni miliyari imwe n’igice y’amafaranga y’u Rwanda, yashowe n’abantu 1 796 kandi ikigega uko gikoze giteganya ko hagati ya 70% kugera ku 100% by’amafaranga y’abizigamye ashorwa mu mpapuro mpeshwamwenda (Treasury  Bonds) no mu mabanki atandukanye.”

Abizigamye bagaragarijwe ko bashobora kumenya inyungu ku migabane yabo bitewe n’igihe buri umwe yinjiriye mu kigega, bityo bashimirwa intera bateye mu kwizigamira no kuzigamira urubyaro rwabo mu kigega gicunzwe mu buryo bwizewe kandi bufite inzego zikurikirana uko imari icunzwe buri munsi.

Bamwe mu bateye intambwe yo kwizigamira, babwiye Imvaho Nshya ko intambwe bateye idasubira inyuma, kandi bamaze kubona inyungu itandukanye n’uko bumva ibindi bigo bifasha abantu kwizigama bibikora, bashingiye ku izamuka ry’agaciro ku mugabane mu kigega Iterambere Fund kageze ku mafaranga 114,92 tariki ya 29 Werurwe 2018 kandi kadashobora kumanuka.

Ahimana Sylvain, uturuka mu karere ka Gakenke yagize ati “Njya gutangira, nagiye kuri interineti mbona handitseho ko hari ikigega kigiye kuza cyo kwizigamira, ku buryo umuntu wese ashobora kwizigamira ku mafaranga make afite, ndavuga nti reka nizigamire ariko mfite intego yo kuvuga ngo ni ejo hazaza hange.

Akenshi umuntu yizigamira afite ikintu ashaka kuzageraho, ariko nanone ejo hazaza hawe uhategura uyu munsi; nge nizigamira nteganya ko amafaranga mbasha gukorera uyu munsi ejo nta kazi mfite cyangwa nimbyara umwana azasange hari ikintu nabashije guteganya kizamfasha.”

Tumwebaze Candide, waje ahagaragariye umuryango “Abahuje Family”, yagize ati “Abenshi biganjemo urubyiruko turashaka ko nibura mu myaka nk’itatu dufte intego yo kuzubaka sitasiyo ya petelori, icyo gihe tuzareka kujya gushaka akazi ahubwo dukore umushinga uzaduha akazi.”

Chairman w’akanama gashinzwe imikorere y’ikigega Iterambere Fund, DR. Joseph Nzabonikuza yagiriye inama abantu ko muri iki gihe nta muntu ugomba kuba nyamwigendaho kuko gufatanya n’abandi ari bwo buryo bufasha umuntu kugera ku nzozi ze nta kimunanije.

 

TANGA IGITEKEREZO

Leave a Reply

Be the First to Comment!

avatar