26°C , Partly sunny | Kigali-Rwanda
Dr Bizimana Jean Damascene, Umunyamabanga Nshingwabikorwa wa CNLG

Abasabye gusubirishamo imanza za Gacaca ni 4 682 – CNLG

Yanditswe na TWAGIRA WILSON

Ku ya 09-02-2018 saa 06:44:38

Umunyamabanga nshingwabikorwa wa Komisiyo y’igihugu ishinzwe kurwanya Jenoside, Dr. Bizimana Jean Damascene,  yavuze ko abakatiwe n’Inkiko Gacaca kugeza banditse basaba gusubirishamo imanza,  guhera mu mwaka wa 2013, kugeza mu mwaka ushize wa 2017 biyongereye cyane kuko  bagera kuri 4 682.

Dr Bizimana Jean Damascene, Umunyamabanga Nshingwabikorwa wa CNLG

Yasabye ko izindi nzego z’ubutabera zibishinzwe zafasha ikibazo cy’abasubirishamo imanza kikarangira, bitewe nuko ngo abenshi mu basubirishamo babikora nkana, kandi  ari  ba ruharwa bakatiwe ibihano biri  hagati y’imyaka 30 na burundu,  cyane  ko bamwe muri bo bazi neza ko hari  bamwe  mu bari kubatangaho amakuru batagihari.

Dr. Bizimana Jean Damascene yabivugiye mu Nteko, tariki 7 Gashyantare 2018 ubwo we na bamwe mu bayobozi barimo umunyamabanga wa Leta ushinzwe itegeko nshinga n’andi mategeko Uwizeyimana Evode, intumwa y’ubushinjacyaha bukuru n’abandi bayobozi muri Minisiteri y’Ubutabera, MINIJUST, bari imbere y’abadepite bagize Komisiyo ya politiki, mu rwego rwo gusuzuma zimwe mu ngingo zavugururwa zirebana n’Inkiko Gacaca.

Abadepite n’abayobozi bari imbere ya komisiyo basanga abifuza gukomeza gusubirishamo imanza za Gacaca kandi  zararangiye ari ikibazo cyagombye kwitonderwa, kuko ngo bwaba ari  bumwe mu buryo bwo gutesha agaciro no gupfobya umusaruro Inkiko Gacaca zagezeho nk’uko byagarutsweho na bamwe mu badepite.

Ku birebana n’icyo kibazo,  Umunyamabanga wa leta Uwiringiyimana Evode, umwe mu batanze ibitekerezo, avuga ko ari byo koko ikibazo gikwiye kwitonderwa cyane ko gifite umwihariko wacyo, atanga ingero  z’umuntu ushobora kwitwaza ko  yakatiwe n’Inkiko Gacaca adahari, kandi akaba asaba guhabwa undi mwanya ngo yisobanure.

Akomeza  agira ati “Abashobora kwifuza gusubirishamo imanza twabisigira  gusa  umwihariko w’umuntu ushobora kuvuga ngo uwo yarezwe ko yishe imyaka 10 ishize,  nyuma y’igihe runaka bigaragaye ko noneho uwo bivugwa ko yishe  abonetse kuko yiberaga mu kindi gihugu, ariko ataratorotse ubutabera, icyo gihe ni we wenyine wahabwa amahirwe yo gusubirishamo urubanza rwe  kandi bigakorwa n’inkiko zibifitiye ububasha.”

TANGA IGITEKEREZO

Leave a Reply

Be the First to Comment!

avatar