Abarwayi 6 bishwe na COVID-19 mu minsi 10 mu Rwanda

Yanditswe na Imvaho Nshya

Ku ya 10-09-2020 saa 19:20:28

Mu mpera z’ukwezi gushize ni bwo Minisitiri w’Ubuzima yatangaje ko ukurikije uburyo ubwiyongere bw’abarwayi bwagaragaye mu mezi make ashize, abantu bagera kuri 25 bashobora kubura ubuzima mu minsi 30 mu gihe nta mpinduka zigaragaye mu ngamba zo kwirinda ikwirakwira ry’iki cyorezo. 

Mu Rwanda ntibisanzwe kubona hatangazwa abantu  babura ubuzima inkurikirane kubera icyorezo cya COVID-19, aho guhera tariki ya 1 kugeza uyu munsi ku ya 10 Nzeri 2020 hamaze gutangazwa abarwayi batandatu bose bapfuye mu minsi icumi gusa.

Umurwayi wahitanywe  na COVID-19 watangajwe kuri uyu wa Kane abaye uwa 22 wishwe n’icyo cyorezo mu Rwanda, akaba ari umubyeyi w’imyaka 62 y’amavuko wari utuye mu Mujyi wa Kigali. Minisiteri y’Ubuzima yihanganishije abo mu muryango we basigaye.

Yatangajwe hamwe n’abarwayi bashya batahuweho icyo cyorezo 19, barimo 16 bo muri Kigali batahuwe mu bahuye n’abanduye mu bibasiwe kurusha abandi, babiri bo muri Gisagara ndetse n’umwe wabonetse mu Karere ka Rubavu.

Uyu munsi kandi hatangajwe abantu 27 bakize icyo cyorezo, bituma umubare w’abamaze gukira bose ugera ku 2,352 bangana na 53% by’abarwayi 4, 479 bamaze gutahurwa mu bipimo 454,246 byafashwe kuva tariki 14 Werurwe ubwo umurwayi wa mbere yabonekaga ku butaka bw’u Rwanda.

Kugeza ubu abakirimo kwitabwaho n’abaganga bageze ku 2,114.

Igikorwa cyo gupima abantu mu buryo bwa rusange mu Gihugu kirakomeje, ndetse ingendo zihuza Umujyi wa Kigali n’Intara mu modoka rusange zahagaritswe mu rwego rwo gukumira ikwirakwizwa ry’icyo cyorezo.

Abaturarwanda barasabwa kurushaho kubahiriza amabwiriza yo kwirinda ari yo gusiga intera ya metero, kwambara udupfukamunwa no gukaraba intoki kenshi bakoresheje amazi meza n’isabune cyangwa arukoro yabugenewe.

Imibare yatangajwe ku rwego mpuzamahanga yerekana ko muri Afurika abamaze kwandura COVID-19 bageze kuri miriyoni n’ibihumbi 322 barimo abantu miriyoni bakize n’abandi basaga ibihumbi 31.9 bahitanywe na cyo. Abamaze kwandura ku Isi barasaga miriyoni 28 barimo abasaga  miriyoni 20 bakize n’abapfuye barenga ibihumbi 911.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.